ރާއްޖެއަށް އެތެރެކުރާ ތެޔޮ ލިބުމުގެ ދަތިކަމެއް މިވަގުތަށް ނެތް ކަމަށާއި، މިހާރު ހުރި ސްޓޮކުން ތެލުގެ ބޭނުންތައް ފުއްދައި މެނޭޖްކުރެވޭނެ ކަމުގެ ޔަގީންކަން ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ދީފިއެވެ.
މެދުއިރުމަތީގައި ހިނގަމުންދާ ހަމަނުޖެހުންތަކާ ގުޅިގެން ދުނިޔޭގެ ބާޒާރުގައި ތެލާއި ގޭހުގެ އަގު އުފުލެމުންދާތީ، ރާއްޖެއަށް ތެޔޮ ލިބުމުގައި ދަތިތަކެއް ކުރިމަތިވެދާނެ ކަމަށް ބައެއް ފަރާތްތަކުން ވަނީ ކަންބޮޑުވުން ފާޅުކޮށްފައެވެ.
މިކަމާ ގުޅޭގޮތުން ސްޓީއޯއިން ބުނީ ދުނިޔޭގެ ބާޒާރުގައި ތެލުގެ އަގު އުފުލުނު ނަމަވެސް ރާއްޖެއަށް ތެޔޮ ލިބުމުގައި އެއްވެސް ހުރަހެއް މިވަގުތު ނެތް ކަމަށެވެ. އަދި އަންނަ ހަފުތާގެ ތެރޭގައި ތެލުގެ އިތުރު ދެ ޝިޕްމެންޓެއް ރާއްޖެއަށް ލިބޭނެ ކަމަށްވެސް އެ ކުންފުނިން ހާމަކުރިއެވެ.
ރާއްޖެއަށް އެތެރެކުރާ ޕެޓްރޯލާއި ޑީސަލަކީ އެންމެ މަތީ މިންގަނޑަށް ސާފުކޮށްފައިވާ ތެޔޮ ކަމަށްވާތީ، ދުނިޔޭގެ ބާޒާރުގައި ސާފުނުކުރާ ތެލުގެ އަގަށް އަންނަ ބަދަލުތަކުގެ އަސަރު މި ބާވަތްތަކުގެ އަގަށް ބޮޑުތަނުން ކުރެއެވެ.
ތެލުގެ އިތުރުން، ކައްކާ ގޭހުގެ އާ ޝިޕްމެންޓެއްވެސް އަންނަ ހަފުތާގައި ލިބޭނެ ކަމަށް އެސްޓީއޯއިން ބުނެއެވެ.
މިވަގުތު ގޭހުގެ ޑިމާންޑް އިތުރުވެފައިވާތީ، އެސްޓީއޯގެ ސަބްސިޑަރީ ކުންފުނި، މޯލްޑިވް ގޭހުން ދަނީ ގޭސް ވިއްކުން ވަގުތީ ގޮތުން ލިމިޓް ކުރަމުންނެވެ. އެގޮތުން 10 ކިލޯގެ ގޭސް ފުޅީގެ ބަދަލުގައި މިހާރު ޑިސްކައުންޓް ރޭޓެއްގައި ވިއްކަމުންދަނީ 5 ކިލޯގެ ގޭސްފުޅިއެވެ. މިއީ މި ހަފުތާއަށް އެކަނި އެޅި ފިޔަވަޅެއް ކަމަށާއި، އާ ޝިޕްމެންޓް ލިބުމާއެކު އާންމު އުސޫލުން ގޭސް ލިބޭނެ ކަމަށް އެސްޓީއޯއިން ބުންޏެވެ.
ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެން ރާއްޖޭގައި ތެޔޮ ވިއްކާ އަގަށްވެސް ވަނީ ބަދަލުތަކެއް އައިސްފައެވެ. ފިނޭންސް މިނިސްޓަރު މޫސާ ޒަމީރު މީގެ ކުރިން ވިދާޅުވެފައިވަނީ، ރާއްޖޭގައި ތެލުގެ އަގު ކަނޑައަޅަނީ އެތެރެކުރާ ޝިޕްމެންޓްތަކުގެ ވެއިޓެޑް އެވަރޭޖަށް ބަލައިގެން ކަމަށެވެ. އެހެންކަމުން ބައިނަލްއަގުވާމީ ބާޒާރަށް އަންނަ ކޮންމެ ބަދަލެއްގެ އަސަރު ރާއްޖޭގެ ބާޒާރުން ފެންނާނެއެވެ.
ސަރުކާރުން ހާމަކުރި ގޮތުގައި، ތެލުގެ އަގު އުފުލުނު ނަމަވެސް އެސްޓީއޯގެ ފައިދާއިން ބައެއް ސަބްސިޑައިޒްކޮށް، އަގަށް އަންނަ ބޮޑެތި ބަދަލުތައް ކުޑަކުރުމަށް ދަނީ މަސައްކަތް ކުރަމުންނެވެ. އަދި ދުނިޔޭގެ އެހެން ގައުމުތަކާ އަޅާބަލާއިރު ރާއްޖޭގައި އަދިވެސް ތެޔޮ ވިއްކަމުންދަނީ ނިސްބަތުން ހެޔޮ އަގެއްގައިކަން ސަރުކާރުން ފާހަގަކުރެއެވެ.
