ހެލްތު ޕްރޮޓެކްޝަން އެޖެންސީ (އެޗް.ޕީ.އޭ) އިން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، މިދިޔަ ފެބުރުވަރީ މަހު ރާއްޖޭގައި ގައިން ގަޔަށް އަރާ ބަލިތައް ފެތުރޭ މިންވަރު އޭގެ ކުރީ މަހާ އަޅާބަލާއިރު ވަނީ ބޮޑުތަނުން ދަށަށް ގޮސްފައެވެ.
އެޗް.ޕީ.އޭގެ ތަފާސްހިސާބުތަކުން ދައްކާގޮތުގައި، ވޭތުވެދިޔަ މަހު އެންމެ ގިނައިން ރިޕޯޓުކޮށްފައިވަނީ އަރިދަފުސް ރޯގާގެ ކޭސްތަކެވެ. އެގޮތުން ޖަނަވަރީ މަހު 35،693 މީހުންނަށް އަރިދަފުސް ރޯގާ ޖެހިގެން ރިޕޯޓުކޮށްފައިވާއިރު، ފެބުރުވަރީ މަހު މި އަދަދު ވަނީ 23،573 އަށް ތިރިވެފަ އެވެ. މިއީ ގާތްގަނޑަކަށް 12،000 ކޭސްގެ މަދުވުމެކެވެ.
ދެވަނައަށް އެންމެ ގިނައިން ރިޕޯޓުކޮށްފައިވަނީ ބޭރަށް ހިންގުމާއި ހޮޑުލުމުގެ ކޭސްތަކެވެ. ޖަނަވަރީ މަހު ބޭރަށް ހިންގުމުގެ 8،429 ކޭސް ރިޕޯޓުކޮށްފައިވާއިރު، ފެބުރުވަރީ މަހު މި އަދަދު ވަނީ 7،196 އަށް ދަށަށް ގޮސްފަ އެވެ.
މީގެ އިތުރުން، މަދިރީގެ ޒަރިއްޔާއިން ފެތުރޭ ބަލިތައް މަދުކުރުމަށް ކުރެވުނު މަސައްކަތްތަކާއެކު، ޑެންގީ ހުން ޖެހިގެން ރިޕޯޓުކުރި މީހުންގެ އަދަދުވެސް ވަނީ ފާހަގަކޮށްލެވޭ މިންވަރަކަށް ދަށަށް ގޮސްފައެވެ. އެގޮތުން ޖަނަވަރީ މަހު 668 މީހަކަށް ޑެންގީ ޖެހިގެން ރިޕޯޓުކުރިއިރު، ފެބުރުވަރީ މަހު އެ އަދަދު ވަނީ 412 އަށް މަދުވެފަ އެވެ.
އިންފްލުއެންޒާގެ ހާލަތަށް ބަލާއިރު، ޖަނަވަރީ މަހު 99 މީހަކު ޕޮޒިޓިވްވެފައިވީ ނަމަވެސް، ފެބުރުވަރީ މަހު އިންފްލުއެންޒާއަށް ޕޮޒިޓިވްވެފައިވަނީ އެންމެ 8 މީހުންނެވެ.
ގައިން ގަޔަށް އަރާ ބަލިތައް މަދުވަމުންދިޔަ ނަމަވެސް، ބަލިތަކުން ރައްކާތެރިވުމުގެ ގޮތުން ސާފުތާހިރުކަމަށް ސަމާލުކަން ދިނުމަށާއި، މަދިރި އާލާވާ ތަންތަން ނައްތާލުމަށް އެޗް.ޕީ.އޭ އިން އަބަދުވެސް އިރުޝާދު ދެ އެވެ.
