ދިވެހިރާއްޖޭގެ ހަކަތައިގެ ރައްކާތެރިކަން ކަށަވަރުކުރުމަށްޓަކައި ގައުމީ ފެންވަރުގެ ތެޔޮ ރިޒާވެއް ގާއިމްކުރުމަށް ސަރުކާރުން ނިންމަވާފައިވާ ކަމަށާއި، މި މަޝްރޫއަށް ގާތްގަނޑަކަށް 150 މިލިއަން ޑޮލަރު ހަރަދުވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، ތެލުގެ ރިޒާވް ގާއިމްކުރުމަށް ހަމަޖެހިފައިވަނީ އެކި ފޭސްތަކަކަށް ބަހާލައިގެން ރާއްޖޭގެ ތިން ސަރަހައްދެއްގައި ކަމަށެވެ. މި މަޝްރޫއުގެ ކޮންމެ ފޭސްއެއް ނިންމުމަށް ގާތްގަނޑަކަށް ދޮޅު އަހަރު ނުވަތަ ދެ އަހަރު ދުވަސް ހޭދަވާނެ ކަމަށް އަންދާޒާކުރެވޭއިރު، މުޅި މަޝްރޫއު ހަތަރު އަހަރު ބައި ނުވަތަ ފަސް އަހަރު ދުވަހުގެ ތެރޭގައި ނިންމުމަކީ ސަރުކާރުގެ އަމާޒެކެވެ.
ރައީސް ވިދާޅުވި ގޮތުގައި މިފަދަ ނިންމުމެއް ނިންމަން ޖެހުނު މައިގަނޑު ސަބަބަކީ ރާއްޖެއަކީ ތެލަށް އިންތިހާއަށް ބަރޯސާވާ ގައުމަކަށް ވުމެވެ.
Advertisement
"އޮއިލް ރިޒާވް އެއް ގާއިމްކުރުމަށްޓަކައި ކޮންމެ ގޮތެއް ވިޔަސް މަސައްކަތްތަކެއް ކުރުމަކީ އަޅުގަނޑުމެންނަށް ވަރަށް މުހިންމު ކަމެއް. ސޮވެރިން ޑިވެލޮޕްމަންޓު ފަންޑު ކަހަލަ ކަމެއް.. އެހެން ނަމަވެސް އެއީ ނެޝަނަލް ތެޔޮ ރިޒާވެއް. އޭގެން އަޅުގަނޑުމެންނަށް ކުރާނެ ފައިދާތައް ވަރަށް ބޮޑު،" ރައީސް ވިދާޅުވިއެވެ.
މި މަޝްރޫއަށް ހަރަދުވާނެ ކަމަށް ބެލެވޭ 150 މިލިއަން ޑޮލަރުގެ އިންވެސްޓްމަންޓާ ގުޅޭގޮތުން ވާހަކަފުޅު ދައްކަވަމުން ރައީސް އިތުރަށް ވިދާޅުވީ، މި މަސައްކަތް ކުރިއަށް ގެންދާއިރު ދެމެހެއްޓެނިވި ގޮތެއްގައި (ސަސްޓެއިނިބިލިޓީ) ކަންކަން ކުރެވޭނެ އިންތިޒާމުތަކަށް ބައްލަވާނެ ކަމަށެވެ. އަދި މިކަމަށްޓަކައި ކުރަންޖެހޭ ދިރާސާތައް މިހާރުވެސް ކުރިއަށްދާ ކަމަށާއި، ކުރިއަށް އޮތް ތަނުގައި މި މަޝްރޫއުގެ އިތުރު ތަފްސީލުތައް މީޑިއާއާ ހިއްސާކުރައްވާނެ ކަމަށްވެސް ރައީސް ވިދާޅުވިއެވެ.
މީގެ އިތުރުން، ރާއްޖޭގެ މާލީ ހާލަތާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ ރާއްޖޭގެ ރިޒާވް މީގެ ކުރިން ގެންދެވިފައި ނުވާ ވަރަށް މިހާރު މަތިކުރެވިފައިވާ ކަމަށެވެ. އެގޮތުން ރަސްމީ ރިޒާވް މިހާރު 1.2 ބިލިއަން ޑޮލަރަށްވުރެ މަތީގައި ހުރިއިރު، ބޭނުންކުރެވޭ ރިޒާވް ނުވަތަ ޔޫޒަބަލް ރިޒާވް 300 މިލިއަން ޑޮލަރަށްވުރެ މަތީގައި ހިފެހެއްޓެމުންދާކަން ރައީސް ފާހަގަކުރެއްވިއެވެ.
