ފުޓުބޯޅަ އެސޯސިއޭޝަން އޮފް މޯލްޑިވްސް (އެފް.އޭ.އެމް) އިން މިހާރު ކުރިއަށްގެންދާ 2026 ވަނަ އަހަރުގެ ތިންވަނަ ޑިވިޝަން ފުޓުބޯޅަ މުބާރާތުގައި އެލްސީ ސްޕޯޓްސް ކްލަބަށް ނާއިންސާފުވާ ގޮތަށް އެ އިދާރާގެ ކޮމްޕެޓިޝަން ކޮމިޓީން ނިންމުންތައް ނިންމަމުންދާ ކަމަށް ބުނެ އެކަން އެލްސީ ސްޕޯޓްސް ކްލަބުން ހަރުކަށި އިބާރާތުން ކުށްވެރިކޮށްފިއެވެ.
މި މައްސަލައާ ގުޅިގެން އެލްސީ ސްޕޯޓްސް ކްލަބުން ނެރުނު ނޫސްބަޔާނެއްގައި ބުނެފައިވަނީ، މުބާރާތުގެ ގުރުއަތުލުމުގެ ރަސްމިއްޔާތުގައި އެފް.އޭ.އެމް އިން މުބާރާތް ކުރިއަށްދާނެ އުސޫލާއި، ގްރޫޕްތަކުގެ ތެރެއިން އެންމެ ނަތީޖާ ރަނގަޅު ޓީމުތައް ހޮވާނެ ގޮތުގެ މައުލޫމާތު ހިއްސާކޮށްފައިވާ ކަމަށެވެ. އެގޮތުން ގްރޫޕް 5 ގައި އިތުރު ޓީމެއް ހިމެނޭތީ، އެންމެ ރަނގަޅު ދެވަނަ ޓީމު ހޮވުމުގައި އެ ގްރޫޕްގެ ފުލަށްދާ ޓީމާ ދެކޮޅަށް ކުޅުނު މެޗުގެ ނަތީޖާ އުނިކުރާނެ ކަމަށް ބުނެފައިވީ ނަމަވެސް، ގްރޫޕްގެ އެއްވަނަ ޓީމަށް ބަދަލެއް އަންނާނެ ކަމަށް ބުނެފައި ނުވާ ކަމަށެވެ.
އެލްސީ ސްޕޯޓްސް ކްލަބުން ގްރޫޕް ސްޓޭޖުގެ މެޗުތައް ކުޅެ އެންމެ ގިނަ ޕޮއިންޓާއެކު ގްރޫޕްގެ އެއްވަނަ ހޯދާފައިވަނިކޮށް، އަދި ކުއާޓަރ ފައިނަލްގެ ތާވަލުގައިވެސް އެ ކްލަބުގެ ނަން ހިމަނާފައިވަނިކޮށް، ކުއްލިއަކަށް އެފް.އޭ.އެމް އިން ވަނީ މެޗުތައް ފަސްކޮށްފައެވެ. އަދި ޖުލައި 8، 2026 ގައި ބޭއްވި ކޮމިޓީ ބައްދަލުވުމެއްގައި، ގްރޫޕް 5 ގެ އެއްވަނަ، ދެވަނަ، ތިންވަނަ އަދި ހަތަރުވަނަ ޓީމު، ފުލަށް ދިޔަ ޓީމާ ދެކޮޅަށް ކުޅުނު މެޗުގެ ނަތީޖާ އުނިކޮށް ޕޮއިންޓް ޓޭބަލް އަލުން ތަރުތީބު ކުރަން ނިންމިކަން ވަނީ އަންގާފައެވެ. މި ނިންމުމުގެ ސަބަބުން ގްރޫޕްގެ އެއްވަނައިގައި އޮތް އެލްސީ ސްޕޯޓްސް ކްލަބަށް މުބާރާތުން ވަކިވާން ޖެހުމަކީ ބަލައިގަނެވޭނެ ކަމެއް ނޫން ކަމަށް އެ ކްލަބުން ބުނެއެވެ.
Advertisement
މީގެ އިތުރުން، މުބާރާތުގެ ގަވާއިދާ ޚިލާފަށް ކުޅުންތެރިއަކު ރަޖިސްޓްރީކޮށްފައިވާ މައްސަލައެއް ޖުލައި 9 ގައި ހުށަހެޅުމުންވެސް އެފް.އޭ.އެމް އިން އެކަމަށް އެކަށީގެންވާ ޖަވާބެއް ދީފައި ނުވާ ކަމަށް އެލްސީން ތުހުމަތު ކުރެއެވެ. އެފް.އޭ.އެމް އިން ފަހުން ފޮނުވި ސިޓީއެއްގައި ބުނެފައިވަނީ ކުއާޓަރ ފައިނަލް މެޗުތައް ފެށިފައިވާތީ ގްރޫޕް ސްޓޭޖުގެ މައްސަލަތައް ބެލުން ހުއްޓާލާފައިވާ ކަމަށެވެ. ނަމަވެސް އެލްސީން ބުނަނީ ކުއާޓަރ ފައިނަލް ފެށިފައިވަނިކޮށް ގްރޫޕްގެ ޕޮއިންޓް ދޭނެ ގޮތް ބަދަލުކޮށް ކުއާޓަރ ފައިނަލަށް ދިޔަ ޓީމުތަކަށް ބަދަލު ގެނައުމަކީ އެއްހަމައަކުން އަމަލުކުރުން ނޫން ކަމަށެވެ.
އެލްސީ ސްޕޯޓްސް ކްލަބުން ވަނީ އެފް.އޭ.އެމް އިން މުބާރާތްތައް ހިންގުމުގައި އިންސާފުވެރިކަމާއި ދެފުށް ފެންނަ އުސޫލުތަކެއް ގާއިމުކުރުމަށް ގޮވާލާފައެވެ. އަދި މެޗުތައް ކުޅެ ނިމިފައިވަނިކޮށް ގަވާއިދުތަކަށް ބަދަލު ގެނައުމަކީ މުބާރާތްތަކުގެ ނަޒާހަތްތެރިކަން ގެއްލި، ކްލަބުތަކާއި ސަޕޯޓަރުންގެ އިތުބާރު ކުޑަވެގެންދާނެ ކަމެއްކަންވެސް އެ ކްލަބުން ފާހަގަކުރެއެވެ. އެލްސީ ސްޕޯޓްސް ކްލަބުން އިތުރަށް ބުނީ އެ ކްލަބަކީ އަބަދުވެސް އިންސާފުވެރި ކުޅިވަރުގެ ރޫހު ދެމެހެއްޓުމުގައި ސާބިތުވެ އޮންނާނެ ކްލަބެއް ކަމަށެވެ.
