އުސޫލުން ބޭރުން ބަރުދަން ލުއިކުރާ ބޭސް ބޭނުން ނުކުރުމަށް އިންޑިއާގެ ހެލްތު މިނިސްޓްރީން އިންޒާރު ދީފި އެވެ. އިންޑިއާއަކީ ދުނިޔޭގައި އެންމެ ގިނައިން ޖެނެރިކް ބޭސް އުފައްދާ ގައުމަށް ވާއިރު، މިއީ ދިވެހިންވެސް ބޭސްފަރުވާއަށް އެންމެ ގިނައިން ގޮސް އުޅޭ ގައުމެވެ.
އިންޑިއާގެ ހެލްތު މިނިސްޓްރީން މިފަދަ އިންޒާރެއް ދީފައިވަނީ ބަރުދަން ލުއިކުރުމަށް މަގުބޫލު ބޭސްތަކެއް ކަމަށްވާ "އޮޒެމްޕިކް" އަދި "ވީގޯވީ" ފަދަ ބޭސްތަކުގައި ހިމެނޭ "ސެމަގްލޫޓައިޑް" މާއްދާގެ ޕޭޓަންޓް މި މަހުގެ 20 ވަނަ ދުވަހު ހަމަވުމާ ގުޅިގެންނެވެ. މިއީ ލޭގައި ހަކުރު ހުންނަ މިންވަރާއި ކާހިތްވުން ކޮންޓްރޯލްކޮށްދޭ ހޯމޯންއަކަށް ނިސްބަތްވާ "GLP-1" މާއްދާ އެކުލެވޭ ބޭސްތަކެކެވެ.
މި ފަހަކަށް އައިސް GLP-1 އެކުލެވޭ ގިނަ އަދަދެއްގެ ޖެނެރިކް ބޭސްތައް ބާޒާރަށް ތައާރަފްވުމާއެކު، މި ބޭސްތަކަށް އޮތް ޑިމާންޑް ވަނީ އިންތިހާއަށް އުފުލިފަ އެވެ. އިންޑިއާގެ ހެލްތު މިނިސްޓްރީން ބުނި ގޮތުގައި، އާންމު ފާމަސީތަކާއި، އޮންލައިން ޕްލެޓްފޯމްތަކުގެ އިތުރުން ވެލްނަސް ކްލިނިކްތަކުން ބޭނުން އިރަކު މި ބޭސްތައް ލިބެން ހުރުމަކީ ބޮޑު ކަންބޮޑުވުމެކެވެ.
އިންޑިއާއިން އުފައްދާ މިފަދަ ބޭސްތަކަކީ ދުނިޔެއަށް ދިމާވެފައިވާ ފަލަވުމުގެ ނުވަތަ އޮބޭސިޓީގެ މައްސަލައަށް އިންގިލާބީ ބަދަލެއް ގެންނާނެ ބޭސްތަކެއް ކަމަށް ބެލެވުނު ނަމަވެސް، ޑޮކްޓަރެއްގެ ލަފާގެ މަތިން ނޫނީ މި ބޭސްތައް ބޭނުންކުރުމަކީ ސިއްހީ ގޮތުން ބޮޑެތި ގެއްލުންތަކެއް ލިބިދާނެ ކަމެކެވެ. އެހެންކަމުން، މިފަދަ ބޭސްތައް ވިއްކޭނީ ހަމައެކަނި ޑޮކްޓަރުގެ ބޭސްސިޓީއަށް އެކަނި ކަމަށް އިންޑިއާ ސަރުކާރުން ވަނީ ކަނޑައަޅާފަ އެވެ.
މީގެ އިތުރުން، އިންޑިއާ ސަރުކާރުން އަންނަނީ މިކަން ހުއްޓުވުމަށް ހަރުކަށި ފިޔަވަޅުތަކެއް އަޅަމުންނެވެ. އެގޮތުން ކަސްޓަމަރުންނަށް އޮޅޭ ފަދަ ގޮތްގޮތަށް ބޭސް އިޝްތިހާރުކުރާ ފަރާތްތަކާއި، ކަނޑައެޅިފައިވާ ބޭނުން ނޫން އެހެން ކަންކަމަށް ބޭސް ބޭނުންކުރުމަށް ހިތްވަރުދޭ ކުންފުނިތައް ބޮޑު އަދަދުން ޖޫރިމަނާކޮށް، އެފަދަ ކަންކަން މަނާކުރުމުގެ މަސައްކަތް ދަނީ ކުރަމުންނެވެ. ބަރުދަން ލުއިކުރުމަކީ ގިނަ އަދަދެއްގެ ދިވެހިންވެސް މިހާރު އިހުތިޔާރު ކުރަމުންދާ ވަސީލަތަކަށް ވާތީ، މިފަދަ ބޭސްތައް ބޭނުންކުރުމުގައި ސަމާލުވުމަކީ މުހިންމު ކަމެކެވެ.
