ރާއްޖޭގައި މަކަރާއި ހީލާތުން ހިންގާ ސްކޭމްގެ މައްސަލަތައް ހުއްޓުވުމަށްޓަކައި ގައުމީ ފެންވަރުގައާއި ބައިނަލްއަގްވާމީ ފެންވަރުގައި ވަރަށް ހަރުދަނާ ފިޔަވަޅުތަކެއް އަޅަމުންދާ ކަމަށް ދިވެހި ފުލުހުންގެ ހިދުމަތުން ހާމަކޮށްފިއެވެ. މިއަދު ބޭއްވި ނޫސްވެރިންގެ ބައްދަލުވުމެއްގައި، ސްކޭމް މަދުކުރުމަށް ކުރެވޭ މަސައްކަތްތަކާއި ހިންގާފައިވާ އޮޕަރޭޝަންތަކުގެ ތަފުސީލު ފުލުހުން ވަނީ ހާމަކޮށްފައެވެ.

ފުލުހުން ހާމަކުރިގޮތުގައި، ސްކޭމްގެ މައްސަލަތަކާ ގުޅިގެން މިހާތަނަށް 283 އެކައުންޓެއް 48 ގަޑިއިރު ތެރޭގައި ފްރީޒްކޮށްފައިވާއިރު، ކޯޓު އަމުރާއެކު އިތުރު 535 އެކައުންޓެއް ވަނީ 3 މަސްދުވަހަށް ފްރީޒްކޮށްފައެވެ.

މީގެ އިތުރުން، ޒިންމާދާރުކަން ކުޑަގޮތަކަށް އަމިއްލަ ބޭންކު އެކައުންޓްތައް އެހެން ފަރާތްތަކަށް ކުއްޔަށްދޭ ނުވަތަ ބޭނުންކުރަންދޭ ފަރާތްތަކާ މެދު ޕީޖީ އޮފީހާ ގުޅިގެން މަނީ ލޯންޑަރިންގެ ދައުވާ އުފުލާނެ ކަމަށް ފުލުހުން ވަނީ ވިދާޅުވެފައެވެ. މި ވިއުގަތަކުގައި ހަރަކާތްތެރިވާ 53 ފަރާތެއް ހައްޔަރުކޮށް، 25 މައްސަލައެއް ޕްސެކިއުޓްކޮށްފައިވާއިރު، ދައުވާ ކުރެވުނު 4 ފަރާތަކަށް މިހާރު ވަނީ ހުކުމްކޮށްފައެވެ.

ސްކޭމް ނެޓްވޯކްތައް ނައްތާލުމަށް ބޭރުގެ މުއައްސަސާތަކާ ގުޅިގެން މުހިންމު އޮޕަރޭޝަންތަކެއްވެސް ވަނީ ހިންގާފައެވެ. އެގޮތުން، މޭ މަހުގެ 17 ވަނަ ދުވަހު ރާއްޖޭގައި 'ފްރޮންޓިއަރ އޮޕަރޭޝަން 3' ގެ ކޮންކްލޫޝަން ބާއްވާފައިވާއިރު، ޖުލައި 1 އިން ފެށިގެން 30 ގައުމު ގުޅިގެން އަބޫދާބީ ފުލުހުން ކުރިއަށްގެންދާ އޮޕަރޭޝަނެއް މި މަހުގެ 30 ވަނަ ދުވަހު ނިމޭނެއެވެ. މި އޮޕަރޭޝަންގެ ތެރެއިން އިންސްޓަގްރާމް، ޓިކްޓޮކް އަދި މާކެޓްޕްލޭސްތައް މެދުވެރިކޮށް ހިންގާ ސްކޭމްތައް މަދުކުރުމަށް ދުރާލާ ފިޔަވަޅުތައް އެޅުމުގެ ފުރުސަތު ވަނީ ފަހިވެފައެވެ.

ކުށުން ސަލާމަތްވުމަށް އެންމެ އިސްކަމެއްދެނީ ހޭލުންތެރިކުރުމަށް ކަމަށް ފުލުހުން ފާހަގަކުރިއެވެ. އެގޮތުން ސޯޝަލް މީޑީއާގައި 7,000 އަށްވުރެ ގިނަ އެވެއަރނަސް މެޓީރިއަލް ހިއްސާކޮށް، ރ. އަތޮޅާއި ގދ. އަތޮޅުގެ ރަށްރަށަށް ގޮސް ގެއިން ގެއަށް ޒިޔާރަތްކޮށް ޖުމްލަ 34 ސެޝަން ވަނީ ހިންގާފައެވެ.