މާލޭގެ ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމަށް ސަރުކާރުން ކުރިއަށްގެންދާ މަޝްރޫއުގެ ދަށުން، އެ ސަރަހައްދުގެ އެއްގަމު ތޮށީގެ މަސައްކަތްތައް އެމްޓީސީސީން ފަށައިފިއެވެ.
އެމްޓީސީސީން މައުލޫމާތު ދޭގޮތުގައި، މަގުގެ މަސައްކަތުގެ ތެރެއިން އެންމެ ފުރަތަމަ ފަށާފައިވަނީ މިހާރު އޮތް އެއްގަމު ތޮށީގެ ކޮންކްރީޓް ތަޅާލާ، ނެގުމުގެ މަސައްކަތެވެ. މި މަސައްކަތް މިވަގުތު ކުރިއަށްދަނީ ހެންވޭރު ފެރީ ޓާމިނަލާއި އިންވެގެން އޮންނަ ޖެޓީ ސަރަހައްދުގައެވެ. މި ސަރަހައްދުގައި މަސްވެރިންގެ ޕާކާ ހަމައަށް، ދޯނިތައް ކައިރިކުރާ ހުރަސް ތޮށި ހިމެނޭހެން މަރާމާތު ކުރުމަށް ވަނީ ހަމަޖެހިފައެވެ.
މި މަޝްރޫއުގެ ދަށުން ބޮޑުތަކުރުފާނު މަގު ގާތްގަނޑަކަށް 3 މީޓަރަށް ފުޅާކުރުމަށް ވަނީ ނިންމާފައެވެ. އެގޮތުން މަގު ފުޅާކުރާ ސަރަހައްދާ ހަމައަށް ޝީޓް ޕައިލް ކުރުމުގެ މަސައްކަތްވެސް މިހާރު ވަނީ ފަށާފައެވެ. މި މަސައްކަތްތައް ކުރިއަށްދަނީ މަޝްރޫއުގެ ތިންވަނަ ބައެއްގެ ގޮތުގައި، އިއްޒުއްދީނު ފާލަމުން ފެށިގެން ހެންވޭރު ފެރީ ޓާމިނަލާ ހަމައަށް އޮތް 700 މީޓަރުގެ ސަރަހައްދުގައެވެ.
އެމްޓީސީސީން ބުނީ މި ސަރަހައްދު ފަރުމާކޮށްފައިވަނީ ކުރިން ނިމުނު ދެ ސެގްމަންޓްވެސް ކުރިއަށް ގެންދިޔަ ފަރުމާއާ އެއްގޮތަށް މަގުގެ ޖާގަ ބޮޑުކުރުމަށް އިސްކަންދީގެން ކަމަށެވެ. މުޅި މަޝްރޫއުގެ ދަށުން 610 މީޓަރުގެ އެއްގަމު ތޮށި އަލުން އާކޮށް ތަރައްގީކުރާނެއެވެ. ނަމަވެސް، މި މަސައްކަތުގެ ތެރެއިން މަސްވެރިންގެ ޕާކު ހިމެނޭ ސަރަހައްދަށް މިވަގުތު އެއްވެސް ބަދަލެއް ނުގެންނާނެ ކަމަށް އެ ކުންފުނިން ބުނެއެވެ.
ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމުގެ މަސައްކަތުގެ ތެރޭގައި، ތާރުއެޅުމާއި، ފެން ހިންދާ ނިޒާމު ގާއިމުކުރުމާއި، ޕޭމަންޓު ހެދުމުގެ އިތުރުން މަގު ބައްތި ޖެހުން ހިމެނެއެވެ. މި މަޝްރޫއުގެ ދަށުން މިހާތަނަށް ވަނީ އިއްޒުއްދީން ފާލަމުން ފެށިގެން ނޯތު ހާބަރާ ހަމައަށް 380 މީޓަރުގެ ސަރަހައްދެއް ތަރައްގީކޮށް ނިންމާފައެވެ.
