އެމެރިކާއާއި އިޒުރޭލުގެ އުޅަނދުތައް ރަތް ކަނޑަށް ފައްތާނެ ކަމަށާއި، މިތިބި "ބަޑީގެ ވަޒަން ދޫކޮށްލަން ތައްޔާރަށް" ކަމަށް ބުނެ ޔަމަނުގެ ހޫޘީން, އިޒްރޭލާއި އެމެރިކާއިން އީރާނާ ދެކޮޅަށް ކުރަމުންދާ ހަނގުރާމައާ ގުޅިގެން ވަރުގަދަ އިންޒާރެއް ދީފައެވެ. މި އިންޒާރު ދީފައިވަނީ މެދުއިރުމަތީގެ މަސްރަހު ނުހަނު ބޮޑަށް ނުތަނަވަސްވެ، ބޮޑު ހަނގުރާމައެއްގެ ބިރު ހީވެފައިވާ ދަނޑިވަޅެއްގައެވެ.

ހޫޘީންގެ ތަރުޖަމާނު ހާމަކުރެއްވި ގޮތުގައި، އިޒްރޭލުން ފަލަސްތީނުގެ މުސްލިމުންނާ ދެކޮޅަށް ހިންގަމުންދާ ލާއިންސާނީ އުދުވާނުތަކާއި، އެމެރިކާގެ އެހީތެރިކަމާއެކު އީރާނަށް އަމާޒުކޮށް ދެމުންދާ ހަމަލާތަކަކީ މުޅި ސަރަހައްދުގެ ސުލްހަ ނަގާލުމަށް ހިންގާ އަމަލުތަކެކެވެ. އެހީތެރިކަން ބޭނުންވެފައިވާ ފަރާތްތަކުގެ ހައްގުގައި އަދި އިސްލާމީ އުއްމަތުގެ ދިފާއުގައި ކޮންމެ ވަގުތަކުވެސް ވަރުގަދަ ރައްދެއް ދިނުމަށް އެ ޖަމާއަތުގެ ހަނގުރާމަވެރިން ތިބީ ފުރިހަމައަށް ތައްޔާރުވެގެން ކަމަށް އޭނާ ވިދާޅުވިއެވެ.

މި ހަމަނުޖެހުންތައް އުފެދިފައިވަނީ އެމެރިކާ އާއި އިޒްރޭލުގެ އަސްކަރީ ބާރުތަކުން އީރާނުގެ އެކި ސަރަހައްދުތަކަށް އަމާޒުކޮށް ހަމަލާތަކެއް ދޭން ފެށުމާ ގުޅިގެންނެވެ. މީގެ ރައްދުގައި ހޫޘީން ވަނީ ރަތްކަނޑާއި އެ ސަރަހައްދުގެ މުހިންމު ކަނޑުގެ މަގުތަކުގައި ހަރަކާތްތެރިވާ އިޒްރޭލަށް ނިސްބަތްވާ އުޅަނދުތަކާއި، އެ ގައުމަށް ވާގިވެރިވާ ފަރާތްތަކުގެ މަސްލަހަތުތަކަށް ހަމަލާދޭނެ ކަމުގެ އިންޒާރު ތަކުރާރުކޮށްފައެވެ.

ހޫޘީން ބުނަމުންދަނީ އެމީހުންގެ މި ހަރަކާތްތަކަކީ އިޒްރޭލުގެ އަނިޔާވެރިކަން ހުއްޓުވައި، ފަލަސްތީނުގެ ރައްޔިތުންނަށް ނަސްރު ހޯދައިދިނުމަށް ކުރާ މަސައްކަތެއް ކަމަށެވެ. މި ހަމަނުޖެހުންތަކުގެ ސަބަބުން ބައިނަލްއަގުވާމީ ވިޔަފާރި މަގުތަކަށް ބޮޑެތި ގޮންޖެހުންތަކެއް ކުރިމަތިވަމުންދާއިރު، ދުނިޔޭގެ ބާރުގަދަ ގައުމުތަކުން ދަނީ މި މަސްރަހު އިތުރަށް ގޯސްވެދާނެތީ ކަންބޮޑުވުން ފާޅުކުރަމުންނެވެ.

އިޒްރޭލުން ފަލަސްތީނުގައި ހިންގާ ގަތުލުއާންމު ހުއްޓާނުލާހާ ހިނދަކު، ރަތްކަނޑުގެ ސަލާމަތާއި ރައްކާތެރިކަން ކަށަވަރު ނުކުރެވޭނެ ކަމަށްވެސް ހޫޘީން ވަނީ ތަކުރާރުކޮށް ބުނެފައެވެ.