ވެލާނާ އިންޓަނޭޝަނަލް އެއާޕޯޓުން މިދިޔަ އަހަރު ފޭރިގަތް ފައިސާގެ ޖުމްލަ އަދަދު 1.9 މިލިއަން ރުފިޔާއަށްވުރެ ގިނަ ކަމަށް ޕްރޮސެކިއުޓާ ޖެނެރަލްގެ އޮފީހުން ހާމަކޮށްފިއެވެ.
ޕީޖީ އޮފީހުން މިއަދު ވަނީ މި މައްސަލައިގައި ތުހުމަތުކުރެވޭ އަށް މީހެއްގެ މައްޗަށް ދައުވާކުރަން ފޮނުވިކަން ހާމަކޮށްފަ އެވެ.
ޕީޖީ އޮފީހުން ބުނި ގޮތުގައި، މި ފޭރުމުގެ ހާދިސާ ހިނގާފައިވަނީ ބޭންކް އޮފް މޯލްޑިވްސްގެ ޑޮލަރު އެކްސްޗޭންޖް ކައުންޓަރަށް ގެންދިއުމަށްޓަކައި ދެ މުވައްޒަފަކު ފައިސާ އަޅާފައިވާ ސޫޓްކޭހެއް ހިފައިގެން އެއާޕޯޓް ޓާމިނަލްގެ ގޭޓް އެކެއްގެ ކުރިމަތީގައި ތިއްބައެވެ. އެ މީހުންނަށް ވަޅިން ބިރުދެއްކުމަށްފަހު ފައިސާ ފޭރިގަނެގެން ގޮސްފައިވަނީ ލޯންޗެއްގައި ކ. ހުރާއަށެވެ. ފުލުހުން ވަނީ ފަހުން އެ ލޯންޗު ހޯދާފައެވެ.
ފޭރިގަތް ސޫޓްކޭހުގައި ގިނަ އަދަދެއްގެ ބޭރު ފައިސާ ހުރިކަން ޕީޖީ އޮފީހުން ވަނީ ހާމަކޮށްފައެވެ. އޭގެ ތެރޭގައި 106,120 ޔޫއެސް ޑޮލަރާއި، 4,900 ޔޫރޯއާއި، 1,735 ޕައުންޑާއި، 2,610 ސިންގަޕޯ ޑޮލަރާއި، 1,345 އޮސްޓްރޭލިއަން ޑޮލަރާއި، 510 ސްވިސް ފްރޭންކާއި، 1,515 ކެނޭޑިއަން ޑޮލަރާއި، 334,000 ޖަޕަނީސް ޔެންއާއި، 10,420 ހޮންގްކޮންގް ޑޮލަރާއި، 25,000 އިންޑިއަން ރުޕީސް އަދި 600 ޗައިނީސް ޔުއާން ހިމެނެއެވެ. މީގެ އިތުރުން 23,778 ދިވެހި ރުފިޔާ ވެސް ފޭރިގަތް ތަކެތީގެ ތެރޭގައި ހިމެނެއެވެ. މިފައިސާތައް ޖުމްލަކޮށްލާއިރު 1,915,658.52 ރުފިޔާއަށް އަރައެވެ.
މި މައްސަލައިގައި ތ. ވިލުފުށި، އެހީވާގެ، އަހުމަދު މާޙިދުގެ މައްޗަށް ފޭރުމުގެ ދައުވާގެ އިތުރުން، ގޭންގު ކުށްތައް ހުއްޓުވުމުގެ ގާނޫނުގެ ދަށުން ތޫނު އެއްޗެއް ބޭނުންކޮށްގެން ބިރުދެއްކުމާއި އާންމު ތަނެއްގައި ތޫނު އެއްޗެއް ގެންގުޅުމުގެ ދައުވާ ވަނީ އުފުލާފައެވެ. ސ. ހިތަދޫ، ވަށަގުލިމާގެ، ޢަލީ އަފްޒަލްގެ މައްޗަށް ފޭރުމާއި ތޫނު އެއްޗަކުން ބިރުދެއްކުމުގައި ބައިވެރިވުމުގެ ދައުވާ ވަނީ ކޮށްފައެވެ.
މީގެ އިތުރުން ފޭރުމުގައި ބައިވެރިވުމުގެ ދައުވާ އުފުލާފައިވާ މީހުންނަކީ:
- ޢަބްދުލްއައްވަލް އިބްރާހީމް އަބޫބަކުރު (ގއ. ވިލިނގިލި، ބިނާ)
- ޙުސައިން ޝަހުދު (ކ. ގުރައިދޫ، އަޅިވިލާގެ)
- މާޒިން މޫސާ (ލ. މާވައް، ރޭޝަމް)
- އަޙްމަދު ރައިހާން ނަޢީމް (މ. ކޯރަސް)
- އިބްރާހީމް އަނޫފް (ކ. ގުރައިދޫ، އަޅިވިލާގެ)
- އިސްމާޢީލް ސިރްހާން (ރ. މަޑުއްވަރި، މީޒާން)
މި މައްސަލައިގެ ތަހުގީގަށްފަހު ޕީޖީ އޮފީހުން މިހާރު ވަނީ މި ހުރިހާ ފަރާތްތަކެއްގެ މައްޗަށް ދައުވާކުރުމަށް ކޯޓަށް ހުށަހަޅާފައެވެ.
