ނުކުޅެދުންތެރިކަން ހުންނަ ފަރާތްތަކަށް ބޯހިޔާވެހިކަން ފޯރުކޮށްދިނުމަށް ސަރުކާރުން ކުރިއަށްގެންދާ ހާއްސަ ސިޔާސަތުގެ ދަށުން، ފްލެޓަށް އެދި ފޯމު ހުށަހެޅުމުގެ ފުރުސަތު އަންނަ މަހުން ފެށިގެން ހުޅުވާލުމަށް ހައުސިން މިނިސްޓްރީން ނިންމައިފި އެވެ.

ހައުސިން މިނިސްޓްރީން ކުރި އިއުލާނެއްގައި ބުނެފައިވަނީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އާއިލީ ބޯހިޔާވަހިކަމުގެ ސިޔާސަތުގެ ދަށުން "ނުކުޅެދުންތެރިކަން ހުންނަ ފަރާތްތަކުގެ ކެޓަގަރީ" އަށް ފޯމު ހުށަހެޅުން ފަށާނީ އަންނަ މަހުގެ ފުރަތަމަ ދުވަހުގެ ހެނދުނު 11:00 އިން ފެށިގެން ކަމަށެވެ. ކުރިން މި ފުރުސަތު މާދަމާ ހުޅުވާލުމަށް ނިންމާފައި އޮތް ނަމަވެސް، މިހާރު މިވަނީ އަންނަ މަހަށް ފަސްކޮށްފަ އެވެ.

މި ކެޓަގަރީގެ ދަށުން ބޯހިޔާވެހިކަމަށް އެދި ކުރިމަތިލާ ފަރާތްތަކުން ފޯމު ހުށަހަޅަންޖެހޭނީ ހައުސިން މިނިސްޓްރީގެ ޕޯޓަލް މެދުވެރިކޮށެވެ.

މި ސަރުކާރުން ވަނީ ނުކުޅެދުންތެރިކަން ހުންނަ ފަރާތްތަކަށް ލުއިފަސޭހަކޮށްދިނުމުގެ ގޮތުން ބޯހިޔާވަހިކަމުގެ އުސޫލަށް ބަދަލުތަކެއް ގެނެސްފަ އެވެ. އެގޮތުން، އާންމު ފަރާތްތަކަށް ބޯހިޔާވަހިކަމަށް ޝަރުތު ހަމަވަނީ މާލެ ސަރަހައްދުގައި މެދުނުކެނޑި 15 އަހަރު ދިރިއުޅެފައިވާނަމަ ކަމަށްވީ ނަމަވެސް، ނުކުޅެދުންތެރިކަން ހުންނަ ފަރާތްތަކަށް މި މުއްދަތު ވަނީ 5 އަހަރަށް ކުޑަކޮށްދީފަ އެވެ.

މީގެ އިތުރުން، އެމީހެއްގެ ހުރި ނުކުޅެދުންތެރިކަމުގެ ސަބަބުން މާލެއިން ހިދުމަތް ހޯދަން ދަތުރުކުރަންޖެހޭ ފަރާތްތަކާއި، އެފަދަ ހިދުމަތްތައް ހޯދުމަށްޓަކައި މާލެއަށް ދިރިއުޅުން ބަދަލުކޮށްފައިވާ ފަރާތްތަކަށްވެސް މި ކެޓަގަރީގެ ދަށުން ކުރިމަތިލުމުގެ ފުރުސަތު އޮންނާނެ ކަމަށް އައު އުސޫލުގައި ބަޔާންކޮށްފައިވެ އެވެ.

މި ބަދަލަކީ ނުކުޅެދުންތެރިކަން ހުންނަ ފަރާތްތަކަށް ދިމާވެފައިވާ ބޯހިޔާވަހިކަމުގެ މައްސަލަތަކަށް ހައްލެއް ހޯދައިދީ، އެފަރާތްތަކަށް އަބުރުވެރި ދިރިއުޅުމެއް ހޯދައިދިނުމަށް ސަރުކާރުން ކުރަމުންދާ މަސައްކަތުގެ ބައެއް ކަމަށް ހައުސިންގ މިނިސްޓްރީން ފާހަގަކުރެ އެވެ.