ވ. ފެލިދޫ ކައިރިން ދަތުރު ކުރަނިކޮށް ތަންކޮޅެއް ބޮޑު ބާންޏެއްގައި ޖެހި މިދިޔަ ބުރާސްފަތި ދުވަހުގެ ރޭ ދަންވަރު ވިއްސައިގެން ދިޔަ ލޯންޗުން ގެއްލުނު އިންޑިއާގެ ދެ މީހުން ހޯދުމުގެ މަސައްކަތް ކުރަމުންދިޔަ ނަމަވެސް، އެ މީހުން އަދިވެސް ފެނިފައިނުވާ ކަމަށް ފުލުހުން މިއަދު ބުނެފިއެވެ.

ވ. ފެލިދޫ ހުޅަނގު ދެކުނުން ދެ ނޯޓިކަލް މޭލު ބޭރުން ދަތުރުކުރި އެ ލޯންޗުގައި ޖުމްލަ ހަތް މީހުން ތިއްބެވެ. އޭގެ ތެރޭގައި ހިމެނެނީ އިންޑިއާގެ ފަސް ފިރިހެނަކާއި، އިނގިރޭސި ވިލާތުގެ އަންހެނަކާއި ރަޝިއާގެ އަންހެނެކެވެ.

ބޮޑު ބާންޏެއްގައި ޖެހި ހިނގި މި ހާދިސާގައި ލޯންޗުން ވިއްސައިގެން ގޮސް މޫދަށް ފަސް މީހަކު ވެއްޓުނުއިރު، ގެއްލިގެން ހޯދަމުންދަނީ އޭގެ ތެރެއިން އިންޑިއާގެ ދެ މީހުންނެވެ. ގެއްލިގެން ހޯދަމުންދާ ދެ މީހުންގެ ތެރޭގައި އިންޑިއާގެ މޮޓޯ ސްޕޯޓްސްގައި މަޝްހޫރު ހަރީ ސިންގް ހިމެނޭ ކަމަށް މައުލޫމާތު ލިބެއެވެ.

މި ލޯންޗުގައި އިންޑިއާގެ ބިލިއަނަރު، ރޭމަންޑް ގުރޫޕްގެ ޗެއާމަން ގޯތަމް ސިންގްހާނިއާ ވެސް ދަތުރުކުރެއްވިއެވެ. އުމުރުން 60 އަހަރުގެ ގޯތަމްއަށް ފަރުވާ ދިނުމަށްފަހު މިހާރު ދޫކޮށްލާފައިވާ ކަމަށާއި، އޭނާ މިހާރު ހުންނެވީ މުމްބާއީގައި ކަމަށް ފުލުހުން މައުލޫމާތު ދެއެވެ. ވިއްސައިގެން ދިޔަ ލޯންޗަކީ ގޯތަމްގެ ލަގްޒަރީ ޔޮޓް "ޓީޓީ އަޝޭނާ" ގައި ބޭނުންކުރާ ލޯންޗެކެވެ.

ގޯތަމް ސިންގްހާނިއާ އަކީ އާންމުކޮށް ރާއްޖެއަށް ޗުއްޓީ ހޭދަކުރެއްވުމަށް ޒިޔާރަތްކުރައްވާ ބޭފުޅެކެވެ.