ސަރުކާރު ހިންގާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ފަރާތުން މިއަދު މާލޭގައި ބޭއްވި ސައިކަލު ބުރަށް އާންމުންގެ ފަރާތުން، ހާއްސަކޮށް ޒުވާނުންގެ ފަރާތުން ބޮޑު ތަރުހީބެއް ލިބިއްޖެ އެވެ.
މިއަދު ހަވީރު 16:15 ގައި ބޮޑުތަކުރުފާނު މަގު، މޭރީބްރައުން ކުރިމަތިން ފެށި މި ސައިކަލު ބުރަކީ ކުރިއަށް އޮތް ލޯކަލް ކައުންސިލް އިންތިހާބާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީ (އތމ) ގެ އިންތިހާބުގެ އިތުރުން، ބޮޑު ދެ އިންތިހާބު އެއްދުވަހެއްގައި ބޭއްވުމާ މެދު ރައްޔިތުންގެ މެދުގައި ނެގުމަށް ހަމަޖެހިފައިވާ ފެންނަ ނުފެންނަ ވޯޓަށް ތައްޔާރުވުމުގެ ގޮތުން ކުރިއަށް ގެންދިޔަ ކެމްޕެއިން ހަރަކާތެކެވެ.
މި ހަރަކާތުގައި ބައިވެރިވުމަށް ޕާޓީއަށް ތާއިދުކުރާ އެންމެހާ ލޮބުވެތި ރައްޔިތުންނަށް ޕީއެންސީން ކުރިން ދައުވަތު އަރުވާފައިވާއިރު، މިއަދުގެ މި ހަރަކާތުން ފެނިގެންދިޔައީ ޕާޓީއަށް އޮތް ވަރުގަދަ ތާއިދެވެ. ޕީއެންސީން މިހާރު ކުރިއަށްގެންދާ ކެމްޕެއިން ހަރަކާތްތަކަކީ ރާއްޖޭގެ ތާރީހުގައި ވެސް ކައުންސިލް އިންތިހާބަކަށް އެއްވެސް ޕާޓީއަކުން ނުކުރާހާ ފުޅާ އަދި ވަރުގަދަ މަސައްކަތްތަކެކެވެ.
Advertisement
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ރާއްޖޭގެ ހުރިހާ ކަންކޮޅުތަކެއްގައި ފަށަން ހަމަޖެހިފައިވާ މަޝްރޫއުތަކާއި، މިހާރު ފަށާފައިވާ މަޝްރޫއުތައް ބާރު ސްޕީޑެއްގައި ކުރިއަށް ގެންގޮސް ނިންމާލެއްވުމަށްޓަކައި، ސަރުކާރަށް އެއްބާރުލުން ދޭނެ ޕީއެންސީގެ ހުރިހާ ކެންޑިޑޭޓުންނަށް ވޯޓު ދެއްވުމަށް ރައްޔިތުންނަށް ގޮވާލައްވާފަ އެވެ.
މި އިންތިހާބަށް ރާއްޖޭގެ ބޮޑު ދެ ޕާޓީ ކަމަށްވާ ޕީއެންސީ އާއި އެމްޑީޕީން ކެމްޕެއިން ކުރަމުންދާއިރު، ސަރުކާރު ހިންގާ ޕީއެންސީގެ ހަރަކާތްތައް ވަރަށް ފޯރިއާއެކު ކުރިއަށްދާކަން ފާހަގަކުރެވެއެވެ. ނަމަވެސް، އިދިކޮޅު އެމްޑީޕީގެ ކެމްޕެއިން ހަރަކާތްތައް މިއަދާ ހަމައަށް ފެންނަނީ ވަރަށް ފަޑުކޮށް ކަމަށް ސިޔާސީ މަސްރަހު ދިރާސާކުރާ ފަރާތްތަކުން ބުނެއެވެ.
މިއަދުގެ ސައިކަލު ބުރު ނިންމާލާފައިވަނީ މާލޭގެ ބޮޑެތި މަގުތަކުގައި ބުރުޖެހުމަށްފަހު، ޕާޓީގެ ސަޕޯޓަރުންގެ މެދުގައި އޮތް އެއްބައިވަންތަކަން ހާމަކޮށްދެމުންނެވެ.
