ހަޔާތުން އުނިވެގެންދާ ކޮންމެ ވަގުތަކާއެކު ތިމާގެ އަޖަލު ގާތްވާނެކަން ހަނދާންކޮށްދީ، ގާފިލުކަމުގެ ނިދީން ހޭލައި ހެޔޮ އަމަލުކުރުމަށް މިއަދުގެ ހުކުރު ހުތުބާގައި ރާއްޖޭގެ އެންމެހާ މުސްލިމުންނަށް އިލްތިމާސްކޮށްފި އެވެ.
މި އަހަރުގެ ފިތުރު އީދު ދުވަހާ ދިމާވި މި ހުކުރު ދުވަހު، ރާއްޖޭގެ އެކިކަންކޮޅުތަކުގައި އިއްވި ހުތުބާ ބިނާކޮށްފައިވަނީ "ވަގުތުގެ ބޭނުން ހެޔޮ ގޮތުގައި ހިފުން" މި މައުޟޫއުގެ މައްޗަށެވެ.
ހުތުބާގައި ފާހަގަކުރެއްވި ގޮތުގައި، ވަގުތަކީ މާތް الله އިންސާނާއަށް ދެއްވާފައިވާ އެންމެ އަގުބޮޑު އެއް ނިއުމަތެވެ. ނަމަވެސް، މިއީ އިންސާނާ އެންމެ އަވަހަށް ހަނދާން ނެތޭ އެއް ނިއުމަތްކަން ބަޔާންކުރައްވައި ރަސޫލާ ﷺ ގެ ހަދީޘް ބަސްފުޅެއް ހުތުބާގައި ހަނދާންކޮށްދިނެވެ. އެއީ: "ގިނަ ބަޔަކު އޭގެ އަގު ވަޒަން ނުކުރާ އަދި އެއަށް ފަރުވާ ކުޑަކުރާ ދެ ނިއުމަތެއް ވެއެވެ. އެއީ ސިއްހަތާއި ހުސް ވަގުތެވެ."
އިސްލާމްދީނުގައި ވަގުތަށް ދީފައިވާ މުހިންމުކަން ހާމަކުރައްވަމުން ހުތުބާގައި ބަޔާންކުރެއްވީ، ކީރިތި ގުރުއާނުގައި ދުވާލާއި ރޭގަނޑުގެ އެކި ވަގުތުތައް ގަންދެއްވައި މާތް ﷲ ވަހީކުރައްވާފައިވުމަކީ ވަގުތުގެ މަތިވެރިކަމުގެ ހެއްކެއް ކަމަށެވެ. މާތް ﷲ އެއްޗެއް ގަންދެއްވައި ބަސް ވަހީކުރައްވަނީ އެކަލާނގެ ހަޟުރަތުގައި އެކަމެއްގެ މުހިންމުކަން ބޮޑުކަން އަންގައިދެއްވުމަށްޓަކަ އެވެ.
މިއަދުގެ ހުތުބާގައި ވަނީ އިންސާނާގެ ހަޔާތުން އުނިވެގެންދާ ކޮންމެ ފަޅި ސިކުންތަކީވެސް އޭނާގެ އަޖަލާ ގާތަށް ކުރެވޭ ދަތުރެއްކަން ހަނދާންކޮށްދީފަ އެވެ. ވަގުތަކީ އަނބުރާ ލިބޭނެ އެއްޗަކަށް ނުވާއިރު، އާހިރަތް ބާއްޖަވެރިކުރުމަށްޓަކައި ދުނިޔޭގައި ލިބޭ ވަގުތުތަކުގެ ބޭނުން ހެޔޮގޮތުގައި ހިފުމަކީ ކޮންމެ މުސްލިމެއްގެ މަސްއޫލިއްޔަތެއްކަމުގައި ހުތުބާގައި ބަޔާންކުރި އެވެ.
މިއަދަކީ އުފާވެރި ފިތުރު އީދު ދުވަސް ކަމަށްވީ ނަމަވެސް، އީދުގެ އުފާ ފާޅުކުރުމުގައިވެސް މާތް ﷲ އެންގެވި ގޮތުގައި ސާބިތުވެ ތިބުމަށާއި، ވަގުތުތައް ބޭކާރު ނުކުރުމަށް ހުތުބާގައި ވަނީ ނަސޭހަތްތެރިވެފަ އެވެ.
