އެމެރިކާ އާއި އިޒުރޭލު ކުޑަކަކޫ މައްޗަށް ތިރިކުރާނީ އީރާނުން ކަމަށާއި، އެ ދެޤައުމަށް ބޮޑެތި ގެއްލުންތަކެއް ލިބެމުންދާ މި ދަނޑިވަޅުގައި ޞުލްޙަ ވުމަށް އީރާނުން ޚިޔާލެއް ނުގެންގުޅޭ ކަމަށް ސުޕްރީމް ލީޑަރު އާޔަތުالله މުޖްތަބާ ޚާމަނާއީ އާއި ޙަވާލާދީ މަސްދަރަކުން ބުނެފިއެވެ.

ސުޕްރީމް ލީޑަރުގެ މަގާމަށް އައްޔަން ކުރެއްވުމަށް ފަހު ފުރަތަމަ ޚާރިޖީ ސިޔާސަތުގެ ބައްދަލުވުމުގައި ވެސް، އެމެރިކާ އާއި އިސްރާއީލާއި ދެކޮޅަށް ބަދަލު ހިފުމަށް "ވަރަށް ހަރުކަށި އަދި ސީރިއަސް" ސްޓޭންޑެއް މުޖްތަބާ ގެންގުޅުއްވި ކަމަށް ޚަބަރު ލިބެއެވެ. “އަދިވެސް (މުޖްތަބާ) ހުންނެވީ އެގޮތުގަ” އެ މަސްދަރުން ބުންޏެވެ.

އިރާނާއި އެކު ވާހަކަ ދައްކައި އެމެރިކާ އާއި ޞުލްޙަ ވުމަށް ދެޤައުމަކުން ⁠އީރާނުގެ ފޮރިން މިނިސްޓަރަށް ވެސް ދަންނަވާފައި ވެއެވެ. ނަމަވެސް އެކަމުގެ ތަފްޞީލެއް އީރާނުން ދީފައި ނުވާ ކަމަށް ރޮއިޓާސް ނޫސް އެޖެންސީ ބުނެއެވެ.

އިސްލާމީ ޖުމްހޫރިއްޔާގެ ހުރިހާ ކަންކަމުގައި އެންމެ ފަހުގެ ބަސްފުޅު އިއްވަވަނީ އެންމެ މަތީ ލީޑަރެވެ. މީގެ 18ދުވަސް ކުރިން އޭނާގެ ބައްޕަ އާޔަތުالله އަލީ ޚާމަނާއީ އަވަހާރަވުމާއި އެކު، އީރާނުގެ ވެރިކަމާއި ދަރިކަލުން މުޖްތަބާ ޙަވާލުވެ ވަޑައިގެންނެވިތާ އަދި މިވީ ހަފްތާއެކެވެ.

އީރާނުގެ ބައެއް އޮފިޝަލުން ވަނީ އޭނާގެ ބައްޕަ މަރުވި ޙަމަލާ ތަކުގައި މުޖްތަބާ އަށް ޒަޚަމް ތަކެއް ލިބިފައިވާ ކަމަށް ބުނެފައެވެ. އެމެރިކާގެ އޮފިޝަލުން ވެސް ބުނަނީ މުޖްތަބާ ޒަޚަމް ވެފައިވާ ކަމަށާއި، ލިބިފައި ވަނީ ސީރިއަސް އަނިޔާ ތަކެކެވެ.

އެމެރިކާ އާއި އިސްރާއީލުން އީރާނާއި ދެކޮޅަށް ކުރަމުންދާ ހަނގުރާމައިގެ ތިންވަނަ ހަފްތާގައި މަދުވެގެން 2،000 މީހުން މަރުވެފައި ވާއިރު ހަނގުރާމަ ނިމޭނެ ކޮޅުމައްޗެއް ވެސް އަދި ފެންނާކަށް ނެތެވެ. ފެންނަމުން ދަނީ “ސުޕަރު ޕަވަރު”އޭ ބުނާ އެމެރިކާ އާއި، އެމެރިކާގެ “ދަރިފުޅު” ސަޙްޔޫނީ ދައުލަތަށް ބޮޑެތި ގެއްލުންތައް ލިބެމުންދާ މަންޒަރެވެ. ހުރްމުޒް ވެސް އަދިވެސް އޮތީ ބޮޑުތަނުން އެ ދުޝްމަނުންނަށް ބަންދުކޮށްފައެވެ. އެމެރިކާ އަށް “ޙަރާމް” ކޮށްފައެވެ.

މިދިޔަ ހަފްތާގައި އާ ސުޕްރީމް ލީޑަރު ވިދާޅުވީ ހުރްމުޒް ކަނޑުއޮޅި ބަންދު ކޮށްފައި އޮންނަން ޖެހޭނީ “އީރާނުގެ ދުޝްމަނުންނަށް” ޕްރެޝަރު ކުރުމުގެ ވަޞީލަތެއްގެ ގޮތުގައެވެ.

ފާހަގަ ކޮށްލަން ޖެހޭ މުހިއްމު އަނެއް ކަމަކީ، އީރާނުން ބުނެފައި ވަނީ މި ހަނގުރާމަ ފެށީ އެމެރިކާ އިން ކަމަށާއި، ހަނގުރާމަ ކޮންޓުރޯލް ކުރާނީ ތެހެރާނުންނެވެ. އަދި މި ހަނގުރާމަ ހުއްޓާލާނީ ވެސް ތެހެރާނުންނެވެ.