އީރާނުގެ ސަރުކާރުން އެޤައުމުގެ އަވަށްޓެރި ޤައުމުތަކަށް ވަރުގަދަ އިންޒާރެއް ދީފިއެވެ. އީރާނުން ބުނެފައިވަނީ "ދުޝްމަނުން" އެޤައުމާ ދެކޮޅަށް ކުރާ ހަނގުރާމައިގެ ހަރަކާތްތައް ހިންގުމަށް އަވަށްޓެރި ޤައުމުތަކުގެ ބިން ބޭނުންކުރުމުގެ ފުރުޞަތު ދީގެން ނުވާނެ ކަމަށެވެ.
މި އިންޒާރު އައިސްފައިވަނީ މެދުއިރުމަތީގެ މަސްރަޙު ނުތަނަވަސްވެފައިވާ ދަނޑިވަޅެއްގައެވެ. އީރާނުގެ އޮފިޝަލުން ހާމަކުރި ގޮތުގައި، އެޤައުމާ ދެކޮޅަށް އިސްރާއީލުން ނުވަތަ އެހެންވެސް ބާރަކުން ހަމަލާއެއް ދިނުމަށް އެހެން ޤައުމެއްގެ ވައިގެ ސަރަޙައްދު ނުވަތަ ބިން ބޭނުންކޮށްފިނަމަ، އެއީ އީރާނާ ދެކޮޅަށް ކުރެވޭ އަމަލެއްގެ ގޮތުގައި ބަލާނެއެވެ.
އީރާނުން މިފަދަ އިންޒާރެއް ދީފައިވަނީ ސަރަޙައްދީ ހަމަޖެހުން ދެމެހެއްޓުމަށާއި، އެޤައުމުގެ ސަލާމަތާއި ރައްކާތެރިކަން ކަށަވަރުކުރުމުގެ މަޤްޞަދުގައެވެ. ޚާއްޞަކޮށް އިސްރާއީލުން ފަލަސްޠީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ އަމަލުތަކާއި، ސަރަޙައްދީ މަސްރަޙު ގޯސްވަމުންދާތީ އީރާނުން ވަނީ އެކަމާ ކަންބޮޑުވުން ފާޅުކޮށްފައެވެ.
އީރާނުގެ މި ނިންމުމަކީ ބޭރުގެ ބާރުތަކުން ސަރަޙައްދީ ކަންކަމުގެ ތެރެއަށް ވަދެ، ހަމަނުޖެހުން އުފެއްދުމަށް ކުރާ މަސައްކަތްތަކަށް ހުރަސްއެޅުމަށް އެޅި ފިޔަވަޅެކެވެ. އަދި އަވަށްޓެރި ޤައުމުތަކުން މިކަމުގައި ޒިންމާދާރުކަމާއެކު އަމަލުކުރުމަށް އީރާނުން ވަނީ ގޮވާލާފައެވެ.
