ހުޅުމާލޭ ފޭސް ވަންގައި ފުޓްބޯޅަ ސްކޫލެއް ގާއިމްކުރުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ދޫކުރި ބިން ބޭނުންކޮށްގެން، އެ އިދާރާގެ ކުރީގެ ލީޑަޝިޕުން އެތައް މިލިއަން ރުފިޔާއަކަށް ހިޔާނާތްތެރިވެފައިވާ މައްސަލައެއް އޮޑިޓް އޮފީހުން ފެންމަތިކޮށްފި އެވެ.
އިއްޔެ އާންމުކުރި އޮޑިޓް ރިޕޯޓުގައިވާ ގޮތުން، މި މަޝްރޫއާ ގުޅުންހުރި ފައިސާގެ ތެރެއިން ޖުމުލަ 29,598,200 (ނަވާވީސް މިލިއަން ފަސްލައްކަ ނުވަދިހަ އަށްހާސް ދުއިސައްތަ) ރުފިޔާ ވަނީ ގެއްލިފައެވެ.
މި މަޝްރޫއަކީ ރާއްޖޭގައި ބައިނަލްއަގުވާމީ ފުޓްބޯޅަ ތަމްރީނު މަރުކަޒެއް އެޅުމަށް 11 ޖުލައި 2018 ގައި އެޗްޑީސީއާއެކު ސޮއިކުރި އެއްބަސްވުމެކެވެ. އެ އެއްބަސްވުމުގެ ދަށުން ހުޅުމާލެއިން އެފްއޭއެމްއަށް ދޫކުރި 230,000 އަކަފޫޓުގެ ބިމުގެ ސްލޮޓްތައް އެކި ފަރާތްތަކަށް ކުއްޔަށް ދޫކުރުމަށް 2021 އިން 2024 އަށް 15 ސަބްލީސް އެއްބަސްވުމެއް ހަދާފައިވެއެވެ. އޮޑިޓް ރިޕޯޓުގައި ބުނެފައިވަނީ މި އެއްބަސްވުންތަކުގެ ދަށުން 2025 ގެ ނިޔަލަށް 52.2 މިލިއަން ރުފިޔާ ލިބިފައިވާ ކަމަށް ބެލެވޭއިރު، އޭގެ ތެރެއިން ބޮޑު ބައެއް ވަނީ ގެއްލިފައެވެ.
ފައިސާ ގެއްލުނު ގޮތުގެ ތަފްސީލު
އޮޑިޓް އޮފީހުން ފާހަގަކޮށްފައިވާ ގޮތުގައި، ގެއްލުނު ފައިސާގެ ތެރޭގައި ހިމެނެނީ ނަގުދު ފައިސާއިންނާއި ޗެކުން ދެއްކި ކަމަށް ބުނާ 14.1 މިލިއަން ރުފިޔާއާއި، ބޭންކް އެކައުންޓްތަކަށް ޖަމާވި ފައިސާގެ ތެރެއިން އަމިއްލަ ކުންފުނިތަކާއި ފަރުދުންގެ އެކައުންޓްތަކަށް ފޮނުވާފައިވާ 14 މިލިއަން ރުފިޔާއެވެ. މީގެ އިތުރުން، ކޮން ބޭނުމަކަށްކަން ނޭނގޭ ގޮތަށް އެކި ފަހަރު މަތިން 1.4 މިލިއަން ރުފިޔާ ނަގުދު ފައިސާގެ ގޮތުގައި ބޭންކުން ނަގާފައިވާކަން ވެސް ވަނީ ފާހަގަކުރެވިފައެވެ.
"ސަބްލީސް އެއްބަސްވުންތަކުގެ ދަށުން ބިމުގެ ސްލޮޓްތަކާއި އިމާރާތުގެ ފްލޯތައް ކުއްޔަށް ހިފި ފަރާތްތަކުން 2025 ވަނަ އަހަރުގެ ނިޔަލަށް އެފްއޭއެމް އަށް ޖުމުލަ 52,210,000 ރުފިޔާ ދައްކާފައިވާ ކަމަށް ބެލެވޭއިރު، އެ ފައިސާގެ ތެރެއިން އެފްއޭއެމްގެ ބޭންކް އެކައުންޓްތަކަށް ޖަމާކޮށްފައިވަނީ ހަމައެކަނި ޖުމުލަ 38,110,000 ރުފިޔާކަން ފާހަގަކުރެވުން،" އޮޑިޓް އޮފީހުގެ ރިޕޯޓުގައި ބުނެފައިވެއެވެ.
މީގެ އިތުރުން، އެފްއޭއެމްއަށް ލިބުނު ފައިސާ ބޭނުންކޮށްގެން ބޭރު ފައިސާ (ޑޮލަރު) ގަތުމުގެ މުއާމަލާތްތަކެއް ހިންގާފައިވާކަން ވެސް އޮޑިޓުން ވަނީ ދައްކާފައެވެ. މިއީ ބޭރުގެ އިދާރާތަކުން ސީދާ ޑޮލަރުން ފައިސާ ލިބޭ ޖަމިއްޔާއަކުން އަމަލުކުރަންޖެހޭ އުސޫލެއް ނޫން ކަމަށް ގިނަ ފަރާތްތަކުން އަންނަނީ ބުނަމުންނެވެ. މި މައްސަލައަކީ އެފްއޭއެމްގެ ކުރީގެ ލީޑަޝިޕްގެ މައްޗަށް ތުހުމަތުކުރެވޭ ކޮރަޕްޝަންގެ ސީރިއަސް މައްސަލައެކެވެ.
