ޔޫރަޕްގެ އިއްތިހާދުގެ ގޭސް ރައްކާކުރާ ޓޭންކުތަކުގައި ހުރީ އެންމެ %64.7 ގޭސް ކަމަށާއި، ކުރިއަށް އޮތް ފިނިމޫސުމުގައި ޔޫރަޕްގެ ގައުމުތަކަށް ގޭސް ލިބުމުގައި ދަތިތަކާއި ކުރިމަތިލާންޖެހިދާނެކަމުގެ ބިރު ބޮޑުވެއްޖެއެވެ.
"ޔޫރަޕިއަން ގޭސް އިންފްރާސްޓްރަކްޗާ" ގެ ތަފާސްހިސާބުތަކުން ދައްކާގޮތުގައި، މިއީ ތާރީހީގޮތުން ބަލާއިރު އަހަރުގެ މި ދުވަސްވަރު ގޭސް ރައްކާކުރެވިފައި ހުންނަންޖެހޭ މިންވަރަށް ވުރެ ބޮޑުތަނުން ދަށް އަދަދެކެވެ.
މަސްރަހު ދިރާސާކުރާ ފަރާތްތަކުން ފާހަގަކުރާ ގޮތުގައި ޔޫރަޕަށް މިއަދު މިފަދަ ނިކަމެތި ހާލެއް ޖެހެން މެދުވެރިވީ، ހަކަތައިގެ އެންމެ ބޮޑު ސަޕްލަޔަރު ކަމަށްވާ ރަޝިޔާ އާއި ދެކޮޅަށް ދަތިކުރުމުގެ ފިޔަވަޅުތައް އަޅައި، އެ ގައުމުގެ ގޭސް ހޮޅިން ބޭނުންކުރުން ހުއްޓާލުމާއި ގުޅިގެންނެވެ. ރަޝިޔާ އާއި "ކުޅެލުމުގެ" ނަތީޖާއެއްގެ ގޮތުން ޔޫރަޕަށް ޖެހުނީ އެހެން ދިމާދިމާލުން މާ އަގުބޮޑު ކޮށް ދިޔާ ގޭސް (އެލްއެންޖީ) އެތެރެކުރާށެވެ.
Advertisement
މިއަދު މުޅި ޔޫރަޕް ހަކަތައަށް ސަލާންޖަހަންޖެހޭ ފަދަ މަޖުބޫރު ހާލަތަކަށް މި ވެއްޓުނީ ރަޝިޔާގެ އިތުރުން މެދުއިރުމަތީގެ ބާރެއް ކަމަށްވާ އީރާނާއި ދެކޮޅަށް ކުރިމަތިލުންތަކެއް އުފެދި، މަސްރަހު ގޯސްވުމުންނެވެ.
މެދުއިރުމަތީގައި އުފެދިފައިވާ އާ ނުތަނަވަސްކަމާއެކު، ޕާޝިއަން ގަލްފް (ފާރިސް ކަނޑުއޮޅި) މެދުވެރިކޮށް ޔޫރަޕަށް ބޭރުކުރާ ދިޔާ ގޭހުގެ ސަޕްލައިއަށް ވެސް ބުރޫއަރާފާނެކަމުގެ ބިރު މިހާރު ވަނީ އިންތިހާއަށް ބޮޑުވެފައެވެ.
އީރާނުގެ ނުފޫޒު އޮންނަ މި ސަރަހައްދުގެ ކަނޑުގެ ރޫޓުތަކަށް ނުރައްކާވުމަކީ ޔޫރަޕަށް ގޭސް ލިބޭނެ ހުރިހާ މަގެއް ބަންދުވުން ފަދަ ކަމެކެވެ.
އެހެންކަމުން، ރަޝިޔާ އަދި އީރާނާއި ދެކޮޅަށް ސިޔާސީ ގޮތުންނާއި އަސްކަރީ ގޮތުން ކުޅެލި ކުޅުމުގެ ސަބަބުން، ކުރިއަށް އޮތް ފިނިމޫސުމުގައި ޔޫރަޕްގެ ރައްޔިތުން ގަދަފިނީގައި ތިބެންޖެހުމުގެ ފުރުސަތު ބޮޑެވެ.
