ގިރާވަރުފަޅު ބިން ހިއްކުމުގެ މަސައްކަތް އަންނަ އޭޕްރިލް މަހަށް ނިންމައި، ޖޫން މަހުގެ ތެރޭގައި އެތަނުން ގޯތި ދޫކުރަން ފެށޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިކަން ހާމަކުރެއްވީ ސޯޝަލް މީޑިއާގައި މިއަދު ހިއްސާކުރެއްވި ޕޯސްޓެއްގައެވެ. ރައީސް ވިދާޅުވީ ގިރާވަރުފަޅު ހިއްކުމުގެ މަސައްކަތް ކޮންމެ ދުވަހަކުވެސް ބާރު ދުވެލީގައި ކުރިއަށްދާ ކަމަށެވެ.

"މަސައްކަތް ކުރިއަށްދާ ގޮތަށް ބަލާއިރު އޭޕްރިލް މަހު މަސައްކަތް އެއްކޮށް ނިމި، ސާވޭ ކޮށް ނިންމައި ޖޫން މަހު ގޯތިތައް ހަވާލުކުރުމުގެ މަސައްކަތް ފެށޭނެ،" ރައީސް ވިދާޅުވިއެވެ.

މާލޭ ރައްޔިތުންނަށް ގޯތި ދޫކުރުމަށް ހަމަޖެހިފައިވާ ގިރާވަރުފަޅުން ޖުމުލަ 167.15 ހެކްޓަރު ހިއްކުމަށް ވަނީ ހަމަޖެހިފައެވެ. އޭގެ ތެރެއިން އެމްއޭސީއެލްއިން މިދިޔަ ޖެނުއަރީ މަހު ހިއްކަން ފަށާފައިވަނީ ނުހިއްކާ އޮތް 97.15 ހެކްޓަރުގެ ބިމެވެ. މިހާތަނަށް ތިން ފިޔަވައްސަކަށް ބަހާލައިގެން ބޮޑު ސަރަހައްދެއް ވަނީ ހިއްކާ ނިންމާފައެވެ

ގިރާވަރުފަޅުގެ މަސައްކަތް ކުރިއަށްދާއިރު، އެތަނުގެ އާ ލޭންޑް ޔޫސް ޕްލޭނެއް މިހާރު ވަނީ އެކުލަވާލާފައެވެ. ކުރީގެ ސަރުކާރުން މިތަނުގެ ޕްލޭން އެކުލަވާލާފައިވަނީ އަސާސީ ހިދުމަތްތަކަށް ބޭނުންވާ ޖާގަ ނުހިމަނައި ކަމަށްވާތީ، މި ސަރުކާރުން ވަނީ ޕްލޭނަށް ބަދަލު ގެނެސް، އިތުރު 113 ހެކްޓަރު ހިއްކުމަށް ނިންމާފައެވެ. ލޭންޑް ޔޫސް ޕްލޭނަށް ގެނައި ބަދަލާ ގުޅިގެން ގޯތި ލިބުނު ފަރާތްތަކުގެ މެދުގައި އަލުން ގުރުއަތުލުންވެސް ވަނީ ބާއްވާފައެވެ.

ގިރާވަރުފަޅުން ޖުމުލަ 4,072 ގޯތި ދޫކުރުމަށް ވަނީ ހަމަޖެހިފައެވެ. އޭގެ ތެރޭގައި ހިމެނެނީ:

1. 1250 އަކަފޫޓުގެ 2605 ގޯތި
2. 1650 އަކަފޫޓުގެ 1213 ގޯތި
3. 2050 އަކަފޫޓުގެ 253 ގޯތި
4. 2450 އަކަފޫޓުގެ 1 ގޯތި

ސަރުކާރުން އަންނަނީ މާލެ ސަރަހައްދުގެ ބޯހިޔާވަހިކަމުގެ މައްސަލަ ހައްލުކުރުމަށްޓަކައި ގިރާވަރުފަޅުގެ އިތުރުން ހުޅުމާލެ ފޭސް 3 އަދި ރަސްމާލެ ހިއްކުމުގެ މަސައްކަތްވެސް ބާރު ދުވެލީގައި ކުރިއަށް ގެންދަމުންނެވެ.