މޯލްޑިވްސް ކަރެކްޝަނަލް ސާވިސްއާއި ފުލުހުން ގުޅިގެން، ކ. ހިންމަފުށީގައި ހުންނަ "އައްސޭރި ޖަލު" ބަލައި ފާސްކުރުމުގެ ހާއްސަ އޮޕަރޭޝަނެއް މިއަދު ފަށައިފި އެވެ.

މި އޮޕަރޭޝަނަކީ ޖަލުތަކުގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި ކަރެކްޝަންސްއިން ފުލުހުންނާ ގުޅިގެން ކުރިއަށްގެންދާ ސިލްސިލާ މަސައްކަތްތަކުގެ ތެރެއިން ހިންގާ އޮޕަރޭޝަނެކެވެ. ކަރެކްޝަންސްއިން ބުނި ގޮތުގައި ޖަލުތަކުގެ ރައްކާތެރިކަން ބެލެހެއްޓުމަށްޓަކައި ޝެޑިއުލް ކުރެވިގެންނާއި، ކުއްލި ގޮތަކަށް ހިންގާ އޮޕަރޭޝަންތައް ދަނީ މެދުނުކެނޑި ކުރިއަށް ގެންދަމުންނެވެ.

އައްސޭރި މިއަދު ޖަލުގައި ފެށި މި އޮޕަރޭޝަނާ ގުޅޭ އިތުރު ތަފްސީލެއް ކަރެކްޝަންސްއިންނާއި ފުލުހުން އަދި ހާމަކޮށްފައެއް ނުވެ އެވެ. މީގެކުރިންވެސް މިފަދަ އޮޕަރޭޝަންތައް މާފުށީ ޖަލާއި ހުޅުމާލެ ޖަލުގައި ހިންގާފައިވެ އެވެ.

ޖަލުތަކުގެ ބެލެހެއްޓުންތެރިކަން ހަރުދަނާކޮށް، ޖަލުތަކުގެ ތެރޭގައި މަނާ ތަކެތި ގެންގުޅުމާއި، ކުށްކުރުން ހުއްޓުވުމަށް ސަރުކާރުން އަންނަނީ ވަރުގަދަ ފިޔަވަޅުތަކެއް އަޅަމުންނެވެ. މިގޮތުން، ޖަލަށް ވައްދާ ތަކެތި ސްކޭން ކުރެވޭނެ ޒަމާނީ ނިޒާމުތައް މިހާރު ވަނީ ގާއިމުކޮށްފަ އެވެ.

އެގޮތުން، މިދިޔަ މަހުގެ 15 ވަނަ ދުވަހުން ފެށިގެން މާފުށީ ޖަލުގައި ބެގޭޖް ސްކޭނަރު ބޭނުންކުރަން ފަށާފައިވާއިރު، މިއަހަރުގެ ފެބުރުވަރީ މަހު ވަނީ ޖަލަށް ވަންނަ މީހުން ސްކޭން ކުރުމަށް ބޮޑީ ސްކޭނަރުތައްވެސް ބަހައްޓާފައެވެ. މިއީ ރާއްޖޭގެ ޖަލުތަކުގެ ތާރީހުގައި މިފަދަ ހަރުދަނާ ނިޒާމެއް ޤާއިމުކުރި ފުރަތަމަ ފަހަރެވެ. މި ނިޒާމުގެ ސަބަބުން ސިއްރުން ޖަލަށް މަނާ ތަކެތި ވެއްދުން ހުއްޓުވުމަށް ބޮޑު ބާރަކަށް ވާނެ އެވެ.

ޖަލުތަކުގައި ތިބެގެން ފޯނާއި އިންޓަނެޓް ބޭނުންކޮށްގެން ސްކޭމްގެ ބޮޑެތި އަމަލުތައް ހިންގާކަން ފުލުހުން މީގެކުރިން ފާހަގަކޮށްފައިވެ އެވެ. މިފަދަ އޮޕަރޭޝަންތަކުގެ މައިގަނޑު އެއް ބޭނުމަކީ ޖަލުތަކުގައި ފޯނާއި އެހެނިހެން މަނާ ތަކެތި ގެންގުޅުން ހުއްޓުވައި، ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުންކަމަށް ކަރެކްޝަންސްއިން ފާހަގަކުރި އެވެ.