ސްކޭމްގެ މައްސަލަތައް ހުއްޓުވުމަށްޓަކައި ދުނިޔޭގެ އެކި ގައުމުތަކުގެ ނޭޝަނަލް އެންޓި-ސްކޭމް ސެންޓަރުތައް ގުޅިގެން ހިންގާ ބައިނަލްއަގުވާމީ ބޮޑު ހަރަކާތް ކަމަށްވާ "އޮޕަރޭޝަން ފްރޮންޓިއާ+3" ރަސްމީކޮށް ފަށައިފިއެވެ.

މި އޮޕަރޭޝަނަކީ ބޯޑަރު ހުރަސްކޮށް ހިންގާ ސްކޭމްތަކާއި މާލީ ކުށްތަކާ ދެކޮޅަށް ބައިނަލްއަގުވާމީ ފެންވަރުގައި ހިންގޭ ތިންވަނަ ބޮޑު އޮޕަރޭޝަނެވެ.

މި އޮޕަރޭޝަން ކުރިއަށް ގެންދާ "ފްރޮންޓިއާ+ އެލަޔަންސް" ގައި ރާއްޖެ ހިމެނޭހެން ޖުމުލަ 13 ގައުމެއް ބައިވެރިވެއެވެ. އޭގެ ތެރޭގައި އޮސްޓްރޭލިއާ، ބްރޫނާއީ، ކެނެޑާ، ހޮންގް ކޮންގް، އިންޑޮނޭޝިއާ، ސައުތު އެފްރިކާ، މަކާއޯ، މެލޭޝިއާ، ދުބާއީ، ސިންގަޕޫރު، ސައުތު ކޮރެއާ އަދި ތައިލޭންޑް ހިމެނެއެވެ.

މި އެލަޔަންސްގެ މައިގަނޑު ބޭނުމަކީ ޓްރާންސްނޭޝަނަލް ސްކޭމްތައް ހުއްޓުވުމަށްޓަކައި ތަންފީޒީ އިދާރާތައް ގުޅިގެން މަސައްކަތް ކުރުމެވެ.

މި އޮޕަރޭޝަންގެ މަސައްކަތްތައް މައިގަނޑު ހަތަރު އަސާސެއްގެ މައްޗަށް ބިނާވެފައިވެއެވެ. އެއީ:

1. ވަގުތުން ފިޔަވަޅު އެޅުން: ޝައްކުކުރެވޭ ބޭންކު އެކައުންޓްތަކާއި 'މަނީ މިއުލްސް' ދެނެގަނެ ފައިސާގެ މުއާމަލާތްތައް ވަގުތުން ހުއްޓުވުން.
2. އިންޓެލިޖެންސް ހިއްސާކުރުން: އަލަށް އުފެދޭ ސްކޭމް އުކުޅުތަކާއި ނެޓްވޯކްތަކުގެ މައުލޫމާތު ރިއަލް ޓައިމްކޮށް ގައުމުތަކުގެ މެދުގައި ބަދަލުކުރުން.
3. ޑޭޓާގެ އަލީގައި މަސައްކަތްކުރުން: ސްކޭމްތަކުގެ ފަރުމާ ދެނެގަނެ، ކުށްވެރިންގެ އުކުޅުތައް ދިރާސާކޮށް ފައިސާ އަނބުރާ ހޯދޭނެ މަގުތައް ފަހިކުރުން.
4. ބައިނަލްއަގުވާމީ އެއްބާރުލުން: ބޯޑަރު ހުރަސްކޮށް ހިންގޭ ތަހުގީގުތައް ހަރުދަނާކޮށް ގައުމުތަކުގެ މެދުގައި އޮންނަ ގުޅުން ބަދަހިކުރުން.

މި އޮޕަރޭޝަންގެ ތެރެއިން އިންވެސްޓްމަންޓް ސްކޭމް، ރޮމޭންސް ސްކޭމް، އީ-ކޮމާސް، ޖޮބް ސްކޭމް، ލޯން ސްކޭމް، ފިޝިން އަދި ސަރުކާރުގެ އިދާރާތަކުގެ ނަމުގައި ހިންގާ ސްކޭމްތަކަށް ހާއްސަ ސަމާލުކަމެއް ދިނުމަށް ވަނީ ނިންމާފައެވެ.

މި އަހަރުގެ މާރިޗު 10 އިން މެއި 7 އަށް ކުރިއަށްދާ މި އޮޕަރޭޝަންގެ ނަތީޖާ މެއި 13 ގައި ހުށަހެޅުމަށް ހަމަޖެހިފައިވާއިރު، އެންމެ މުހިންމު ހަރަކާތް ކަމަށްވާ ބައިނަލްއަގުވާމީ ޕްރެސް ކޮންފަރެންސް ބޭއްވުމަށް ހަމަޖެހިފައިވަނީ މެއި 20 ވަނަ ދުވަހު ދިވެހިރާއްޖޭގައެވެ.

މި ބްރީފިންގައި އެލަޔަންސްގެ ހުރިހާ ގައުމުތަކުން ހޯދި ކާމިޔާބީތަކާއި، ހައްޔަރުކުރެވުނު މީހުންނާއި ފްރީޒްކުރެވުނު ފައިސާގެ ތަފާސްހިސާބުތައް ހާމަކުރާނެއެވެ.

މިދިޔަ އަހަރުގެ އޮޕަރޭޝަންގައި ދިވެހި ފުލުހުންގެ އެންޓި-ސްކޭމް ސެންޓަރުން ވަނީ ރާއްޖެއިން ގެއްލުނު ފައިސާ އަނބުރާ ހޯދުމުގައި ބައިނަލްއަގުވާމީ ފެންވަރުގައި ބޮޑު ކާމިޔާބީއެއް ހާސިލުކޮށްފައެވެ.