މާފަންނު ސްޓޭޑިއަމް ސަރަހައްދުގައި ފީފާގެ އެހީގައި ތަރައްގީކުރާ އެރީނާ ބިން ހުސްކުރުމަށް ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ދިން 14 ދުވަހުގެ ނޯޓިސް ހަމަވިއިރު ވެސް ބިން ހުސްކޮށްފައި ނުވާތީ، އެ ތަން ހުސްކުރުމަށް އަންނަ މަހުގެ ހަތް ވަނަ ދުވަހާ ހަމައަށް އެންމެ ފަހުގެ ފުރުސަތު ދީފި އެވެ.
މި މަހުގެ ހަ ވަނަ ދުވަހު ނެރުނު ނޯޓިހާ އެއްގޮތަށް ބައެއް ފަރާތްތަކުން މުދަލާއި އުޅަނދުތައް ނަގާފައި ނުވާތީ، އެފްއޭއެމުން މިހާރު ވަނީ އިތުރު ހަތް ދުވަހުގެ މުއްދަތެއް ދިނުމަށް ނިންމާފަ އެވެ. ސަރުކާރުގެ ގެޒެޓުގައި ޝާއިއުކޮށްފައިވާ އިއުލާނުގައިވާ ގޮތުން، އަންނަ މަހުގެ ހަތެއްގެ ނިޔަލަށް ބިން ހުސްނުކޮށްފިނަމަ، އެ ތަނުގައި ހުރި އުޅަނދުތަކާއި މުދަލާއި ވަގުތީ އޮނިގަނޑުތައް އެފްއޭއެމްގެ ފަރާތުން ނަގަން ފަށާނެ އެވެ.
އެފްއޭއެމުން ބުނެފައިވަނީ މި މަސައްކަތުގެ ތެރެއިން އެއްވެސް އެއްޗަކަށް ލިބޭ އުނިކަމަކަށް ނުވަތަ ގެއްލުމަކަށް އެ އެސޯސިއޭޝަނުން ޒިންމާ ނުވާނެ ކަމަށެވެ. ބިން ހުސްކުރަންޖެހޭ ސަރަހައްދު ސާފުކޮށް އެނގޭނެ ކުރެހުމެއްވެސް މި އިއުލާނާއެކު މިހާރު ވަނީ އާންމުކޮށްފަ އެވެ.
މި ބިމަކީ ބޮޑު ދެ ފުޓްބޯޅަ ދަނޑު ހިމެނޭ ގޮތަށް ސްޕޯޓްސް އެރީނާއެއް އެޅުމަށް ސަރުކާރުން 50 އަހަރަށް އެފްއޭއެމަށް ދޫކޮށްފައިވާ ބިމެކެވެ. ނަމަވެސް، ކުރީގެ ރައީސް ބައްސާމް އަދީލް ޖަލީލްގެ ދައުރުގައި، އެކްސްކޯގެ ނިންމުމެއް ނެތި އަދި ކަމާބެހޭ އިދާރާތަކުގެ ހުއްދަވެސް ނުހޯދައި، އެތަނުގެ ބައެއް ބައިތައް ވަނީ އަމިއްލަ ވިޔަފާރިތަކުގެ ގުދަންތަކުގެ ގޮތުގައި ބޭނުންކުރުމަށް ކުއްޔަށް ދީފަ އެވެ.
އެފްއޭއެމްގެ މިހާރުގެ އެކްސްކޯއިން ވަނީ މިދިޔަ މަހުގެ 29 ގައި އެ އެއްބަސްވުންތައް ބާތިލުކޮށް، ބިން އަލުން ހޯދުމުގެ މަސައްކަތް ފަށާފަ އެވެ.
