އެމެރިކާގެ ރައީސް ޑޮނަލްޑް ޓްރަމްޕް، އީރާނަށް ވަރުގަދަ އިންޒާރެއް ދެއްވައި، ހޮރްމޫޒް ކަނޑުއޮޅި ހުޅުވުމަށް 48 ގަޑިއިރުގެ މުހުލަތެއް ދީފި އެވެ. މި އިންޒާރު ދެއްވާފައިވަނީ އެމެރިކާއާއި އިޒްރޭލުން ގުޅިގެން އީރާނާ ދެކޮޅަށް ކުރަމުންދާ ހަނގުރާމައަށް ހަތަރު ހަފުތާ ވެފައިވަނިކޮށެވެ.
ޓްރަމްޕްގެ ސޯޝަލް މީޑިއާ ޕްލެޓްފޯމް "ޓްރޫތް ސޯޝަލް" ގައި ކުރި ޕޯސްޓެއްގައި ބުނީ، ކަނޑުއޮޅީގައި މިނިވަންކަމާއެކު ދަތުރުފަތުރު ކުރުމުގެ ފުރުސަތު 48 ގަޑިއިރުގެ ތެރޭގައި ފުރިހަމައަށް ހުޅުވާނުލައިފިނަމަ، އީރާނުގެ ކަރަންޓު އުފައްދާ މަރުކަޒުތަކަށް ހަމަލާދީ އެ ތަންތަން ސުންނާފަތިކޮށްލާނެ ކަމަށެވެ. އަދި އެންމެ ފުރަތަމަ ހަމަލާދޭނީ އެންމެ ބޮޑު މަރުކަޒަށް ކަމަށްވެސް ޓްރަމްޕް އިންޒާރު ދެއްވި އެވެ.
މި މައްސަލައާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލި، ހިއްސާގެ ބާޒާރުތަކަށް ވަނީ ބޮޑު ލޮޅުމެއް އަރާފަ އެވެ. އީރާނުން ބުނަމުންދަނީ "ދުޝްމަނުންގެ އުޅަނދުތަކަށް" ހޮރްމޫޒް ކަނޑުއޮޅި ބަންދުކުރާނެ ކަމަށެވެ. ނަމަވެސް، އެހެން ގައުމުތަކުގެ އުޅަނދުތަކަށް އެ ސަރަހައްދު އޮތީ ހުޅުވާލެވިފައި ކަމަށް އީރާނުގެ ފޮރިން މިނިސްޓަރު އައްބާސް އަރަގްޗީ ވަނީ ވިދާޅުވެފަ އެވެ.
Advertisement
ޓްރަމްޕްގެ މި އިންޒާރަށް ރައްދުދެމުން އީރާނުގެ އަސްކަރިއްޔާއިން ބުނީ، އީރާނުގެ ހަކަތައާ ބެހޭ އިންފްރާސްޓްރަކްޗަރަށް އެމެރިކާއިން ހަމަލާދީފިނަމަ، އެ ސަރަހައްދުގައި ހުރި އެމެރިކާގެ ހުރިހާ ހަކަތައިގެ ވަސީލަތްތަކަކަށް ހަމަލާދޭނެ ކަމަށެވެ.
ފާހަގަކޮށްލެވޭ ގޮތުގައި، ޓްރަމްޕް މި އިންޒާރު ދީފައިވަނީ ހަނގުރާމަ ނިންމާލުމާ ގާތްވެފައިވާ ކަމަށް ބުނިތާ އެންމެ ދުވަހެއް ފަހުންނެވެ. އަދި މިދިޔަ ހަފުތާގައި އެމެރިކާގެ އަސްކަރިއްޔާއިން ވަނީ އީރާނުގެ މިސައިލް އުފައްދާ ސަރަހައްދުތަކަށް ވަރުގަދަ ހަމަލާތަކެއް ދީ، އީރާނުގެ އަސްކަރީ ގާބިލްކަން ދަށްކޮށްލާފައިވާ ކަމަށް ބުނެފަ އެވެ.
