މާލޭ ނޯތު ހާބަރުން އުޅަނދުފަހަރަށް ޖާގަ ދިނުމުގައި ގެންގުޅެމުން އައި އުސޫލަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބޮޑެތި ބަދަލުތަކެއް ގެނެސްފި އެވެ.
އެމްޕީއެލް އިން މިއަދު ކުރި އިއުލާނެއްގައި ބުނީ އާ އުސޫލަށް އަމަލުކުރަން ފަށާނީ މި މަހުގެ 14 ވަނަ ދުވަހުގެ ހެނދުނު 08:00 އިން ފެށިގެން ކަމަށެވެ.
އާ އުސޫލުގެ ދަށުން ޖާގަ ދިނުމަށް ހަމަޖެހިފައިވާ ގޮތް
އާ އުސޫލުގައިވާ ގޮތުން، މުދަލާއި ޕަސެންޖަރުން އުފުލާ އުޅަނދުފަހަރު ނޯތު ހާބަރުގެ ކީވޯލަށް ދައްކަންޖެހޭ ފައިސާ ދައްކައި ނިމުމަށްފަހު، ފުރާ ވަގުތުން ފެށިގެން ކޮންމެ ކިޔުއެއްގައި ވެސް ނަން ނޯޓު ކުރެވިދާނެ އެވެ. ކިޔު ތަރުތީބުން ޖާގަ ދިނުމަށް ހާބަރު އޮފީހުން ގުޅުމުން، ދެ ގަޑިއިރު ތެރޭގައި ކީވޯލަށް ކައިރި ނުކުރެވިއްޖެނަމަ ނުވަތަ ފޯނަށް ނުގުޅިއްޖެ ހާލަތެއްގައި، އެ އުޅަނދެއް އޭ-ޒޯން އަދި ސީ-ޒޯން ކިޔުއިން ވަގުތީ ގޮތުން "ހޯލްޑް" ކުރެވޭނެ އެވެ.
މިގޮތަށް "ހޯލްޑް" ކުރެވޭ އުޅަނދުތައް އަލުން ކިޔުއަށް އިތުރުކުރެވޭނީ، އެ އުޅަނދެއް މާލެ ސަރަހައްދަށް ވަނުމަށްފަހު ނޯތު ހާބަރު އޮފީހަށް ގުޅައި އެކަމަށް އެދުމުންނެވެ. އަދި އަލުން ކިޔުއަށް އިތުރުކުރާ އުޅަނދުތަކަށް ޖާގަ ދިނުމަށް ގުޅާނީ "އަންހޯލްޑް" ކުރިތާ ދެ ގަޑިއިރު ފަހުންނެވެ. މިގޮތަށް ގުޅުމުން ވެސް ޖާގައަށް ކައިރި ނުކުރެވިއްޖެނަމަ، ގިނަވެގެން ތިން ފަހަރު ޖާގަ ފަސްކޮށްދެވޭނެ އެވެ. ނަމަވެސް ހަތަރު ވަނަ ފަހަރު ކިޔުއިން ކެންސަލް ވާނެ ކަމަށް އެމްޕީއެލް އިން ބުނެ އެވެ.
އެކްސްޕްރެސް ކިޔު އާއި އިތުރު އުސޫލުތައް
އޭ-ޒޯން އަދި ސީ-ޒޯންގައި ހޯލްޑް ކުރުމުގެ ފުރުސަތު އޮތް ނަމަވެސް، އެކްސްޕްރެސް ކިޔުގައި ހޯލްޑް ކުރުމުގެ ފުރުސަތެއް ނޯންނާނެ އެވެ. އެކްސްޕްރެސް ކިޔުއިން ޖާގަ ހުސްވެގެން ގުޅުމުން، ކީވޯލަށް ކައިރިކުރުމަށް ލިބޭނީ ހަތަރު ގަޑިއިރުގެ ވަގުތެކެވެ. މި ވަގުތުގެ ތެރޭގައި ކީވޯލަށް ކައިރި ނުކުރެވިއްޖެނަމަ ކިޔުއިން ކެންސަލް ވާނެ އެވެ. މީގެ އިތުރުން، އޭ-ޒޯން އަދި ސީ-ޒޯން ކިޔުއިން ހޯލްޑް ކުރުމަށްފަހު އަންހޯލްޑް ނުކޮށް ބޭއްވޭނީ ގިނަވެގެން ފަސް ދުވަސް ނުވަތަ 120 ގަޑިއިރަށެވެ.
އެމްޕީއެލް އިން އިތުރަށް ބުނީ، ނޯތު ހާބަރުން ފުރުމަށްފަހު ކިޔުގައި ނަން ނޯޓު ކުރުމާއި، ކިޔުއިން ކެންސަލްވުމަށްފަހު އަލުން ނަން ނޯޓުކުރުމަކީ އެ އުޅަނދެއްގެ ޒިންމާއެއް ކަމަށެވެ.
މީގެ އިތުރުން، މާލޭ ލޯކަލް މާރުކޭޓު ކުރިމައްޗަށް ކައިރިކުރާ އުޅަނދުފަހަރަށް ފެނާއި ކަރަންޓުގެ ހިދުމަތް ފޯރުކޮށްދިނުމުގެ މަސައްކަތް ވެސް އެ ކުންފުނިން މިހާރު އަންނަނީ ކުރަމުންނެވެ. އެއީ މީގެ ކުރީން އެ ސަރަހައްދުން ލިބެން ހުންނަ ހިދުމަތެއް ނޫނެވެ.
