ރައީސް ޑރ. މުހައްމަދު މުއިއްޒުގެ ދެކަނބަލުންގެ އީދު ސަލާންކުރެއްވުން އެހެން އަހަރުތަކެކޭ ވެސް އެއްފަދައިން މި އަހަރުގެ ފިތުރު އީދު ދުވަހުގެ ހެނދުނު މުލީއާގޭގައި އޮންނާނެ ކަމަށް ރައީސް އޮފީހުން މިއަދު ބުނެފި އެވެ.

އެކަމާ ގުޅިގެން ރައީސް އޮފީހުން ބުނީ ރައީސް ޑރ. މުއިއްޒާއި އެ މަނިކުފާނުގެ އަނބިކަނބަލުން ސާޖިދާ މުހައްމަދުގެ އީދު ސަލާންކުރެއްވުން ބޭއްވުމަށް ހަމަޖެހިފައި ވަނީ އީދު ދުވަހުގެ ހެނދުނު 9:00 އިން 11:00 އަށް ރައީސްގެ ރަސްމީ ގެ، މުލީއާގޭގައި ކަމަށެވެ.

އެގޮތުން ރައީސްގެ ދެ ކަނބަލުންނާ އީދު ސަލާމް ކުރެއްވުމަށް އާންމުންނަށާއި ދައުލަތުގެ އެކި މަގާމުތަކުގައި ތިއްބެވި ބޭފުޅުންނަށާއި ބޭރުގެ އިއްޒަތްތެރިންނަށާއި ރާއްޖޭގެ އެކި ކުންފުނިތަކުގެ އިތުރުުން އަމިއްލަ އެކިއެކި ޖަމިއްޔާތަކުގެ މަންދޫބުންނަށް ރައީސްގެ ދެކަނބަލުން ދައުވަތު އަރުވާ ކަމަށް ރައީސް އޮފީހުން ވަނީ ބުނެފަ އެވެ.

ހަމައެހެންމެ ވީހާ ވެސް ގިނަ އަދަދެއްގެ ކުޑަކުދިންނާއި ޒުވާނުނަށް، މި އަހަރުގެ އީދު ސަލާމުގައި ބައިވެރިވުމަށް ވެސް ރައީސްގެ ދެކަނބަލުން ދައުވަތު އަރުވާ ކަމަށް ރައީސް އޮފީހުން މައުލޫމާތު ދީފައިވެ އެވެ.

އޭގެ އިތުރުން އީދު ސަލާންކުރުމަށް ދާ މީހުން މުލީއާގެ އަށް ވަނުމަށް ހަމަޖެހިފައި ވަނީ މެދުޒިޔާރަތް މަގަށް ހުންނަ މުލީއާގޭ ބޮޑު ދޮރޯށިން ކަމަށް އެ އޮފީހުން ވަނީ ބުނެފަ އެވެ.