ސަރުކާރުން ހުޅުވާލާފައިވާ ބޯހިޔާވަހިކަމުގެ ސްކީމްތަކަށް މިހާތަނަށް 9،500 އަށްވުރެ ގިނަ ފޯމު ހުށަހަޅާފައިވާ ކަމަށް އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން ހާމަކޮށްފިއެވެ.

އެ ވުޒާރާއިން ހާމަކުރި އެންމެ ފަހުގެ ތަފާސްހިސާބުތަކަށް ބަލާއިރު، ޖުމުލަ 9،645 މީހުން ވަނީ ބޯހިޔާވަހިކަމުގެ އެކި ޕްރޮގްރާމްތަކަށް އެދި ފޯމު ހުށަހަޅާފައެވެ.

މި ސްކީމްތަކުގެ ތެރެއިން އެންމެ ގިނަ ބަޔަކު ކުރިމަތިލާފައިވަނީ ފްލެޓަށް އެދިއެވެ. އެގޮތުން ފްލެޓަށް އެދި 5،993 މީހުން ފޯމު ހުށަހަޅާފައިވާއިރު، ގޯއްޗަށް އެދި 3،234 މީހުން ވަނީ ފޯމު ހުށަހަޅާފައެވެ.

އާއިލީ ބޯހިޔާވަހިކަމުގެ ޕްރޮގްރާމަށް 9،227 ފޯމު ހުށަހަޅާފައިވާއިރު، އަނބިމީހާ ނުވަތަ ފިރިމީހާގެ ބޯހިޔާވަހިކަމެއް އޮތް ނަމަވެސް ކުރިމަތިލެވޭ ގޮތަށް ހުޅުވާލާފައިވާ "ގޯތި ގެދޮރު" ޕްރޮގްރާމަށް 418 ފޯމު ވަނީ ހުށަހަޅާފައެވެ.

ގެދޮރުވެރިކަމާ ބެހޭ ވުޒާރާއިން ބުނީ ޕޯޓަލްގައި ފޯމު ފުރިހަމަކޮށް ޑްރާފްޓް މަރުހަލާގައި 13،279 ފޯމު މިހާރުވެސް އެބައިން ކަމަށެވެ. މިއީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މިހާތަނަށް ހުޅުވާލާފައިވާ ސްކީމްތަކަށް ލިބިފައިވާ ތަރުހީބެވެ.

މީގެ އިތުރުން، އަންނަ އޭޕްރިލް މަހުގެ 1 ވަނަ ދުވަހު އިތުރު ދެ ޕްރޮގްރާމަކަށް ފުރުޞަތު ހުޅުވާލުމަށް ވަނީ ނިންމާފައެވެ. އެއީ "ބޯހިޔާވަހިކަން އެންމެނަށް" ސިޔާސަތުގެ ދަށުން ހިންގާ "ގެދޮރުވެރިޔާ" ޕްރޮގްރާމްގައި ހިމެނޭ ދެ ކެޓަގަރީއަކާއި، ނުކުޅެދުންތެރިކަން ހުންނަ ފަރާތްތަކަށް ހާއްސަ ކެޓަގަރީއެވެ.

ގެދޮރުވެރިޔާ ޕްރޮގްރާމްގެ ދަށުން ފުރުސަތު ދެނީ ނިމުނު ސަރުކާރުގެ ސްކީމްގައި ޖޮއިންޓްކޮށް ގޯތި ލިބުނު މީހުންގެ ތެރެއިން ވަކި ގޯތިތަކަށް ބަދަލުވާން ބޭނުންވާ އާއިލާތަކަށާއި، އަސާސީ ބޯހިޔާވަހިކަމުގެ ސްކީމަކުން ފްލެޓެއް ލިބިފައި އޮތުމުގެ ސަބަބުން ބިންވެރިޔާ ސްކީމަށް ކުރިމަތިނުލެވުނު ފަރާތްތަކަށެވެ.

ސަރުކާރުން ހުޅުވާލާފައިވާ މި ހުރިހާ ސްކީމްތަކަށްވެސް ފޯމު ހުށަހެޅުމުގެ ސުންގަޑިއަކީ އޭޕްރިލް މަހުގެ ނިޔަލަށެވެ. މި ސްކީމްތަކުގައި މާލޭގެ ރަށްވެހިންނާއި މާލޭގައި ދިރިއުޅޭ އެހެން ރަށްރަށުގެ މީހުންނަށްވެސް ކުރިމަތިލެވޭނެ ކެޓަގަރީތައް ހިމެނެއެވެ. ފޯމު ހުށަހެޅުމުގެ ހުރިހާ ކަމެއް ކުރިއަށްދާނީ "ބޯހިޔާވަހިކަން" ހައުސިން ޕޯޓަލް މެދުވެރިކޮށެވެ.