ރާއްޖޭގެ ވައިގެ ސަރަހައްދަކީ ކޮބައިކަމާއި، އެ ސަރަހައްދުތަކުގައި ރާއްޖޭގެ ސިޔާދަތީ ބާރު ހިނގާނެ ގޮތްތަކާ ގުޅޭގޮތުން މިނިސްޓްރީ އޮފް ޑިފެންސްއިން މިއަދު ތަފްސީލީ މައުލޫމާތު ހާމަކޮށްފި އެވެ.

ޑިފެންސް މިނިސްޓްރީން ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ، ރާއްޖޭގެ ޗާޓުގައި ފާހަގަކޮށްފައި އެވަނީ ރާއްޖޭގެ ސިޔާދަތީ ބާރު ހިނގާ ވައިގެ ސަރަހައްދާއި ކަނޑުގެ ސަރަހައްދު ކަމަށެވެ. އެގޮތުން، ރާއްޖޭގެ ސިޔާދަތީ ބާރު ހިނގާ ސަރަހައްދަކަށް އެއްވެސް އުޅަނދެއް، ހާއްސަކޮށް ހަނގުރާމަމަތީ މަނަވަރެއް ވަންނަނަމަ، ދުރާލައި ހުއްދަ ހޯދަންޖެހޭނެ ކަމަށް އެ މިނިސްޓްރީން ވަނީ ހާމަކޮށްފަ އެވެ.

ގައުމެއްގެ ކަނޑާއި ވައިގެ ސަރަހައްދުގެ ގާނޫނީ ހަމަތައް ބަޔާންކޮށްދެމުން ޑިފެންސް މިނިސްޓްރީން ބުނީ، "ކޮންވެންޝަން އޮން އިންޓަނޭޝަނަލް ސިވިލް އޭވިއޭޝަން" (ޗިކާގޯ ކޮންވެންޝަން) ގައިވާ ގޮތުގެ މަތިން، ގައުމެއްގެ ސަރަހައްދީ ކަނޑާ ގުޅިފައިވާ ވައިގެ ސަރަހައްދަކީ އެ ގައުމެއްގެ ފުރިހަމަ ސިޔާދަތީ ބާރު ހިނގާ ސަރަހައްދެކެވެ. ރާއްޖޭގެ ސަރަހައްދީ ކަނޑުގެ ގޮތުގައި ބެލެވެނީ އައްސޭރިފަށުން ފެށިގެން 12 ނޯޓިކަލް މޭލާ ހަމައަށެވެ.

ޑިފެންސް މިނިސްޓްރީން އިތުރަށް ބުނެފައިވަނީ، އެ ބޭރުގައި އޮންނަ ވައިގެ ސަރަހައްދަކީ "އިންޓަނޭޝަނަލް އެއާސްޕޭސް" ކަމަށާއި، އެ ސަރަހައްދަށް ވަނުމަށް ވަކި ގައުމެއްގެ ހުއްދަ ހޯދަން ނުޖެހޭނެ ކަމަށެވެ. ނަމަވެސް، އެކި ގައުމުތަކަށް ކަނޑައަޅާފައިވާ "ފްލައިޓް އިންފޮމޭޝަން ރީޖަން" (އެފް.އައި.އާރު) ތެރޭގައި ހިމެނޭ ސަރަހައްދުތަކުގައި އެއާ ޓްރެފިކް ކޮންޓްރޯލްގެ ހިދުމަތް ފޯރުކޮށްދޭން ޖެހެ އެވެ.

މި ސަރަހައްދުތައް ކަނޑައެޅިފައިވާ އެންމެ މުހިންމު ބޭނުމަކީ ވައިގެ ދަތުރުފަތުރުގެ ސަލާމަތާއި ރައްކާތެރިކަން ކަށަވަރުކުރުން ކަމަށް މިނިސްޓްރީން ބުންޏެވެ. އަދި އިންޓަނޭޝަނަލް އެއާސްޕޭސްގެ ތެރޭގައި ހިމެނޭ ފްލައިޓް އިންފޮމޭޝަން ރީޖަންއަށް ވަނުމަށް ހުއްދަ ބޭނުން ނުވި ނަމަވެސް، އެފަދަ ދަތުރުތަކާ ބެހޭ މައުލޫމާތު އެއާ ޓްރެފިކް ކޮންޓްރޯލުން ދަނީ ބަރާބަރަށް ހޯދަމުންނެވެ.

އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަން (އައި.ކާއޯ) ގެ އުސޫލުތަކާއި ޗިކާގޯ ކޮންވެންޝަންގެ ދަށުން، ކޮންމެ ގައުމަކަށްމެ އެ ގައުމެއްގެ އެއްގަމާއި ސަރަހައްދީ ކަނޑުގެ މަތީގައިވާ ވައިގެ ސަރަހައްދުގެ މައްޗަށް ފުރިހަމަ އަދި މިނިވަން ސިޔާދަތީ ބާރު ލިބިގެންވެއެވެ. ޑިފެންސް މިނިސްޓްރީން މި މައުލޫމާތު އާންމުކޮށްފައި މިވަނީ، ރާއްޖޭގެ ސަރަހައްދީ ރައްކާތެރިކަމާއި ސިޔާދަތީ ބާރުތަކާ ގުޅޭގޮތުން އާންމުން ހޭލުންތެރިކުރުވުމުގެ މަގުސަދުގަ އެވެ.