ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ފަރާތުން ކުރިއަށްގެންދާ ސިލްސިލާ "ދޮރުން ދޮރަށް" ހަރަކާތުގެ ތެރެއިން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ހެންވޭރު ދެކުނު ދާއިރާގެ ރައްޔިތުންނާ ބައްދަލުކުރައްވައިފި އެވެ.
ކުރިއަށް އޮތް ލޯކަލް ކައުންސިލް އިންތިހާބާ ދިމާކޮށް ސަރުކާރު ހިންގާ މައި ޕާޓީން ފަށާފައިވާ މި ހަރަކާތުގައި ރައީސް މުއިއްޒު މިއަދު ބައިވެރިވެވަޑައިގެންފައިވާއިރު، މިއީ މި ސިލްސިލާގެ ތެރެއިން އެމަނިކުފާނު ބައިވެރިވެވަޑައިގެންނެވި 22 ވަނަ ހަރަކާތެވެ. މީގެކުރިން ރައީސް ވަނީ މާލެ ސަރަހައްދުގެ 17 ދާއިރާއެއްގެ ދޮރުން ދޮރަށް ހަރަކާތްތަކުގައި ބައިވެރިވެވަޑައިގެން، އާންމު ރައްޔިތުންގެ ހާލަތު ގާތުން ބައްލަވާލައްވާފަ އެވެ.
ހެންވޭރު ދެކުނު ދާއިރާގެ ގޭގެއަށް ޒިޔާރަތްކުރައްވައި، ރައީސް ވަނީ އެ ދާއިރާގެ ރައްޔިތުންގެ ހުރި ކަންބޮޑުވުންތަކާއި އުންމީދުތައް އަޑުއައްސަވާފަ އެވެ. މި ހަރަކާތުގެ ތެރެއިން ރައީސަށް އާންމުންގެ ފަރާތުން ވަރަށް ހޫނު މަރުހަބާއަކާއި ބޮޑު ތަރުހީބެއް ލިބިފައިވާކަން ފާހަގަކުރެވެ އެވެ.
މިއަދުގެ ހަރަކާތުގައި ރައީސްގެ އަރިހުގައި މާލެ ސިޓީގެ ކުރީގެ މޭޔަރު ސަރަނގު އާދަމް މަނިކު ވެސް ބައިވެރިވެވަޑައިގެންނެވި އެވެ. ސަރަނގު އާދަމް މަނިކު މިއަދު ވަނީ ހެންވޭރު ދެކުނު ދާއިރާއަށް ޕީއެންސީގެ ފަރާތުން ވާދަކުރައްވާ ކެނޑިޑޭޓް މޫސާ އަލީ ޖަލީލަށް ތާއީދުކުރައްވައި، އެމަނިކުފާނު އެންޑޯޒް ކުރައްވާފަ އެވެ.
ކައުންސިލް އިންތިހާބަށް އަމާޒުކޮށް ޕީއެންސީން ކުރިއަށްގެންދާ މި ކެމްޕެއިން ހަރަކާތްތަކަކީ ރައްޔިތުންނާ ގާތުން މަސައްކަތްކުރުމަށް ރައީސް މުއިއްޒު ގެންގުޅުއްވާ ސިޔާސަތުގެ ދަށުން ކުރިއަށްދާ މުހިންމު ހަރަކާތްތަކެކެވެ.
