ރާއްޖޭގެ ދެކުނުގެ އަތޮޅުތަކުގައި ކައްކާ ގޭހުގެ ރައްކާތެރިކަން ކަށަވަރުކޮށް، ދަތިކަމެއްނެތި ރައްޔިތުންނަށް ގޭސް ފޯރުކޮށްދިނުމަށްޓަކައި ގދ. ތިނަދޫގައި މޯލްޑިވް ގޭސްގެ ފަރާތުން ތަރައްގީކުރާ 1500 މެޓްރިކް ޓަނުގެ ސްޓޯރޭޖާއި ޑިސްބިއުޝަން ސެންޓަރުގެ މަސައްކަތް ނިންމުމުގެ އަމަލީ މަސައްކަތް އެ ކުންފުނިން ފަށައިފި އެވެ.
މިއީ 2016 ވަނަ އަހަރުން ފެށިގެން އެ ކުންފުނިން ކުރިއަށްގެންދާ ވަރަށް މުހިންމު މަޝްރޫއެކެވެ. މޯލްޑިވް ގޭސްއިން ހާމަކުރި ގޮތުގައި، މި މަޝްރޫއުގެ 75 އިންސައްތަ މަސައްކަތް މިހާރު ވަނީ ނިމިފަ އެވެ. ކުންފުނީގެ މިހާރުގެ އަމާޒަކީ ނުނިމިހުރި 25 އިންސައްތަ މަސައްކަތް ހަލުވިކަމާއެކު ކުރިއަށް ގެންގޮސް، ކުރިއަށް އޮތް 15 މަސްދުވަހުގެ ތެރޭގައި މުޅި މަޝްރޫއު އެއްކޮށް ނިންމާލައި ހިދުމަތަށް ގެނައުމެވެ.
މި މަޝްރޫއުގެ މަސައްކަތް މީގެ ކުރިން މަޑުޖެހެން މެދުވެރިވީ ތިނަދޫގެ ލޭންޑްސްކޭޕަށް އައި ބޮޑެތި ބަދަލުތަކަކާ ގުޅިގެންނެވެ. ވަކިން ހާއްސަކޮށް، ސައިޓުގެ އިރުމަތީ ފަރާތުން އިންޑަސްޓްރިއަލް ބިން ހިއްކުމާ ގުޅިގެން ޑިސްބިއުޝަން ސެންޓަރުގެ އަންލޯޑިން ޕައިޕްލައިނަށާއި ވޯޓަރ ޕަންޕްތަކުގެ ސަކްޝަންލައިންތަކަށް ފަންނީ ބޮޑެތި ބަދަލުތަކެއް ގެންނަން ޖެހުނެވެ. މިގޮތުން އައު ޑިޒައިނުގެ ދަށުން ޓޭންކަށް ގޭސް ލޯޑްކުރުމަށްޓަކައި 450 މީޓަރުގެ ދިގު ޕައިޕްލައިނެއް ޤާއިމުކުރުމުގެ މަސައްކަތް މިހާރު ދަނީ ކުރެވެމުންނެވެ.
މަޝްރޫއުގެ މަސައްކަތްތައް ކުރިއަށްދާ ގޮތް ބައްލަވާލެއްވުމަށް މޯލްޑިވް ގޭސްގެ މެނޭޖިން ޑިރެކްޓަރު އަބްދުﷲ މުހައްމަދާއި އިންޖިނިއަރިން ޑިޕާޓްމަންޓުގެ އިސްވެރިން ވަނީ ދާދިފަހުން ތިނަދޫއަށް ޒިޔާރަތްކުރައްވާފަ އެވެ. މި ދަތުރުފުޅުގައި ފެނަކަ ކޯޕަރޭޝަނާއި، ތިނަދޫ ސިޓީ ކައުންސިލްގެ އިތުރުން ރަށުގެ ކަމާބެހޭ ފަރާތްތަކާ ބައްދަލުކުރައްވައި، މަޝްރޫއު އަވަސްކުރުމަށްޓަކައި ކުރެވިދާނެ ކަންކަމާ ގުޅޭގޮތުން ފުޅާ ދާއިރާއެއްގައި ވަނީ މަޝްވަރާކުރައްވާފަ އެވެ.
ބައިނަލްއަގުވާމީ ބާޒާރުގައި ގޭހުގެ އަގަށް އަންނަ ބަދަލުތަކުގެ ސަބަބުން ރައްޔިތުންނަށް ކުރާ ނޭދެވޭ އަސަރު ކުޑަކޮށް، ލުއިފަސޭހަކަމާއެކު ގޭސް ލިބޭނެ މަގުފަހިކޮށްދިނުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ވަރަށް އިސްކަންދެއްވާ ސިޔާސަތެކެވެ. މޯލްޑިވް ގޭސްއިން ފާހަގަކުރި ގޮތުގައި، ރައީސުލްޖުމްހޫރިއްޔާ ގެންދަވަނީ މި މަޝްރޫއުގެ މަސައްކަތްތައް ހިނގާނުހިނގާ ގޮތް ވަރަށް ގާތުން ބައްލަވަމުންނެވެ.
މި ޕްލާންޓުގެ މަސައްކަތް ނިމުމުން، ދުނިޔޭގެ ބާޒާރުގައި ގޭހުގެ އަގަށް އަންނަ ލޮޅުންތަކުން ރައްޔިތުން ސަލާމަތްކުރުމަށާއި މެދުކެނޑުމެއްނެތި ހިދުމަތް ފޯރުކޮށްދިނުމަށް ބޮޑު އެހީތެރިކަމެއް ލިބޭނެ އެވެ. އަދި ރާއްޖޭގެ ދެކުނުގެ އަތޮޅުތަކަށް ގޭސް ފޯރުކޮށްދިނުމުގައި މިހާރު ކުރިމަތިވާ ގޮންޖެހުންތަކަށް ހައްލެއް ލިބި، ސަރަހައްދީ ފެންވަރުގައި ގޭހުގެ ރައްކާތެރިކަން ކަށަވަރުވެގެންދާނެ ކަމަށް މޯލްޑިވް ގޭސްއިން ބުނެ އެވެ.
