ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ފައިސާއަށް ހިޔާނާތްތެރިވިކަން ސާބިތުވެ ޖަލު ހުކުމެއް ތަންފީޒު ކުރަމުންދާ އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލް، ސިއްހީ ސަބަބުތަކަކަށްޓަކައި ވަގުތީ ގޮތުން ގޭބަންދަށް ބަދަލުކުރުމަށްފަހު އަލުން ޖަލަށް ބަދަލުކޮށްފިއެވެ.
މޯލްޑިވްސް ކަރެކްޝަނަލް ސާވިސްއިން މައުލޫމާތު ދޭ ގޮތުގައި ބައްސާމް ގޭބަންދަށް ބަދަލުކުރީ އޭނާ ކުރި ނޭފަތުގެ ސާޖަރީއަކަށްފަހު، ރިކަވަރީ މުއްދަތުގައި ހިރަފުހާ ދުރުގައި އުޅުމަށް ޑޮކްޓަރުން ލަފާދީފައިވާތީއެވެ. ނަމަވެސް، ސާޖަރީއަށްފަހު ދޭންޖެހޭ ފަރުވާތައް ޖަލުގައި ބަހައްޓައިގެން ކުރިއަށް ގެންދެވޭނެ އިންތިޒާމު ހަމަޖެހުމާއެކު އޭނާ ވަނީ އަނބުރާ ޖަލަށް ގެންގޮސްފައެވެ.
ބައްސާމްގެ މައްޗަށް ކްރިމިނަލް ކޯޓުން ވަނީ ޖުމްލަ 32 އަހަރުގެ ޖަލު ހުކުމެއް އިއްވާފައެވެ. މި ހުކުމް އިއްވީ ފީފާއިން އެފްއޭއެމަށް ފޮނުވި 1.2 މިލިއަން ޑޮލަރާއި އިތުރު 10,000 ޑޮލަރަށް ހިޔާނާތްތެރިވެ، އެ ފައިސާ ލޯންޑާކުރިކަން ސާބިތުވުމާ ގުޅިގެންނެވެ. މި މައްސަލަތަކުގެ ތެރެއިން ފުރަތަމަ ދައުވާގައި އޭނާ ޖަލަށްލާން ހުކުމްކުރީ މިދިޔަ އަހަރުގެ އޮކްޓޯބަރު މަހުއެވެ.
މި މައްސަލައާ ގުޅިގެން ބައްސާމް އަމިން އެވެނިއުއިން ގަނެފައިވާ ދެ އެޕާޓްމެންޓެއް ވެސް ފުލުހުން ވަނީ ހިފަހައްޓާފައެވެ. މީގެ އިތުރުން، މި މައްސަލައިގައި އަމިން ކޮންސްޓްރަކްޝަންގެ މައްޗަށް ކުރި ދައުވާ ސާބިތުނުވާ ކަމަށް ކޯޓުން ނިންމި ނިންމުން ދައުލަތުން ވަނީ ހައިކޯޓުގައި އިސްތިއުނާފު ކޮށްފައެވެ.
ބައްސާމް ކުއްލި ގޮތަކަށް ގޭބަންދަށް ބަދަލުކުރުމާ ގުޅިގެން އާންމުންގެ ފަރާތުން ބޮޑެތި ފާޑުކިޔުންތަކެއް ސަރުކާރަށް އަމާޒުވިއެވެ. ކަރެކްޝަންސްއިން ބުނީ ބައްސާމް ގެއަށް ބަދަލުކުރީ ޒަރޫރީ ހާލަތްތަކުގައި އަމަލުކުރަން އޮންނަ ގަވާއިދުގެ ތެރެއިން ކަމަށެވެ.
ބައްސާމްގެ ފަރާތުން މިހާރު ވަނީ އޭނާގެ މައްޗަށް އިއްވާފައިވާ ޖަލު ހުކުމްތައް ހައިކޯޓުގައި އިސްތިއުނާފު ކޮށްފައެވެ. ނަމަވެސް، އިސްތިއުނާފު މަރުހަލާ ނިމެންދެން އޭނާ ހުންނަން ޖެހޭނީ ޖަލު ބަންދުގައެވެ.
