ގިރާވަރުފަޅު ހިއްކުމުގެ ބިޔަ މަޝްރޫޢު ކުރިއަށްދާ ގޮތް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައްލަވައިލައްވައިފި އެވެ. މި މަޝްރޫއަކީ މާލެ ސަރަހައްދުގެ ބޯހިޔާވަހިކަމުގެ މައްސަލައަށް ހައްލެއް ހޯދުމަށްޓަކައި ސަރުކާރުން ކުރިއަށްގެންދާ މުހިންމު މަސައްކަތެކެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދާދިފަހުން ވިދާޅުވެފައިވަނީ، ގިރާވަރުފަޅު ހިއްކުމުގެ މަސައްކަތް އަންނަ އޭޕްރިލް މަހުގެ ނިޔަލަށް އެއްކޮށް ނިންމާލެވޭނެ ކަމަށެވެ. އަދި ބިން ހިއްކައި ނިމުމާއެކު، އަންނަ ޖޫން މަހުގެ ތެރޭގައި އެ ފަޅުން ގޯތި ލިބުނު ފަރާތްތަކަށް ގޯތި ދޫކުރަން ފަށާނެ ކަމަށްވެސް ރައީސް ވަނީ އިއުލާން ކުރައްވާފަ އެވެ.

ގިރާވަރުފަޅުން ޖުމުލަ 167.15 ހެކްޓަރުގެ ބިން ހިއްކުމަށް ހަމަޖެހިފައިވާއިރު، މި މަޝްރޫއު މި ސަރުކާރާ ހަވާލުވިއިރު ނިމިފައިވަނީ ފޭސް 1 ގެ އެންމެ %41.8 މަސައްކަތެވެ. އެއީ ގާތްގަނޑަކަށް 70 ހެކްޓަރުގެ ބިމެވެ. ނަމަވެސް މިހާރު އެމްއޭސީއެލްއާ ހަވާލުކޮށްގެން ބާރު ދުވެލީގައި މަސައްކަތް ކުރިއަށްދާއިރު، ފެބްރުއަރީ 13 އިން ފެށިގެން މިހާތަނަށް ޖުމުލަ 105 ހެކްޓަރުގެ ބިން ވަނީ ހިއްކާ ނިންމާފަ އެވެ. މިއީ ފޭސް 1 ގެ %62.8 މަސައްކަތެވެ.

^{ރައީސް ގިރާވަރުފަޅަށް ކުރެއްވި ދަތުރުފުޅުގެ ތެރެއިން. / ފޮޓޯ: ރައީސް އޮފީސް}

މި މަޝްރޫއުގެ ދަށުން ގިރާވަރުފަޅުގެ އައު ލޭންޑް ޔޫސް ޕްލޭނެއް އެކުލަވާލައި، އެ ޕްލޭނަށް ގެނައި ބަދަލުތަކާ ގުޅިގެން ގޯތި ލިބޭ ފަރާތްތަކުގެ މެދުގައި އަލުން ގުރުއަތުލުންވެސް ވަނީ ކުރިއަށް ގެންގޮސްފަ އެވެ. ގިރާވަރުފަޅުން 4 ސައިޒެއްގެ ޖުމުލަ 4،072 ގޯތި ދޫކުރުމަށް ވަނީ ނިންމާފަ އެވެ.

މި މަސައްކަތް އަވަސްކުރުމަށްޓަކައި ބޭނުންކުރަނީ ދުނިޔޭގެ ނިސްބަތުންވެސް ބިން ހިއްކުމަށް ބޭނުންކުރާ އެންމެ ބޮޑެތި އުޅަނދުތަކެވެ. އޭގެ ތެރޭގައި 35،000 ކިއުބިކް މީޓަރުގެ ވެލި އެޅޭ "ކުއީންސް އޮފް ދި ނެދަލޭންޑްސް" އާއި 24،000 ކިއުބިކް މީޓަރުގެ ވެލި އެޅޭ "އޮރެންޖް" ޑްރެޖަރު ހިމެނެ އެވެ.

އެމްއޭސީއެލްގެ އަމާޒަކީ އޭޕްރިލް 30 ގެ ނިޔަލަށް ބިން ހިއްކުމުގެ ހުރިހާ މަސައްކަތެއް ނިންމާލުމެވެ. މިހާރު ކުރިއަށްދާ ދެވަނަ ފިޔަވަހީގެ 97.15 ހެކްޓަރު ހިއްކުމުގެ މަސައްކަތުގެ %36 މިހާރު ވަނީ ނިމިފަ އެވެ. މި މަޝްރޫއު ނިމުމުން މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ ދައްޗަށް ބޮޑު ލުޔެއް ލިބިގެންދާނެ އެވެ.