މާލެ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމެޓީ (އ.ތ.މ) ގެ ރައީސާގެ މަގާމަށް ކުރިމަތިލައްވާފައިވާ އާޝިޔަތު އަލައިކާ އަދުނާން، އޭނާ މި އިންތިހާބުގައި ވާދަކުރައްވަން ނިންމެވި ސަބަބުތައް ހާމަކުރައްވައިފި އެވެ.
އަލައިކާ ވިދާޅުވީ، އޭނާއަކީ ވެސް މާލޭގައި ދިރިއުޅެމުންދާ މީހަކަށްވެފައި، އާއިލީ ޒިންމާތައް އުފުލުމާއެކު ވަޒީފާގެ މާހައުލުގައި މަސައްކަތް ކުރަންޖެހިފައިވާ އަންހެނަކަށް ވާތީ، މާލޭގެ އާއިލާތަކުން ތަހައްމަލު ކުރަމުންދާ ދަތިތަކާއި ހާލަތު ވަރަށް ގާތުން އިހުސާސްކުރެވޭ ކަމަށެވެ. އަދި އ.ތ.މ ކޮމެޓީއަކީ ހަމައެކަނި ނަމެއްގައި އޮންނަންޖެހޭ ތަނެއް ކަމުގައި ގަބޫލުނުކުރައްވާ ކަމަށްވެސް އޭނާ ވިދާޅުވި އެވެ.
މި ކޮމެޓީއާ ގުޅޭގޮތުން ވާހަކަދައްކަވަމުން އަލައިކާ އިތުރަށް ވިދާޅުވީ، އޭނާގެ އަމާޒަކީ އ.ތ.މ ކޮމެޓީއަކީ އާއިލާތަކުގެ ދިފާއުގައި މަސައްކަތްކުރާ ވަރުގަދަ "އިންޖީނަކަށް" ހެއްދެވުން ކަމަށެވެ. އަދި އޭނާގެ ތައުލީމާއި ތަޖުރިބާގެ އަލީގައި، ސަރުކާރާއި މާލެ ސިޓީ ކައުންސިލާ ގުޅިގެން މާލޭގެ މުޖުތަމައަށް ބޮޑެތި ފައިދާތަކެއް ހޯދައިދެވޭނެ ކަމުގެ ފުރިހަމަ އުންމީދު އެބައޮތް ކަމަށްވެސް ވިދާޅުވި އެވެ.
ކެމްޕެއިން ހަރަކާތްތަކުގެ ތެރެއިން އަލައިކާ ފެނިގެންދަނީ ވަރަށް ހިތްވަރުގަދަ އަދި ކެރޭ ކަނބަލެއްގެ ގޮތުގަ އެވެ. އޭނާ އަންނަނީ މާލޭގެ ގިނަ ރައްޔިތުންނާ ބައްދަލުކޮށް، އެފަރާތްތަކުގެ ކަންބޮޑުވުންތައް އަޑުއަހަމުންނެވެ.
ކައުންސިލް އަދި އ.ތ.މ ކޮމެޓީގެ އިންތިހާބު ބޭއްވުމަށް ހަމަޖެހިފައިވަނީ އަންނަ އޭޕްރީލް މަހުގެ 4 ވަނަ ދުވަހުއެވެ. މި އިންތިހާބަކީ މާލޭގެ ތަރައްގީއާއި އަންހެނުންގެ ކުރިއެރުމަށް މުހިންމު ނިންމުންތަކެއް ނިންމާނެ އިންތިހާބެކެވެ.
