އިއްޔެއަކީ މެދުއިރުމަތީގެ ގައުމުތަކުގެ މެދުގައި ފާހަގަކުރާ މަންމައިންގެ ދުވަސް ކަމުގައި ވީނަމަވެސް، އިސްރާއީލުގެ އަނިޔާވެރި ހަމަލާތަކުގެ ސަބަބުން ސުންނާފަތިވެފައިވާ ޣައްޒާގައި މި ދުވަސް ފާހަގަކުރަން ޖެހިފައިވަނީ ނުހަނު ބޮޑު ހިތާމައާއި ކަރުނައިގެ ތެރޭގަ އެވެ.

އިސްރާއީލުން ޣައްޒާއަށް ދެމުންދާ ލާއިންސާނީ ހަމަލާތަކުގެ ސަބަބުން އެތައް ހާސް މަންމަޔަކަށް ވަނީ އެމީހުންގެ ދަރިން ގެއްލިފަ އެވެ. އަދި ހަމައެހެންމެ، އެތައް ކުޑަކުދިންނެއްގެ މަންމައިން ވަނީ މި ހަމަލާތަކުގައި ޝަހީދުވެފަ އެވެ. އާންމުކޮށް އުފާވެރިކަމާއެކު ފާހަގަކުރާ މި ދުވަހު، ޣައްޒާގެ މަގުތަކުންނާއި ހޮސްޕިޓަލްތަކުން ފެންނަނީ ކެތްނުކުރެވޭ ފަދަ ހިތްދަތި މަންޒަރުތަކެކެވެ.

ޣައްޒާގެ ހެލްތު މިނިސްޓްރީން ހާމަކޮށްފައިވާ ގޮތުގައި، އިސްރާއީލުގެ މި އުދުވާނުގައި މިހާތަނަށް އެތައް ހާސް އަންހެނުންނާއި ކުޑަކުދިން ވަނީ ޝަހީދުވެފަ އެވެ. މިއަދު ގިނަ މަންމައިން ވަގުތު ހޭދަކުރަމުން ދަނީ އެމީހުންގެ ޝަހީދުވި ދަރިންގެ ހަދާނުގައި ކަރުނަ އޮއްސުމުގަ އެވެ. އަދި ބައެއް ކުޑަކުދިން ވަނީ އެމީހުންގެ މަންމައިންގެ މަހާނަ ކައިރިއަށް ގޮސް، މާމެލާމެލީގެ ބަދަލުގައި ކަރުނައާއެކު ދުއާކުރުމުގައި ވަގުތު ހޭދަކޮށްފަ އެވެ.

އިސްރާއީލުން ޣައްޒާ ހިސާރުކޮށް، ކާބޯތަކެއްޗާއި ބޭސްފަރުވާއިން މަހުރޫމްކޮށްފައިވުމުގެ ސަބަބުން، ޣައްޒާގެ މަންމައިންނަށް ވަނީ އެމީހުންގެ ދަރިންނަށް ބޭނުންވާ އަސާސީ ހިދުމަތްތައް ފޯރުކޮށްދިނުމަށް ނުކުޅެދިފަ އެވެ. ބަނޑުހައިހޫނުކަމާއި ބަލިމަޑުކަމުގެ ބިރުވެރިކަމުގެ ތެރޭގައި ތިބި މި މަންމައިން ބުނަމުންދަނީ، އެމީހުންގެ ހަމައެކަނި އެދުމަކީ މި ލާއިންސާނީ ހަނގުރާމަ ހުއްޓި، އަމާންކަމާއެކު ދިރިއުޅެވޭނެ މަގެއް ފެނުން ކަމަށެވެ.

ދުނިޔޭގެ އެކި ކަންކޮޅުތަކުގައި މަންމައިންގެ ދުވަސް އެކި ތާރީހުތަކުގައި ފާހަގަކުރާއިރު ޣައްޒާގެ މަންމައިން ދުނިޔޭގެ ކިބައިން އާދޭސްކުރަމުންދަނީ އިސްރާއީލުގެ މި އަނިޔާވެރިކަން ހުއްޓުވައިދިނުމަށެވެ. މިއަދަކީ ޣައްޒާގެ މަންމައިންނަށް އުފާވެރި ދުވަހަކަށް ވުމުގެ ބަދަލުގައި، އެމީހުންގެ ގެއްލިފައިވާ ލޯބިވާ ދަރިންނާއި އާއިލާގެ މެންބަރުންގެ ހަނދާންތައް އައުކުރާ ހިތާމަވެރި ދުވަހެކެވެ.