މާލެ، ދިވެހިރާއްޖެ: ސަރުކާރުގެ ހަރަދުތައް ކުޑަކުރުމަށް އަޅާ ފިޔަވަޅުތަކުގެ ސަބަބުން ރައްޔިތުން އުފުލަންޖެހޭ ތަކުލީފުތައް ވީހާވެސް ކުޑަވާނެ ގޮތަކަށް ކަންކަން ބައްޓަންކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ރައީސް ވިދާޅުވީ، ދުނިޔޭގައި ހިނގަމުންދާ ހަނގުރާމަތަކާއެކުވެސް، އިގްތިސާދީ ގޮތުން އެހެން ބައެއް ގައުމުތަކާ އަޅާކިޔާއިރު ރާއްޖޭގެ ހާލަތު ވަރަށް ރަނގަޅު ކަމަށެވެ. އެގޮތުން، މިދިޔަ މާޗު މަހުގެ 18 ވަނަ ދުވަހާ ހަމައަށް ރާއްޖޭގެ ގްރޮސް ރިޒާވްގައި 1.2 ބިލިއަނަށްވުރެ ގިނަ ޑޮލަރު ހުރިކަމަށާއި، ޔޫޒަބަލް ރިޒާވްގައި 300 މިލިއަނަށްވުރެ ގިނަ ޑޮލަރު ހުރިކަން ރައީސް ފާހަގަކުރެއްވިއެވެ.
"އާމްދަނީ ލިބޭ ގޮތްތަކާއި އާމްދަނީ މަދުވަމުންދާ އަދަދަށް ކޮމްޕެންސޭޓް ކުރަންޖެހޭ ގޮތްތަކާ، މި ހުރިހާ ކަންކަމަށް އަޅުގަނޑުމެން މިދަނީ ހިސާބު ޖަހަމުން،" ރައީސް ވިދާޅުވިއެވެ.
Advertisement
ރައީސް އިތުރަށް ވިދާޅުވީ، ހަރަދު ކުޑަކުރުމަށްޓަކައި ގެންނަ ކޮންމެ ބަދަލަކީ "މީނިންގްފުލް" ނުވަތަ އިގްތިސާދަށް ބޮޑު ބަދަލެއް އަންނާނެ ފަދަ ބަދަލަކަށް ވާންޖެހޭނެ ކަމަށެވެ. މިގޮތުން، ސަރުކާރުގެ އޮފީސްތަކުގެ މަސައްކަތު ގަޑިތައް ނުވަތަ ހިންގާ ދުވަސްތައް މަދުކޮށްގެން ހަރަދު ކުޑަކުރެވޭނެ މިންވަރާ ގުޅޭގޮތުން ފިނޭންސް މިނިސްޓްރީން ދިރާސާއެއް ކުރަމުންދާ ކަމަށާއި، އެ ދިރާސާއަށް ބަލައި ގެންނަންޖެހޭ ބަދަލުތައް ގެންނަވާނެ ކަމަށް ރައީސް ވިދާޅުވިއެވެ. ނަމަވެސް، ސަރުކާރުގެ ބޮޑު އަމާޒަކީ ކުދިކުދި ކަންކަމުގެ ބަދަލުގައި، ހަރަދު ސަލާމަތްކުރުމުގައި އެންމެ ބޮޑު "އިމްޕެކްޓް" އެއް ނުވަތަ ނަތީޖާއެއް ނެރެވޭނެ ފަދަ ބަދަލުތައް ގެނައުން ކަމަށް އެމަނިކުފާނު ވިދާޅުވިއެވެ.
ހަރަދު ކުޑަކުރުމަކީ މި ސަރުކާރުގެ މުހިންމު ސިޔާސަތެއްކަން ފާހަގަކުރައްވަމުން ރައީސް ވިދާޅުވީ، ސަރުކާރުގެ ފަރާތުން ބޭރު ގައުމުތަކަށް ކުރާ ރަސްމީ ދަތުރުތަކާއި އެތެރޭގެ ދަތުރުތަކުގެ ހަރަދުތައް މިހާރުވެސް ވަރަށް ބޮޑަށް ކުޑަކޮށްފައިވާ ކަމަށެވެ. އަދި ސިޔާސީ މަގާމުތަކުގައި ތިއްބެވި ފަރާތްތަކުގެ މުސާރަ ކުޑަކުރި ގޮތަށް އެކަން އެގޮތުގައި ދެމިއޮތްކަމަށާއި، ރައީސުލްޖުމްހޫރިއްޔާގެ މުސާރައިން 50 އިންސައްތަ އުނިކުރެއްވުމަކީވެސް ހަރަދު ކުޑަކުރުމަށް ސަރުކާރުން އިސްކަންދޭ މިންވަރު ހާމަވާ ކަމެއް ކަމަށް ރައީސް ވިދާޅުވިއެވެ.
ރައީސް ވިދާޅުވީ، އިގްތިސާދީ ހަމަޖެހުމަށްޓަކައި ހަރަދު ކުޑަކުރަން ކުރަންޖެހޭ ކޮންމެ ކަމެއް ސަރުކާރުން ކުރާނެ ކަމަށާއި، އެހެންނަމަވެސް އެ ހުރިހާ ފިޔަވަޅެއްވެސް އަޅުއްވާނީ ރައްޔިތުންނަށް އޭގެ ސަބަބުން ކުރިމަތިވާނެ ދަތިތައް ވީހާވެސް ކުޑަވާނެ ގޮތެއް ބައްލަވައިގެން ކަމަށެވެ.
