ފުޓްބޯލް އެސޯސިއޭޝަން އޮފް މޯލްޑިވްސްގެ ކުރީގެ ރައީސް ބައްސާމް އަދީލް ޖަލީލަށް މަނީ ލޯންޑާކުރަން މަގުފަހިކޮށްދިން ކަމަށް ބުނެ އަމިން ކޮންސްޓްރަކްޝަންގެ މައްޗަށް ކުރި ދައުވާ ސާބިތުނުވި ނިންމުން އިސްތިއުނާފްކުރަން ދައުލަތުން ހައި ކޯޓަށް މިއަދު ހުށަހަޅައިފި އެވެ.
ޕީޖީ އޮފީހުން ނެރުނު ބަޔާނެއްގައި ފާހަގަކޮށްފައިވާ ގޮތުގައި، ދައުލަތުން ހުށަހެޅި ގިނަ ހެކިންގެ ހެކިބަސް ނުނެގުމަށް ކްރިމިނަލް ކޯޓުން ނިންމާފައިވަނީ ގޯސްކޮށެވެ. އެހެންކަމުން، އެ ކޯޓުގެ ނިންމުން ބާތިލުކޮށް، މައްސަލަ އަލުން ބެލުމަށްޓަކައި އަނބުރާ ކްރިމިނަލް ކޯޓަށް ތަހްވީލުކޮށްދޭން ދައުލަތުން ވަނީ އެދިފަ އެވެ. މީގެ އިތުރުން، ބައްސާމްގެ ދެ އެޕާޓްމެންޓްގެ މުއާމަލާތުކުރުން ހުއްޓުވުމުގެ ވަގުތީ އަމުރަކަށް ވެސް ހައި ކޯޓުގައި ވަނީ އެދިފަ އެވެ.
ދައުލަތުން އަމިން ކޮންސްޓްރަކްޝަންގެ މައްޗަށް ދައުވާ ކުރީ، އެ ކުންފުނިން ހުޅުމާލޭގައި އިމާރާތް ކޮށްފައިވާ އަމިން އެވެނިއުގެ ދެ އެޕާޓްމެންޓެއް އެފްއޭއެމްގެ ފައިސާ ބޭނުން ކޮށްގެން ގަތުމަށް ބައްސާމް ހިންގާފައިވާ މުއާމަލާތުގައި އެ ކުންފުނިން އޮޅުވާލައި މަނީ ލޯންޑްރިންއަށް އެހީވި ކަމަށް ބުނެ އެވެ. މި މައްސަލާގައި އެފްއޭއެމްގެ 1.2 މިލިއަން ޑޮލަރު ދިވެހި ރުފިޔާ އަށް މާރުކުރަން އަމިން އަށް ޖަމާކޮށްފައިވާކަން ވަނީ ހާމަވެފަ އެވެ.
ކްރިމިނަލް ކޯޓުގެ ހުކުމުގައި ބުނެފައިވަނީ، އެ ޑޮލަރަށްވާ ނަގުދު ފައިސާ އެފްއޭއެމްގެ މުވައްޒަފެއް ކަމަށްވާ ހަސަން ވަހީދާ އަމިން ކުންފުނިން ހަވާލުކުރިކަން ސާބިތުވާ ކަމަށެވެ. ނަމަވެސް، ދައުލަތުން ތުހުމަތު ކުރަނީ އެ ފައިސާ އެފްއޭއެމްގެ އެއްވެސް އެކައުންޓަކަށް ޖަމާވެފައި ނުވާ ކަމަށާއި، އަމިން އިން ކޭޝް ވައުޗާތަކެއް ތައްޔާރުކުރީ އޮޅުވާލުމުގެ ނިޔަތުގައި ކަމަށެވެ.
ކްރިމިނަލް ކޯޓުން ނިންމާފައިވަނީ ހަސަން ވަހީދު ހަވާލުވި ފައިސާ ބައްސާމްގެ އެޕާޓްމެންޓް ގަންނަން ބޭނުންކުރި ކަމަށް ބާރުދޭ އެކަށީގެންވާ ހެއްކެއް ނެތް ކަމަށެވެ. އެޕާޓްމެންޓަށް ދައްކަން ބާކީ އޮތް އަދަދާއި ހަވާލުކުރި ފައިސާގެ އަދަދު ގާތްކުރި ނަމަވެސް، އެ ފައިސާ އެޕާޓްމެންޓް ގަންނަން އަމިން އަށް ޖަމާކުރި ކަމުގެ ލިޔުމެއް ނެތުމުން، އަމިން ކުންފުނީގެ މައްޗަށް ކުށް ސާބިތުނުވާ ކަމަށް ކޯޓުން ވަނީ ކަނޑައަޅާފަ އެވެ.
އަމިން ކުންފުނީގެ މައްޗަށް ދައުވާ ސާބިތުނުވި ނަމަވެސް، މި މައްސަލައިގެ ތެރެއިން ބައްސާމް އަދީލް ޖަލީލްގެ މައްޗަށް ވަނީ ހިޔާނާތާއި މަނީ ލޯންޑްރިންގެ ދައުވާ ސާބިތުވެފަ އެވެ. އެކަމާ ގުޅިގެން ބައްސާމްގެ މައްޗަށް 23 އަހަރުގެ ޖަލު ހުކުމެއް އިއްވައި، 44 މިލިއަން ރުފިޔާއިން ވަނީ ޖޫރިމަނާކޮށްފަ އެވެ.
