އީރާނުގެ އާ ސުޕްރީމް ލީޑަރު މުޖްތާބާ ޚާމަނާއީގެ ހާލު ސްޓޭބަލް ކަމަށާއި، ވަރަށް އަވަހަށް ރަސްމީ ބަޔާނެއް ނެރޭނެ ކަމަށް އީރާނުގެ ޑެޕިއުޓީ ފޮރިން މިނިސްޓަރު އިސްމާއީލް ބަޣާއީ އާއި ޙަވާލާދީ ރަޝިޔާގެ މަސްދަރަކުން ބުނެފިއެވެ.
ރަޝިޔާ އިން މިރޭ މިހެން ބުނީ، މުޖްތަބާގެ ބައްޕާފުޅު، ކުރީގެ ލީޑަރު ޢަލީ ޚާމަނާއީ އާއި އެހެނިހެން އިސް ބޭފުޅުން މަރުވި ޙަމަލާގެ ތެރޭގައި މުޖްތާބާ ޚާމަނާއީ އަށް އަނިޔާތަކެއް ލިބި އޭނާ ދިރިހުރި ކަމާއި މެދު ޝައްކު ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނިކޮށެވެ.
ނުރަސްމީ މަސްދަރުތަކުން ބުނަނީ މުޖްތަބާ ޚަމަނާއީ މިވަގުތު އޮތީ ރަޝިއާގެ ވެރިރަށް މޮސްކޯގެ ހޮސްޕިޓަލެއްގައެވެ. ނަމަވެސް މޮސްކޯ ސަރުކާރުން މިވާހަކަތަކަށް ރަސްމީ ސިފައިގައި އެކަށީގެންވާ ޖަވާބެއް ނުދެއެވެ. ކްރެމްލިން އިން ބުނީ މިކަމުގައި ޖަވާބު ދޭން ބޭނުން ނުވާ ކަމަށެވެ.
ބައިނަލްއަޤްވާމީ މަޝްހޫރު މަސްދަރުތަކުން އެނގޭ ގޮތުގައި މުޖްތަބާ ޚާމަނާއީ އޭނާގެ ޒިންމާ އަދާކުރައްވަން އޮފީހަށް ނުކުމެވަޑައި ނުގަންނަވައެވެ. ނުރަސްމީ ޗެނަލްތަކުން އެނގޭ ގޮތުގައި އޭނާގެ ފަޔާއި އަތާއި ބަނޑަށް ވަނީ ވަރަށް ބޮޑެތި ޒަޚަމްތަކެއް ލިބިފައެވެ.
އީރާނުގެ ފޮރިން މިނިސްޓްރީ އާއި ޙަވާލާދީ ރަޝިޔާ އިން ރިޕޯޓުކުރާ ގޮތުގައި މުޖްތަބާ ޚާމަނާއީ ގެންދަވަނީ އީރާނުގެ ދައުލަތުގެ ކަންކަން ފުރިހަމަ އަށް ކޮންޓްރޯލްކޮށް ބަލަހައްޓަމުންނެވެ.
އިސްލާމިކް ރިވޮލިއުޝަނަރީ ގާޑް ކޯޕްސް ހިމެނޭ ގޮތަށް އީރާނުގެ މުއައްސަސާތަކުން ވަނީ ޚާމަނާއީގެ ޢާއިލާ އަށް ވަފާތެރިވުމަށް އެންމެން އެކަތިގަނޑަކަށް ވެ، އެ ނިޒާމުގެ ތެރޭގައި ހަމަޖެހުން ވަރުގަދަކޮށްފައި ކަމަށް މަސްދަރުތައް ބުނެއެވެ
