ޗާގޯސް (ފޯޅަވަހި) މޮރިޝަސްއާ ހަވާލުކުރުމަށް އިނގިރޭސިވިލާތުން ނިންމާފައިވާ ނިންމުން ދިވެހިރާއްޖެއިން ބަލައިނުގަންނަކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރަސްމީކޮށް އިނގިރޭސި ސަރުކާރަށް އަންގަވައިފި އެވެ.
މިކަމާ ގުޅޭގޮތުން ބީބީސީން ރިޕޯޓުކޮށްފައިވާ ގޮތުން، މި ނިންމުމާމެދު ރާއްޖެއިން އިންތިހާއަށް ކަންބޮޑުވާކަން ހާމަކޮށް، ދެ ފަހަރެއްގެ މަތިން ލިޔުމުން ވަނީ އިއުތިރާޒު ހުށަހަޅާފަ އެވެ. އަދި ރައީސުލްޖުމްހޫރިއްޔާ ޑރ. މުޢިއްޒު ވަނީ އިނގިރޭސިވިލާތުގެ ޑެޕިއުޓީ ޕްރައިމް މިނިސްޓަރު ޑޭވިޑް ލެމީއަށް ފޯނުން ގުޅުއްވައި، މި މައްސަލައިގައި ރާއްޖޭގެ ކަންބޮޑުވުންތައް ހިއްސާކުރައްވާފަ އެވެ.
ޗާގޯސްގެ މައްޗަށް ދިވެހިރާއްޖޭގެ އިސްތިގުލާލީ ހައްގުތަކެއް އޮތްކަމަށް ބުނެ ރައީސް މުއިއްޒު އިސްވެ ހުރެ ދިވެހި ސަރުކާރުން ވަކާލާތު ކުރެ އެވެ. އަދި މި ހައްގުތައް ހޯދުމަށްޓަކައި ބައިނަލްއަގުވާމީ ގާނޫނީ މައިދާނުގައި ފިޔަވަޅު އަޅާނެ ކަމަށް ވެސް ރާއްޖެއިން ދަނީ ބުނަމުންނެވެ. ރައީސް ޑރ. މުއިއްޒު ވިދާޅުވެފައިވަނީ ތާރީހީ އަދި ޖިއޮގްރަފީ ގޮތުން ބަލާއިރު އެހެން އެއްވެސް ގައުމަކަށްވުރެ ބޮޑަށް ޗާގޯސްގެ މައްޗަށް އިސްތިގުލާލީ ހައްގު އޮތީ ރާއްޖެއަށް ކަމަށެވެ.
ނަމަވެސް، އިނގިރޭސިވިލާތުގެ ފޮރިން އޮފީސް މިނިސްޓަރު ސްޓީވަން ޑޯޓީ ވިދާޅުވެފައިވަނީ ޗާގޯސްގެ ސިޔާދަތީ ބާރުގެ މައްސަލައަކީ ހަމައެކަނި އިނގިރޭސިވިލާތާއި މޮރިޝަސްއާ ގުޅޭ ކަމެއް ކަމަށެވެ. މީގެ އިތުރުން، ބައިނަލްއަގުވާމީ ކޯޓުތަކުން ކުރިން ނިންމާފައިވާ ނިންމުންތަކުގައި ޗާގޯސްގެ މިލްކުވެރިކަން އޮތީ މޮރިޝަސްއަށް ކަމަށް ބުނެފައިވާކަން އިނގިރޭސި ސަރުކާރުގެ މަސްދަރުތަކުން ފާހަގަކުރެ އެވެ.
19 ވަނަ ގަރުނުން ފެށިގެން އިނގިރޭސިވިލާތުގެ ބާރުގެ ދަށުގައި އޮތް ޗާގޯސް ޖަޒީރާ މޮރިޝަސްއާ ހަވާލުކުރަން ނިމިދިޔަ ސަރުކާރުން އެއްބަސްވީ، އެތަނުގައި އޮންނަ އިނގިރޭސި-އެމެރިކާ އަސްކަރީ މަރުކަޒު ދެމެހެއްޓުމުގެ މަގުސަދުގައި ކަމަށް ބީބީސީން ވަނީ ރިޕޯޓުކޮށްފަ އެވެ. މި އެއްބަސްވުމުގެ ދަށުން، އެންމެ ބޮޑު ރަށް ކަމަށްވާ ޑިއޭގޯ ގާސިއާގައިވާ އަސްކަރީ މަރުކަޒު ކުއްޔަށް ހިފުމަށް އަހަރަކު އެވްރެޖްކޮށް 101 މިލިއަން ޕައުންޑް ދެއްކުމަށް ވަނީ ހަމަޖެހިފައި ކަމަށްވެސް އެ ނޫހުން ރިޕޯޓު ކުރެ އެވެ.
މި މައްސަލައިގައި ރާއްޖެއިން ބުނަމުންދަނީ، ރާއްޖޭގެ މަސްލަހަތުތަކަށް ރިއާޔަތްކުރުމެއް ނެތި އިނގިރޭސިވިލާތުން މޮރިޝަސްއާއެކު އެކަނި މަޝްވަރާކޮށް މިފަދަ ނިންމުމެއް ނިންމުމަކީ ބަލައިގަނެވޭނެ ކަމެއް ނޫން ކަމަށެވެ. ރާއްޖެއިން ދަނީ ބައިނަލްއަގުވާމީ އަދުލު އިންސާފާ ބެހޭ ކޯޓު (އައި.ސީ.ޖޭ) އަށް މި މައްސަލަ ހުށަހެޅުމަށްޓަކައި ގާނޫނީ ގޮތުން ކުރަންޖެހޭ ދިރާސާތައް ކުރަމުންނެވެ.
