އެލައިޑް އިންޝުއަރެންސްގެ ފަރާތުން ކުރިއަށްގެންދާ "އައިފޯން ޑްރޮޕް ގިވްއަވޭ" އާ ގުޅުވައިގެން، ސޯޝަލް މީޑިއާގައި އެކައުންޓުތަކަކުން މަކަރާއި ހީލަތް ހިންގަމުންދާތީ އެކަމަށް ސަމާލުވުމަށް އެ ކުންފުނިން އިލްތިމާސްކޮށްފިއެވެ.

މިކަމާ ގުޅިގެން އެލައިޑުން ނެރުނު ބަޔާނެއްގައި ބުނެފައިވަނީ، މި ގިވްއަވޭގެ ބައިވެރިންނަށް ގޫގުލް ފޯމެއް ފުރުމަށް އެދި ތަފާތު އެކައުންޓުތަކުން މެސެޖު ކުރަމުންދާކަން އެ ކުންފުނީގެ ސަމާލުކަމަށް އައިސްފައިވާ ކަމަށެވެ. ނަމަވެސް، މި ގިވްއަވޭގެ ބައިވެރިންނަށް އެލައިޑް އިންޝުއަރެންސްގެ ފަރާތުން އެއްވެސް ގޫގުލް ފޯމެއް ނުވަތަ ބޭރުގެ އެއްވެސް ލިންކެއް ފޮނުވާފައި ނުވާނެ ކަމުގެ ޔަގީންކަން އެ ކުންފުނިން ދެއެވެ.

އެހެންކަމުން، ރަސްމީ ނޫން ލިންކުތައް މެދުވެރިކޮށް ޒާތީ މައުލޫމާތު ހިއްސާކުރުމަށް ނުވަތަ ފޯމު ފުރުމަށް އެދި ފޮނުވާ މެސެޖުތަކަކީ އެލައިޑް އިންޝުއަރެންސްއާ އެއްވެސް ގުޅުމެއް ހުރި މެސެޖުތަކެއް ނޫން ކަމަށް އެ ކުންފުނިން ބުނެއެވެ. އަދި އެފަދަ އެކައުންޓުތަކުން ފޮނުވާ އެއްވެސް ފޯމެއް ނުފުރުމަށާއި، އެއްވެސް ޒާތީ މަައުލޫމާތެއް ހިއްސާ ނުކުރުމަށް ބައިވެރިންނަށް ވަނީ ނަސޭހަތްތެރިވެފައެވެ.

އެލައިޑުން ބުނި ގޮތުގައި "އެލައިޑް އައިފޯން ޑްރޮޕް ގިވްއަވޭ" އާ ގުޅޭ ހުރިހާ ރަސްމީ މުއާމަލާތްތަކެއް ހިންގާނީ ހަމައެކަނި އެ ކުންފުނީގެ ރަސްމީ އިންސްޓަގްރާމް އެކައުންޓް @allied.mv މެދުވެރިކޮށެވެ.

މި ގިވްއަވޭއާ ގުޅުވައިގެން އެލައިޑްގެ ނަމުގައި އެއްވެސް ޝައްކުކުރެވޭ މެސެޖެއް ލިބިއްޖެނަމަ، އެ މެސެޖަށް އިޖާބަ ނުދެއްވައި، އެ އެކައުންޓެއް ރިޕޯޓުކުރުމަށްފަހު، ލަސްނުކޮށް އެކަން އެލައިޑަށް އެންގުމަށްވެސް ވަނީ އެދިފައެވެ.

ކަސްޓަމަރުންގެ ރައްކާތެރިކަމާއި އިތުބާރު ދެމެހެއްޓުމަށް އަބަދުވެސް އެންމެ އިސްކަމެއްދޭ ކަމަށް ބުނަމުން އެލައިޑުން ވަނީ، އޮންލައިންކޮށް ހިންގާ މިފަދަ މަކަރާއި ހީލަތުގެ އަމަލުތަކަށް ސަމާލުވެ ތިއްބެވުމަށް އާންމުންނަށް އިލްތިމާސްކޮށްފައެވެ.

މިކަމާ ގުޅޭ ސައްހަ މައުލޫމާތާއި އަޕްޑޭޓްތައް ހޯއްދެވުމަށް އެލައިޑްގެ ރަސްމީ އިންސްޓަގްރާމް އެކައުންޓް ފޮލޯ ކުރުމަށްވެސް އެ ކުންފުނިން ބުނެފައިވެއެވެ.