މަރުގެ ހުކުމް ތަންފީޒުކުރުމާ ބެހޭ ހާއްސަ ބިލު، ރައްޔިތުންގެ މަޖިލީހުގެ މިހާރު ހިނގަމުންދާ ދައުރުގެ ތެރޭގައި ހުށަހަޅުއްވާނޭކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނު ކުރައްވައިފިއެވެ.
ރައީސުލްޖުމްހޫރިއްޔާ މިކަން ހާމަކުރެއްވީ މިއަދު ރައީސް އޮފީހުގައި ނޫސްވެރިންނާ ބައްދަލުކުރައްވައި ދެއްކެވި ވާހަކަފުޅުގައެވެ. މި ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، މަރުގެ ހުކުމުގެ ހުރިހާ މަރުހަލާއެއް ފުރިހަމަކޮށްފައިވާ ފަރާތަކަށް އެ އަދަބު ނުދީ ބެހެއްޓުމަކީ، ސައްތައިން ސައްތަ އިސްލާމީ ދައުލަތެއްގެ އެންމެ މަތީ ވެރިއަކަށް އޮތް އިހުތިޔާރެއް ނޫން ކަމަށެވެ.
ސަރުކާރުގެ ސިޔާސަތަކީ މަރުގެ ހުކުމް ތަންފީޒުކުރުމުގެ ކަންކަން ގާނޫނީ އޮނިގަނޑުގެ ތެރެއިން ހަރުދަނާކޮށް (ސްޓްރީމްލައިންކޮށް) ކަށަވަރުކުރުން ކަމަށް ރައީސް ފާހަގަކުރެއްވިއެވެ. އަދި ރައްޔިތުންގެ މަޖިލީހުން މި ބިލު ފާސްކޮށް، ރައީސުލްޖުމްހޫރިއްޔާ ބިލު ތަސްދީގުކުރެއްވުމާއެކު، ޝަރުއީ ހުރިހާ މަރުހަލާއެއް ފުރިހަމަވެފައިވާ ފަރާތްތަކުގެ މައްޗަށް މި ސަރުކާރުން މަރުގެ އަދަބު ތަންފީޒުކުރަން ފަށާނެ ކަމުގެ ޔަގީންކަން އެމަނިކުފާނު ދެއްވިއެވެ.
Advertisement
ރައީސުލްޖުމްހޫރިއްޔާ އިތުރަށް ވިދާޅުވީ، މަރުގެ ހުކުމް ތަންފީޒުކުރުމަކީ އިސްލާމީ ގައުމެއްގެ ހައިސިއްޔަތުން ރާއްޖޭގައި އަދުލުއިންސާފާއި، އިޖުތިމާއީ އަދާލަތު ގާއިމުކުރުމަށްޓަކައި ކޮންމެހެން ކުރަންޖެހޭ ކަމެއް ކަމުގައި ދެކިވަޑައިގަންނަވާ ކަމަށެވެ.
މި ބިލު މަޖިލީހަށް ހުށަހެޅުމަށް ސަރުކާރުން ތައްޔާރުވަމުންދާއިރު، މިއީ ރާއްޖޭގައި ގިނަ ދުވަސްތަކެއް ވަންދެން މަރުގެ އަދަބު ތަންފީޒުނުކޮށް އޮތް އޮތުމަށް ނިމުމެއް ގެނައުމަށް އެޅޭ މުހިންމު ފިޔަވަޅެކެވެ.
