ބިންވެރިޔާ ސްކީމްގެ ދަށުން ހުޅުމާލެ ތިންވަނަ ފިޔަވަހިން ގޯތި ލިބިފައިވާ ފަރާތްތަކަށް ބިން ހަވާލުކުރުމުގެ އަމަލީ މަސައްކަތް މިއަދު ފެށުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ނިންމައިފިއެވެ.
އެޗްޑީސީން ބުނި ގޮތުގައި ގޯތި ހަވާލުކުރުމަށް ވާންޖެހޭ އެންމެ ފަހުގެ ތައްޔާރީތައް މިހާރު ދަނީ ކުރަމުންނެވެ.
ހުޅުމާލެ ތިންވަނަ ފިޔަވަހިން ގޯތި ދޫކުރުމަށް ނިންމާފައިވަނީ އެ ސަރަހައްދު ނުހިއްކާ އޮއްވައެވެ. ނިމިދިޔަ ސަރުކާރުން ފެށި މި މަޝްރޫއު އެކި ސަބަބުތަކާ ހުރެ މެދުކެނޑިފައި އޮތުމަށްފަހު، މި ސަރުކާރުން ވަނީ އެމްއޭސީއެލްއާ ހަވާލުކޮށްގެން ބިން ހިއްކުމުގެ މަސައްކަތް ހަލުވި ދުވެލީގައި ކުރިއަށް ގެންގޮސްފައެވެ. އެގޮތުން 63 ހެކްޓަރުގެ ބިން ހިއްކުމުގެ މަސައްކަތް ނިންމާލާފައިވަނީ މިދިޔަ ޖެނުއަރީ މަހުގެ 25 ވަނަ ދުވަހުއެވެ.
އެޗްޑީސީން މައުލޫމާތު ދޭ ގޮތުގައި، ހުޅުމާލެ ފޭސް 3 އިން ޖުމްލަ 698 ގޯތި ދޫކުރުމަށް ވަނީ ހަމަޖެހިފައެވެ. މީގެ ތެރޭގައި ހިމެނެނީ:
- 1650 އަކަފޫޓުގެ 181 ގޯތި
- 2050 އަކަފޫޓުގެ 242 ގޯތި
- 2450 އަކަފޫޓުގެ 132 ގޯތި
- 2850 އަކަފޫޓުގެ 62 ގޯތި
- 3250 އަކަފޫޓުގެ 41 ގޯތި
- 3650 އަކަފޫޓުގެ 16 ގޯތި
- 4000 އަކަފޫޓުގެ 24 ގޯތި
މި ސަރަހައްދުން ގޯތި ލިބުނު ފަރާތްތަކުގެ މެދުގައި ޕްލޮޓް ކަނޑައެޅުމުގެ ގުރުއަތުލުން ބާއްވާފައިވަނީ މިދިޔަ އަހަރުގެ ޑިސެމްބަރު މަހުގެ 20 ވަނަ ދުވަހުއެވެ. މިހާރު ކުރިއަށްދަނީ ގޯތީގެ އެގްރިމަންޓްތަކުގައި ސޮއިކުރުމާއި، ރެޖިސްޓްރީ ހަވާލުކުރުމުގެ މަރުހަލާއެވެ.
އެޗްޑީސީން އިތުރަށް ބުނީ، ބިން ހަވާލުކުރުމަށްޓަކައި އެ ސަރަހައްދު ސާވޭ ކުރުމާއި އިންފާރު ވަކިކުރުމުގެ މަސައްކަތްތައް މިހާރުވެސް އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއާ ގުޅިގެން ކުރިއަށްދާ ކަމަށެވެ. ބިންވެރިޔާ ސްކީމްގެ ދަށުން ހުޅުމާލެއިން ޖުމްލަ 1300 އަށްވުރެ ގިނަ ގޯތި ދޫކުރުމަށް ވަނީ ކަނޑައަޅާފައެވެ.
