ސްޓޭޓް ޓްރޭޑިން އޯގަނިޒޭޝަން (އެސްޓީއޯ)ގެ ފައިދާ ކުޑަކޮށްގެން ނަމަވެސް، ދުނިޔޭގެ ބާޒާރުގައި ތެލުގެ އަގު އުފުލުނަސް ރާއްޖޭގައި ތެލުގެ އަގު މަތިވިޔަ ނުދީ ހިފަހައްޓާނެ ކަމުގެ ޔަގީންކަން ފިނޭންސް މިނިސްޓަރު މޫސާ ޒަމީރު ދެއްވައިފިއެވެ.

ބައިނަލްއަގުވާމީ ގޮތުން ހިނގަމުންދާ ހަނގުރާމަތަކުގެ ސަބަބުން ރާއްޖެއަށް ކުރިމަތިވެދާނެ ދަތިތަކަށް ހައްލު ހޯދުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އުފައްދަވާފައިވާ މިނިސްޓަރުންގެ ހާއްސަ ކޮމިޓީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ޒަމީރު ވިދާޅުވީ، ތެލުގެ ބާޒާރުގައި ހާލަތު ގޯސްވި ނަމަވެސް ރާއްޖޭގައި އެކަން ކޮންޓްރޯލް ކުރެވޭނެ ކަމަށެވެ. އަދި މިހާރު ތެލުގެ އަގަށް ގެނެސްފައިވާ ބަދަލަކީ ކަންކަން ވަރަށް ބޮޑަށް ދިރާސާކުރުމަށްފަހު ގެނައި ބަދަލެއްކަން އޭނާ ފާހަގަކުރެއްވިއެވެ.

މިނިސްޓަރު ވިދާޅުވި ގޮތުގައި ރާއްޖެއަށް ބޭނުންވާ ތެޔޮ ރައްކާކުރުމާއި އުފުލުމުގެ ގާބިލުކަން މިހާރު ވަނީ އިތުރުވެފައެވެ.

"މިއަހަރު ފެށުނުއިރު އެސްޓީއޯއިން 24,500 މެޓްރިކް ޓަނުގެ އާ ބޯޓެއް އޮތީ ގަނެފަ. އެއާއެކު އަޅުގަނޑުމެންނަށް ބޭނުންވާ ތެޔޮ އަބަދުވެސް ޓްރާންސިޓްކޮށް އެބަ ލިބޭ. އަދި 22,000 މެޓްރިކް ޓަނުގެ ބޯޓެއް ވެސް އޮންނާނެ،" މިނިސްޓަރު ވިދާޅުވިއެވެ.

ދުނިޔޭގެ ބާޒާރުގައި ތެލުގެ އަގު އިތުރަށް ބޮޑުވާނަމަ، ސަރުކާރުގެ ވިސްނުމަކީ އެސްޓީއޯއަށް ލިބޭ ފައިދާއިން ބައެއް އުނިކޮށްގެން ނަމަވެސް ރައްޔިތުންނަށް ފޯރުކޮށްދޭ ތެލުގެ އަގު އެއްވަރެއްގައި ހިފެހެއްޓުމެވެ. މިނިސްޓަރު ވިދާޅުވީ ބައިނަލްއަގުވާމީ މާކެޓަށް އައި ބަދަލާ އަޅާބަލާއިރު ރާއްޖޭގައި ތެލުގެ އަގަށް އައީ ވަރަށް ކުޑަ ބަދަލެއް ކަމަށާއި، އެއީ ވަރަށް ބޮޑަށް ބަލައިގެން ކުރާ ކަމެއް ކަމަށެވެ.

"އިތުރަށް އަގު ބޮޑުވާނަމަ، އެސްޓީއޯގެ ފައިދާއިން ބައެއް ސަބްސިޑައިޒްކޮށް އެބްޒޯބް ކުރެވޭނެ ގޮތަށް ދަނީ މަސައްކަތް ކުރަމުން،" މިނިސްޓަރު ވިދާޅުވި އެވެ.

ތެޔޮ ލިބުމުގެ ދަތިކަމާ ގުޅޭގޮތުން ވާހަކަދައްކަވަމުން ޒަމީރު ވިދާޅުވީ، މިހާތަނަށް ރާއްޖެއަށް ތެޔޮ ލިބުމުގައި އެއްވެސް ހުރަހެއް ކުރިމަތިވެފައި ނުވާ ކަމަށެވެ. އަދި ކުރިއަށް އޮތް ތަނުގައި ވެސް ތެޔޮ ގެންނަ ތާވަލާ އެއްގޮތަށް މެދުކެނޑުމެއް ނެތި ތެޔޮ ލިބެމުންދާނެ ކަމުގެ ޔަގީންކަން އޭނާ ދެއްވިއެވެ.

ނިންމާލަމުން މިނިސްޓަރު ފާހަގަކުރެއްވީ، ސަރުކާރުން މިހާރުވެސް ތެލަށް ބޮޑު ސަބްސިޑީއެއް ދެމުންދާ ކަމަށެވެ. ނަމަވެސް ބާޒާރުގެ އަގުތައް އަތްނުފޯރާ ފަށަށް އުފުލިއްޖެ ހާލަތެއްގައި، އެސްޓީއޯގެ ފައިދާއިން އެ ހަރަދުތައް ހަމަޖައްސައިގެން ވިޔަސް އަގުތައް ކޮންޓްރޯލް ކުރާނެ ކަމަށް މިނިސްޓަރު ވިދާޅުވިއެވެ.