އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) ގައި ކުރިއަށްދާ "އެޕްލިކޭޝަން އޮފް ދަ ކޮންވެންޝަން އޮން ދަ ޕްރިވެންޝަން އެންޑް ޕަނިޝްމަންޓް އޮފް ދަ ކްރައިމް އޮފް ޖެނޮސައިޑް އިން ދަ ގާޒާ ސްޓްރިޕް (ދެކުނު އެފްރިކާ ވ. އިޒްރޭލު)" މައްސަލައިގައި ޖަރުމަނުން އިޒުރޭލާއި ދެކޮޅަށް ހެކިބަސް ދިނުމަށް ކުރިން ނިންމާފައިވާ ނިންމުން އަނބުރާ ގެންގޮސްފިއެވެ.
އިޒުރޭލާއި ދެކޮޅަށް ދެކުނު އެފްރިކާއިން 84 ޞަފްޙާގެ އެ މައްސަލަ ހުށަހެޅީ 2023 ވަނަ އަހަރުގެ ޑިސެންބަރު 29، ގައެވެ.
އެ މައްސަލަ ދެކުނު އެފްރިކާއިން ހުށަހެޅީ އިޒްރޭލުން ފަލަސްޠީނުގެ ރައްޔިތުންނާއި ދެކޮޅަށް ޣައްޒާގައި ހިންގަމުންދާ ލާއިންސާނީ ޢަމަލު ތަކަކީ، 1948 ވަނަ އަހަރުގެ ކޮންވެންޝަން އޮން ދަ ޕްރިވެންޝަން އެންޑް ޕަނިޝްމަންޓް އޮފް ދަ ކްރައިމް އޮފް ޖެނޮސައިޑް (ޖެނޮސައިޑް ކޮންވެންޝަން) އާއި ޚިލާފު ޢަމަލުތަކެއް ކަމަށް ބުނެއެވެ.
ޖަރުމަނުން މި މައްސަލައިގައި ތަދައްޚުލް ނުވާން ނިންމީ “ކަރުގައި މަޅިއެއް” އެޅިދާނެތީއެވެ. ސަބަބަކީ އެ މީހުންނާއި ދެކޮޅަށް ނިކަރާގޫއާ އިން ވަނީ މައްސަލަ އެއް ހުށަހަޅަފައެވެ. އެއީ ޣައްޒާގެ ނަސްލު ނައްތައިލުމަށް ޓަކައި ޖަރުމަނުން އިޒުރޭލަށް އެހީތެރިވެ ދިން ކަމަށް ބުނެއެވެ. ނިކަރާގުއާ އިން ހުށަހެޅި މައްސަލައިގަ ވަނީ ޖަރުމަނުން އިޒުރޭލަށް ސިޔާސީ، އަސްކަރީ އަދި މާލީ އެހީތެރިކަން ފޯރުކޮށްދިން ކަމަށެވެ.
އެހެންކަމުން މި މައްސަލަ ސާބިތު ވެއްޖެ ނަމަ ޖަރުމަނު ކުށްވެރިވާނެތީވެ، އެ މަޅިން ސަލާމަތް ވުމަށް ޓަކައި ދެކުނު އެފްރިކާ އިން ހުށަހެޅި މައްސަލައަށް ތަދައްޚުލް ނުވާން ނިންމީއެވެ.
