މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅޭ ހަބަރާއި މައުލޫމާތު ޒިންމާދާރުކަމާއެކު ފެތުރުމަށް، މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން އިލްތިމާސްކޮށްފިއެވެ.

މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން ނެރުނު ނޫސްބަޔާނެއްގައި ބުނީ، މިފަދަ ހައްސާސް ދަނޑިވަޅެއްގައި މީޑިއާތަކުން ހަބަރާއި މައުލޫމާތު ރައްޔިތުންނަށް ފޯރުކޮށްދިނުމުގައި ވަރަށް ބޮޑަށް ސަމާލުވާންޖެހޭނެ ކަމަށެވެ. ވަކިން ހާއްސަކޮށް، ގައުމީ ސަލާމަތާއި ރައްކާތެރިކަން ދެމެހެއްޓުމަށްޓަކައި ކަނޑައެޅިފައިވާ ސުލޫކީ މިންގަނޑުތަކަށް ބޯލަނބަންޖެހޭނެކަން އެ ކޮމިޝަނުން ފާހަގަކުރެއެވެ.

ހަބަރުތައް ގެނެސްދިނުމުގައި އެކި ފަރާތްތަކުން ހޯދާ ކޮންޓެންޓުތައް ބޭނުންކުރާއިރު، އެ ފަރާތްތަކުން ދެއްކި ވާހަކައިގެ އަސްލު މަފްހޫމު ނުގެއްލޭނެހެން ގެނެސްދިނުމަށް ކޮމިޝަނުން ވަނީ އިރުޝާދު ދީފައެވެ. އަދި ނަފްރަތު އުފެއްދުމުގެ ބޭނުމުގައި، އަސްލާއި އެއްގޮތް ނޫން ގޮތަށް ބަދަލުކޮށްފައިވާ (މެނިޕިއުލޭޓް ކޮށްފައިވާ) ނުވަތަ އަމިއްލައަށް އުފައްދާފައިވާ (ފެބްރިކޭޓް ކޮށްފައިވާ) ފޮޓޯއާއި އޯޑިއޯ އަދި ވީޑިއޯ ބޭނުންނުކުރުމަށް ހާއްސަ ސަމާލުކަމެއް ދިނުމަށް ވަނީ އެދިފައެވެ.

މީގެ އިތުރުން، ހަނގުރާމައާ ގުޅޭ މައުލޫމާތު ފެތުރުމުގައި ސައްހަ ނޫން މަސްދަރުތައް ބޭނުންކުރާކަމާއި، ބައެއް މީޑިއާތަކުން ހަގީގަތާ ހިލާފު ދޮގު ހަބަރުތައް ފަތުރަމުންދާކަން އެކި ފަރާތްތަކުން ފާހަގަކުރަމުންދާ ކަމަށްވެސް ކޮމިޝަނުން ބުނެފައިވެއެވެ.

މީޑިއާ ކޮމިޝަނުގެ ބަޔާން ނިންމާލަމުން، ދިވެހި އެންމެހައި ނޫސްވެރިން އެފަރާތްތަކުގެ ފަރުދީ ޒިންމާ ޒިންމާދާރުކަމާއެކު އަދާކުރުމަށް ވަނީ ހަނދާންކޮށްދީފައެވެ. މިއީ ރައްޔިތުންނަށް އިތުބާރު ހުރި މައުލޫމާތު ފޯރުކޮށްދިނުމަށްޓަކައި ކޮންމެހެން މުހިންމު ކަމެއްގެ ގޮތުގައި އެ ކޮމިޝަނުން ދެކެއެވެ.