ކައްކާ ގޭހުގެ އައު ޝިޕްމަންޓެއް ލިބުމާ ގުޅިގެން، ގޭސް ފޯރުކޮށްދިނުމުގައި ދިމާވި ދަތިތަކަށް ހައްލެއް ލިބިފައިވާ ކަމަށް އެސްޓީއޯއިން ހާމަކޮށްފި އެވެ.

އެސްޓީއޯއިން ބުނި ގޮތުގައި، އަލަށް ލިބުނު ޝިޕްމަންޓާއެކު މޯލްޑިވްސް ގޭސް މެދުވެރިކޮށް 10 ކިލޯގެ ގޭސް ފުޅި މިހާރު އެއްވެސް ދަތިކަމެއް ނެތި ލިބޭނެ އިންތިޒާމު ވަނީ ހަމަޖެހިފަ އެވެ. އަދި ރާއްޖެއަށް ބޭނުންވާ މިންވަރަށް މިވަގުތު ގޭހުގެ ސްޓޮކް ހުރިކަމަށާއި، އާންމުންނަށް މެދުކެނޑުމެއް ނެތި ހިދުމަތް ފޯރުކޮށްދިނުމަށް ބާރުއަޅަމުންދާ ކަމަށްވެސް އެ ކުންފުނިން ބުނެފައިވެ އެވެ.

ވޭތުވެދިޔަ މަހާއި މި މަހުގެ ތެރޭގައި ގޭހުގެ ޝިޕްމަންޓް ލިބުން ލަސްވުމުގެ ސަބަބުން، މާލެއާއި އަތޮޅުތެރޭގެ ރަށްރަށަށް ގޭސް ފޯރުކޮށްދިނުމުގައި ބޮޑެތި ގޮންޖެހުންތަކެއް ކުރިމަތިވި އެވެ. މިކަމުގެ ސަބަބުން ގޭސް އޯޑަރުކުރުމަށްފަހު ޑެލިވަރީ ލިބުމުގައި ގިނަ ވަގުތުތަކެއް ހޭދަވާތީ އާންމުންގެ ޝަކުވާތައް ވަރަށް ބޮޑަށް އިތުރުވެގެން ދިޔައެވެ. ނަމަވެސް، އައު ޝިޕްމަންޓާއެކު ޑެލިވަރީގެ ހިދުމަތްތައް ކުރިއެކޭ އެއްފަދައިން އަވަސްވެގެންދާނެ ކަމަށް އެސްޓީއޯއިން ބުނެ އެވެ.

މި ދަތިކަން ކުރިމަތިވާން މެދުވެރިވީ ބައިނަލްއަގުވާމީ ބާޒާރުގައި، ހާއްސަކޮށް މެދުއިރުމަތީގެ ހަނގުރާމައާ ގުޅިގެން ތެލާއި ގޭހުގެ ސަޕްލައިއަށް އައި ބަދަލުތަކުގެ ސަބަބުންނެވެ. ސަޕްލައި ޗޭނަށް ދަތިތަކެއް ކުރިމަތިވި ނަމަވެސް، ސްޓޮކް އެއްކޮށް ހުސްވިޔަ ނުދިނުމަށްޓަކައި މޯލްޑިވް ގޭސްއިން ވަނީ ވަގުތީ ފިޔަވަޅުތަކެއް އަޅާފައެވެ. އޭގެ ތެރޭގައި 10 ކިލޯގެ ފުޅިއަށް 5 ކިލޯ ގޭސް އަޅައިގެން 100 ރުފިޔާއަށް ވިއްކުމާއި، އައު ކަސްޓަމަރުންނަށް ގޭސް ދޫކުރުން ވަގުތީ ގޮތުން މެދުކަނޑާލުން ހިމެނެ އެވެ.

އެސްޓީއޯއިން ފާހަގަކުރި ގޮތުގައި، މި ފިޔަވަޅުތަކަކީ ދަތި ދަނޑިވަޅުގައި ހުރިހާ ރައްޔިތުންނަށް ހަމަހަމަކަމާއެކު ގޭސް ފޯރުކޮށްދިނުމަށްޓަކައި އެޅި މުހިންމު ފިޔަވަޅުތަކެކެވެ.