ޒުވާނުންގެ މެދުގައި އެންމެ މަގުބޫލު އެއް ކުޅިވަރު ހަރަކާތް ކަމަށްވާ އީދު ބައިބަލާ ޗެލެންޖް 1447ގެ މެޗުތައް ކުޅޭ، ހައިބަތު ބޮޑު އެރީނާގެ މަސައްކަތް ނިމުމަކާ ގާތްވެއްޖެ އެވެ.
ހުޅުމާލެ ސެންޓްރަލް ޕާކާ ދިމާލުގައި އޮންނަ ހުސް ބިމުގައި ތައްޔާރުކުރަމުންދާ މި މައިދާނަކީ ރާއްޖޭގެ އިވެންޓް ޕްރޮޑަކްޝަން ސިނާއަތުގައި މިހާތަނަށް ފެނިފައިނުވާ ފެންވަރުގެ މަސައްކަތެކެވެ.
އީދު ބަންދާ ދިމާކޮށް މުޅި ރާއްޖޭގެ ސަމާލުކަން ހުއްޓިފައިވާ މި މުބާރާތުގެ އިވެންޓް މެނޭޖްމަންޓް ޕާޓްނަރެއްގެ ގޮތުގައި ޖެހިޖެހިގެން ދެވަނަ އަހަރު ހަރަކާތްތެރިވަނީ ސްޓޭޖް ކޯ އެވެ. މިދިޔަ އަހަރުގެ މުބާރާތުގައި ވެސް މައިދާން ތައްޔާރުކޮށް ގިނަ ބައެއްގެ ތައުރީފު ހޯދާފައިވާ ސްޓޭޖް ކޯއިން މި ފަހަރު ގެނެސްދީފައި ވަނީ އެއަށްވުރެ މާ ފުރިހަމަ، ތަފާތު ބޮޑު މައިދާނެކެވެ. ތަފާތު ބޮޑު، ގިނަ ބަދަލުތަކަކާ އެކު މިހާ ކުލަގަދަކޮށް ބައިބަލާ މައިދާން ތައްޔާރުކޮށް ކުޅެން ފެށީ މިދިޔަ އަހަރުން ފެށިގެން ކަމަށްވާއިރު، ސްޓޭޖް ކޯއިން ވަނީ ކޮންމެ އަހަރަކު ވެސް އާ ހަރުފަތަކަށް މި މަސައްކަތް ގެންގޮސްދޭނެ ކަން ސާބިތުކޮށްދީފައެވެ.
މި އަހަރުގެ އެރީނާގެ އެންމެ ފާހަގަކޮށްލެވޭ ސިފައަކީ އޮނިގަނޑުގެ އުސްމިނެވެ. ގާތްގަނޑަކަށް 68 ފޫޓަށް އުސްކޮށް ފަރުމާކޮށްފައިވާ މި އޮނިގަނޑަކީ ރާއްޖޭގައި މިހާތަނަށް އިވެންޓަކަށް ތައްޔާރުކުރި އެންމެ އުސް އޮނިގަނޑެވެ. ހައިބަތާއި ޝަހުސިއްޔަތު ވަރުގަދަ މައިދާނެއްގެ ގޮތުގައި ފަރުމާކޮށްފައިވާ މި އެރީނާއިން ބައިބަލާގެ ފޯރިގަދަ މާހައުލު އިތުރު ހަރުފަތަކަށް ގެންގޮސްދޭނެ ކަމަށް ބެލެވެއެވެ.
މި ވަރުގެ ބިޔަ ސެޓަޕެއް ރާއްޖޭގެ ފަސްގަނޑުގައި ކޮޅަށް ޖެހުމަކީ އެތައް ގޮންޖެހުންތަކެއް ހުރި ބުރަ މަސައްކަތެއް ކަމަށްވާއިރު، ސްޓޭޖް ކޯގެ ޓީމުން ވަނީ އެ ހުރިހާ ގޮންޖެހުންތަކެއް ގިރާކޮށް، މި ތަސައްވުރު ހަގީގަތަކަށް ހަދާފައެވެ. މިއީ ރާއްޖޭގެ އިވެންޓް ޕްރޮޑަކްޝަން ސިނާއަތަށް ލިބުނު ބޮޑު ކުރިއެރުމެކެވެ.
މި ފަހަރުގެ އީދު ބައިބަލާ ޗެލެންޖު ފަށާނީ މިމަހުގެ 21 އިން ފެށިގެންނެވެ. މުބާރާތުގައި ޖުމްލަ 38 ޓީމަކުން ބައިވެރިވެފައިވާއިރު މިއީ މިދިޔަ އަހަރުގެ މުބާރާތާ އަޅާބަލާއިރު 10 ޓީމު އިތުރު އަދަދެކެވެ. ޖުމްލަ 72 މެޗު މި ފަހަރުގެ މުބާރާތުގައި ކުޅޭއިރު، މެޗުތައް ގިނަވެފައި ވަނީ މުބާރާތުގެ ފޯމެޓަށް ގެނައި ބަދަލާ ގުޅިގެންނެވެ. މި ފަހަރުގެ މުބާރާތް ވެގެންދާނީ އެންމެ ގިނަ އަދަދެއްގެ މެޗުތައް ކުޅެވޭ ބައިބަލާ މުބާރާތަށެވެ.
އެރީނާގެ މަސައްކަތްތައް ނިމެމުންދާއިރު، އީދު ބައިބަލާ ޗެލެންޖް 1447 އަށް އޮތް ފޯރި ދަނީ ހައްތަހާ ގަދަވަމުންނެވެ. ރާއްޖޭގެ އެކި ކަންކޮޅުތަކުން ޓީމުތަކާއި ސަޕޯޓަރުން އެންމެ އިންތިޒާރުކުރާ އެއް ކުޅިވަރު ހަރަކާތް ކަމަށްވާ މި މުބާރާތް، ސްޓޭޖް ކޯގެ ރެކޯޑް އެރީނާއާ އެކު، ބައިބަލާގެ ތާރީހުގައި އާ ބާބެއް ލިޔެދޭނެ ކަމުގެ ހުރިހާ އަލާމާތެއް މިހާރު ދަނީ ފެންނަމުންނެވެ.
