ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގަންނަވާފައިވާ ވައުދުފުޅާ އެއްގޮތަށް، މާޅޮސްމަޑުލު އުތުރުބުރި ހުޅުދުއްފާރުގެ އިހްތިސާސްގައި އެ އަތޮޅު ގާއުނޑޫދޫ އަލުން ހިމެނުއްވުމަށް ނިންމަވައި އެކަން އިއުލާނު ކުރައްވައިފި އެވެ.

ރައީސުލްޖުމްހޫރިއްޔާ މިގޮތަށް ނިންމަވާފައިވަނީ، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުންނެވެ. މި ބަދަލު ގެންނަވާފައިވަނީ ރައީސުލްޖުމްހޫރިއްޔާ ނެރުއްވި 9/2024 ނަންބަރު ގަރާރުންނެވެ. މި ގަރާރާއެކު، ހުޅުދުއްފާރުގެ އިދާރީ ދާއިރާގެ އިހްތިސާސަށް ގެނައި ބަދަލު ދައްކުވައިދޭ ޗާޓު މިހާރު ވަނީ ސަރުކާރުގެ ގެޒެޓުގައި ޝާއިއުކުރައްވާފަ އެވެ.

ގާއުނޑޫދޫއަކީ މީގެކުރިންވެސް ހުޅުދުއްފާރުގެ އިހްތިސާސްގައި ހިމެނުނު ރަށެކެވެ. އެގޮތުން 2020 ވަނަ އަހަރު ނެރުއްވި ގަރާރެއްގެ ދަށުން އެ ރަށް އޮތީ ހުޅުދުއްފާރުގެ ދަށުގަ އެވެ. ނަމަވެސް، 25 އޮގަސްޓް 2021 ގައި ނެރުއްވި ގަރާރަކުން، ސިނާއީ ބޭނުމަކަށްޓަކައި އެ ރަށް ވަނީ ހުޅުދުއްފާރުގެ އިހްތިސާސްއިން އުނިކޮށްފަ އެވެ. އޭގެ ފަހުން އެ ރަށް ބޭނުންކުރަމުން އައީ މިނިސްޓްރީ އޮފް އެގްރިކަލްޗާގެ ބެލުމުގެ ދަށުން ސިނާއީ މަސައްކަތްތަކަށެވެ.

ރައީސް މުއިއްޒުގެ މި ނިންމެވުން ނިންމެވީ، ރަށްރަށުގެ އިހްތިސާސްގެ ތެރޭގައި ކައިރީގައި ހުރި ފަޅު ރަށްތައް ހިމަނައި، ކައުންސިލްތަކަށް އާމްދަނީ ހޯދުމުގެ ފުރުސަތު ފަހިކޮށްދިނުމަށް ގެންގުޅުއްވާ ސިޔާސަތުގެ ދަށުންނެވެ. މިއީ ހުޅުދުއްފާރުގެ ރައްޔިތުން ވަރަށް ބޮޑަށް އެދެމުންދިޔަ ކަމެއްކަން ފާހަގަކުރެވެ އެވެ.