މިދިޔަ މަހުގެ ފަހުކޮޅުން ފެށިގެން މި މަހުގެ މެދަކާ ހަމައަށް ރާއްޖެއަށް ޒިޔާރަތްކުރި ޕްރައިވެޓް ޖެޓުތަކުގެ އަދަދު އާދަޔާހިލާފަށް އިތުރުވެފައިވާކަމަށް ތަފާސްހިސާބުތަކުން ދައްކައިފި އެވެ.

މިދިޔަ އޮކްޓޯބަރު މަހުގެ 28 ވަނަ ދުވަހުން ފެށިގެން މި ނޮވެމްބަރު މަހުގެ 14 ވަނަ ދުވަހުގެ ނިޔަލަށް ރާއްޖެއަށް ޖުމްލަ 128 ޕްރައިވެޓް ޖެޓު ވަނީ ދަތުރުކޮށްފަ އެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު %166 ގެ ބޮޑު ކުރިއެރުމެކެވެ. ފާއިތުވި އަހަރުގެ މި މުއްދަތުގެ ތެރޭގައި ރާއްޖެއަށް އައިސްފައިވަނީ އެންމެ 70 ޕްރައިވެޓް ޖެޓެވެ.

މޯލްޑިވްސް އެސޯސިއޭޝަން ފޯ ޓްރެވަލް އެޖެންޓްސް އެންޑް ޓުއަރ އޮޕަރޭޓަރސް (މަޓާޓޯ) އިން ފާހަގަކުރާ ގޮތުގައި، މި ފާއިތުވެދިޔަ ދެ ހަފުތާގެ ތެރޭގައި ރާއްޖެއަށް ދުވާލަކު އެވްރެޖްކޮށް 12 އަށްވުރެ ގިނަ ޖެޓު އާދެ އެވެ. އަދި ބައެއް ދުވަސްދުވަހު މި އަދަދު 18 އަށް އަރާފައިވާކަންވެސް އެ ޖަމިއްޔާއިން ފާހަގަކުރެ އެވެ.

ރާއްޖެއަށް އަންނަ ޕްރައިވެޓް ޖެޓުތަކުގެ އަދަދު މިހާ ބޮޑަށް އިތުރުވެފައިވާ މައިގަނޑު ސަބަބަކީ، މިހާރު މެދުއިރުމަތީގައި ހިނގަމުންދާ ހަމަނުޖެހުންތައް ކަމަށް މަޓާޓޯއިން މައުލޫމާތުދެ އެވެ. މި ހަމަނުޖެހުންތަކާ ގުޅިގެން މުއްސަނދި ފަތުރުވެރިންނާއި ވިޔަފާވެރިން އެ ސަރަހައްދުގެ ބަދަލުގައި އަމާން މަންޒިލެއްގެ ގޮތުގައި ރާއްޖެ އިހްތިޔާރުކުރާ މިންވަރު ވަނީ އިތުރުވެފަ އެވެ.

ޕްރައިވެޓް ޖެޓުތަކުގައި ރާއްޖެއަށް އަންނަ ފަތުރުވެރިން އިތުރުވުމަކީ ރާއްޖޭގެ ފަތުރުވެރިކަމުގެ ސިނާއަތަށް ލިބިގެންދާ ވަރަށް ބޮޑު ކުރިއެރުމެކެވެ.