ހއ. ހޯރަފުށީގައި ބުޅަލެއް ދަންޖައްސައި، ރަހުމުކުޑަ ގޮތަކަށް މަރާލި މައްސަލައެއް ފުލުހުން ތަހުގީގު ކުރަން ފަށައިފިއެވެ.
ފުލުހުން މިއަދު ބުނީ ހޯރަފުށީގައި ބުޅަލަކަށް ގަސްދުގައި އަނިޔާކޮށް، މަރާލާފައިވާ ކަމަށް ބުނާ މައްސަލައެއް މިދިޔަ ބުރާސްފަތި ދުވަހުގެ ރޭ ފުލުހުންނަށް ހުށަހަޅާފައިވާ ކަމަށެވެ.
މި މައްސަލައާ ގުޅިގެން މިހާތަނަށް ތިން މީހަކާ ސުވާލުކޮށް، ތަހުގީގަށް ބޭނުންވާ ބަޔާން ނަގާފައިވާ ކަމަށް ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވެއެވެ. މި އަމަލު ހިންގި ކަމަށް ތުހުމަތުކުރެވޭ މީހުންގެ ފޮޓޯތަކާއި ވީޑިއޯތައް މިހާރު ވަނީ ސޯޝަލް މީޑިއާގައި އާންމުވެފައެވެ.
ސޯޝަލް މީޑިއާގައި އާންމުވެފައިވާ ވީޑިއޯތަކުން ފެންނަ ގޮތުގައި، އެ ބުޅާ ދަންޖެއްސުމަށްފަހު މަރުވުމުން ދަމާފައި ގެންގޮސް ވަނީ މޫދަށް އެއްލާލާފައެވެ. އިންސްޓަގްރާމްގައި މި ވީޑިއޯތައް ހިއްސާކުރި ފަރާތުން ބުނެފައިވަނީ އެއީ ބަނޑުބޮޑު ބުޅަލެއް ކަމަށާއި، އެ ބުޅަލަށް އަނިޔާކުރާ މަންޒަރު ފެންނަ ވީޑިއޯތައް އޭނާއަށް ފޮނުވީ އެ ރަށުގެ މީހެއް ކަމަށެވެ.
މި ހާދިސާއާ ގުޅިގެން ގިނަ ބަޔަކު އަންނަނީ ސޯޝަލް މީޑިއާގައި ނުރުހުން ފާޅުކުރަމުންނެވެ. އަދި ޖަނަވާރުންނަށް މިފަދަ ބޮޑެތި އަނިޔާތައް ކުރާއިރު ކަމާބެހޭ ފަރާތްތަކުން އެކަށީގެންވާ ފިޔަވަޅު ނާޅާ ކަމަށް ބުނެ ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ. މީގެ ކުރިން 2022 ވަނަ އަހަރުވެސް ރާއްޖޭގައި ބުޅަލެއް ދަންޖެއްސި މައްސަލައެއް ފެންމަތިވެފައިވެއެވެ.
ދިވެހިރާއްޖޭގެ ގާނޫނުލްއުގޫބާތު ބުނާގޮތުން އަނިޔާވެރިކަމާ އެކު ޖަނަވާރަކާ މެދު އަމަލުކުރުމަކީ ކުށެކެވެ. އަދަބު ކަނޑައެޅުމުގެ އަސާސީ މިންގަނޑުން ބަލާއިރު، މިފަދަ ކުށެއް ކުރާ މީހަކަށް އެއް މަހާއި ހަ ދުވަހުގެ ޖަލު ހުކުމެއް އަންނާނެއެވެ.
