އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ހަންގޭރީ އަށް އައިސްފި ނަމަ އޭނާ ހައްޔަރު ކުރުމަށް ހަންގޭރީގެ ހިއުމަން ރައިޓްސް ވޮޗުން އެ ޤައުމުގެ ސަރުކާރުގައި އެދިއްޖެއެވެ. އޭނާ ހައްޔަރު ކުރުމަށް އެ ޤައުމުގެ ޖަމިއްޔާ ޖަމާޢަތްތަކުން ގޮވާލާފައި ވާއިރު، ހަންގޭރީ އަކީ 2001 ވަނަ އަހަރުން ފެށިގެން ބައިނަލް އަޤްވާމީ ކްރިމިނަލް ކޯޓް (އައިސީސީ)ގެ މެންބަރު ޤައުމެކެވެ. ނަމަވެސް އެ ޤައުމުން މިހާފު ގެންދަނީ އައިސީސީން ވަކިވުމުގެ މަސައްކަތް ކުރަމުންނެވެ.
ހިއުމަން ރައިޓްސް ވޮޗުން ބުނާ ގޮތުގައި ނަތަންޔާހޫ ހަންގޭރީ އަށް ދިޔުމަށް އޮތީ ޝެޑިއުލް ކޮށްފައެވެ. ފަހަރުގައި މިއަދުގެ ވަގުތެއްގައި އޭނާ ހަންގޭރީ އަށް ގޮސްދާނެ ކަމަށް ޚަބަރު ލިބެއެވެ. ނަމަވެސް ބައިނަލްއަގުވާމީ މަޝްހޫރު އެއްވެސް މީޑިއާ އަކުން ނަތަންޔާހޫ ހަންގޭރީ އަށް ދާން އުޅޭ ވާހަކަ ރިޕޯޓު ކޮށްފައެއް ނެތެވެ.
ހަންގޭރީއަކީ އަދިވެސް އައިސީސީބެ މެމްބަރު ޤައުމެއް ކަމަށް ވާއިރު، އައިސީސީ އިން ވަނީ އޭނާ ހައްޔަރު ކުރުމަށް އަމުރެއް ވެސް ނެރެފައެވެ. ހަންގޭރީގެ ޖަމިއްޔާ ޖަމާޢަތްތަކުން އެ ޤައުމުގެ ސަރުކާރަށް ގޮވައިލީ ނަތަންޔާހޫ އަކީ ކޯޓުން ހޯދަން ބޭނުންވާ ފަރާތެއް ކަމަށާއި، ހަންގޭރީގެ “ސަރުކާރަށް އޭނާ ހައްޔަރުކުރުން ލާޒިމުވާނެ” ކަމަށެވެ.
Advertisement
ނަތަންޔާހޫ ހައްޔަރުކުރުމަށް އަމުރު ނެރެފައި ވަނީ 2023 ވަނަ އަހަރުގެ އޮކްޓޯބަރު މަހުން ފެށިގެން ޣައްޒާގައި ހިންގާފައިވާ އިންސާނިއްޔަތާއި ހިލާފު ޖަރީމާތަކާއި ހަނގުރާމައިގެ ޖަރީމާތަކާއި ގުޅިގެން 2024 ވަނަ އަހަރުގައެވެ. މި މައްސަލައިގައި އައިސީސީ އިން ކޯޓު އަމުރު ނެރުނީ ނަތަންޔާހޫ އާއި އޭރުގެ ޑިފެންސް މިނިސްޓަރު ޔޯވް ގަލަންޓް ހައްޔަރުކުރުމަށެވެ.
ނަތަންޔާހޫ މީގެ ކުރިން ހަންގޭރީއަށް ވަޑައިގަތީ 2025 ވަނަ އަހަރުގެ އޭޕްރީލް މަހުގައެވެ. އެ ފަހަރު ވެސް އޭނާ ހައްޔަރެއް ނުކުރެއެވެ.
އިސްރާއީލުން 2024 ވަނަ އަހަރުގެ އޮކްޓޯބަރު މަހު ޣައްޒާގައި ދެ އަހަރުގެ ހަނގުރާމައެއް ފެށިއިރު، 71،000 އަށް ވުރެ ގިނަ މީހުން ޝަހީދުވެ، 172،000 އަށް ވުރެ ގިނަ މީހުން ޒަޚަމްވެ، ޣައްޒާގެ ގާތްގަނޑަކަށް %90 ޢިމާރާތްތައް ވަނީ ހަފުސްކޮށްލާފައެވެ.
ޣައްޒާ އަލުން ބިނާކުރުމުގެ ހަރަދު ގާތްގަނޑަކަށް 70 ބިލިއަން ޑޮލަރަށް އަރާނެ ކަމަށް އދ.އިން ލަފާ ކުރެއެވެ.
އޮކްޓޯބަރު 2025 ގައި ހަނގުރާމަ ހުއްޓާލި ނަމަވެސް އިސްރާއީލުން ކޮންމެ ދުވަހަކު ދަނީ ހަމަލާތައް ދެމުންނެވެ.