ފުޓްބޯޅަ ސްކޫލް ހިންގުމަށް އެފްއޭއެމަށް ދޫކުރި ބިމުގެ ސަބްލީސް އެއްބަސްވުންތަކަށް ގެނައި ބަދަލުތަކުގެ ސަބަބުން އެ އެސޯސިއޭޝަނަށް ލިބެންޖެހޭ ބޮޑު އާމްދަނީއެއް ވަނީ ގެއްލިފައެވެ. ވަކި ތިން ފަރާތަކަށް ދޫކޮށްފައިވާ ސްލޮޓްތަކުގެ ސައިޒް ބޮޑުކޮށް، މުއްދަތު އިތުރުކޮށްދިން ނަމަވެސް، ކުލި ކުޑަކޮށްދިނުމުގެ ސަބަބުން 14.4 މިލިއަން ރުފިޔާ ލިބުމަށް ހުރަސްއެޅިފައިވާ ކަމަށް އޮޑިޓް ރިޕޯޓުގައި ފާހަގަކޮށްފައިވެއެވެ.
އޮޑިޓް ރިޕޯޓުގައި ފާހަގަކޮށްފައިވާ ގޮތުގައި އެފްއޭއެމުން ބިންތައް ސަބްލީސްކޮށްފައިވަނީ މާކެޓް ރޭޓަށްވުރެ މާ ދަށް އަގުތަކެއްގައެވެ. ހުޅުމާލޭގެ ކޮމާޝަލް ރޭޓަކީ އަކަފޫޓަކަށް 20.23 ރުފިޔާ ކަމަށްވާއިރު، އެފްއޭއެމުން ބިން ދޫކޮށްފައިވަނީ އެވްރެޖްކޮށް 2.91 ރުފިޔާއަށެވެ. މީގެ ސަބަބުން އެއްބަސްވުމުގެ މުއްދަތުގައި ގާތްގަނޑަކަށް 524 މިލިއަން ރުފިޔާގެ ގެއްލުން ވާނެކަމަށް ލަފާކުރެވޭއިރު، ޕްރެސެންޓް ވެލިއުއަށް ބަލާއިރުވެސް 79.9 މިލިއަން ރުފިޔާގެ ގެއްލުމެއް ލިބޭނެއެވެ.
ބިމުގެ ކުލީގެ ގޮތުގައި އެޗްޑީސީއަށް ދައްކަންޖެހޭ ފައިސާވެސް އެފްއޭއެމުން ދައްކާފައެއް ނުވާކަަމަށް އޮޑިޓް ރިޕޯޓުގައި ވަނީ ބުނެފައެވެ. 2025 ވަނަ އަހަރުގެ ނިޔަލަށް ބިމު ކުއްޔާއި ޖޫރިމަނާގެ ގޮތުގައި ޖުމުލަ 10.5 މިލިއަން ރުފިޔާ އެޗްޑީސީއަށް ދައްކަންޖެހިފައިވާކަން އޮޑިޓުން ވަނީ ހާމަކޮށްފައެވެ.
ފުޓްބޯޅަ ސްކޫލް ތަރައްގީކުރުމަށް ހަވާލުކުރި އަމިއްލަ ކުންފުންޏަކަށް، މަސައްކަތް ނުނިމެނީސް ބޮޑެތި އަދަދުތަކުން ފައިސާ ދޫކޮށްފައިވާކަން ވަނީ ފާހަގަކުރެވިފައެވެ. އެގޮތުން އޮފީސް އިމާރާތާއި ޕިޗްތަކުގެ މަސައްކަތް ނުފެށި އޮތްއިރުވެސް، ނިމިފައިވާ މަސައްކަތަށްވުރެ އިތުރަށް 14.2 މިލިއަން ރުފިޔާ ހިމެނޭހެން ޖުމުލަ 32.3 މިލިއަން ރުފިޔާ އެ ކުންފުންޏަށް ދީފައިވެއެވެ.
މީގެ އިތުރުން، އެއްބަސްވުމެއް ނެތި ބައެއް ފަރާތްތަކުން އެފްއޭއެމްގެ ބިން ބޭނުންކުރަމުންދާކަންވެސް ވަނީ ފާހަގަކުރެވިފައެވެ. ފުޓްބޯޅަ ޕިޗް އެޅުމަށް ކަނޑައަޅާފައިވާ ސަރަހައްދުގައި ކޮންސްޓްރަކްޝަން ސާމާނު ގުދަންކުރުމާއި، ބަރު އުޅަނދު ބެހެއްޓުމުގެ އިތުރުން ބިދޭސީ މަސައްކަތްތެރިން ބޭތިއްބުމަށް ބޭނުންކުރަމުންދާކަން އޮޑިޓް އޮފީހުން ވަނީ ފާހަގަކޮށްފައެވެ.
