މި އަހަރުގެ ރަމަޟާން މަހުގެ ފަހު ދިހައެއްގެ ދުވަސްތަކަކީ ސަރުކާރު ބަންދު ދުވަސްތަކެއްގެ ގޮތުގައި ރައީސް ޑރ. މުޙައްމަދު މުޢިއްޒު ކަނޑައަޅުއްވާފައިވާތީ، އެ ދުވަސްތަކުގައި މިނިސްޓްރީ އޮފް ޑިފެންސްއިން ހިދުމަތް ދޭނެ އުސޫލު އެ މިނިސްޓްރީން ހާމަކޮށްފި އެވެ.
ޑިފެންސް މިނިސްޓްރީން މިއަދު ކުރި އިއުލާނެއްގައި ބުނެފައިވަނީ، ރަމަޟާން މަހުގެ ފަހު ދިހައެއްގެ ބަންދު ދުވަސްތަކުގައި އެ މިނިސްޓްރީއަށް ހުށަހެޅޭ އެޕްލިކޭޝަންތައް ޕްރޮސެސް ކުރުމުގެ މަސައްކަތް ކުރިއަށްދާނީ ކޮންމެ ހަފްތާއެއްގެ އަންގާރަ އަދި ބުރާސްފަތި ދުވަހު ކަމަށެވެ.
މިނިސްޓްރީން ބުނީ މި ދެ ދުވަހުގައި ހިދުމަތް ފޯރުކޮށްދޭނީ ހެނދުނު 10:00 އިން މެންދުރު 12:00އާ ހަމައަށް ކަމަށެވެ. އަދި އެއްވެސް މައުލޫމާތެއް ސާފުކުރަން ބޭނުންވާނަމަ 7382601 އަށް ގުޅުއްވުމަށް މިނިސްޓްރީން ވަނީ ބުނެފައެވެ.
މި ބަދަލު ގެނެސްފައިވަނީ ރަމަޟާން މަހުގެ ފަހު ދިހައެއްގެ ދުވަސްތަކަކީ އަޅުކަމަށް ހުސްވުމަށްޓަކައި ސަރުކާރު ބަންދު ދުވަސްތަކެއްގެ ގޮތުގައި ހަމަޖައްސާފައިވާތީ، އެ ދުވަސްތަކުގައިވެސް ރައްޔިތުންނަށް ދޭންޖެހޭ ޒަރޫރީ ހިދުމަތްތައް މެދުނުކެނޑި ފޯރުކޮށްދިނުމުގެ މަގްސަދުގަ އެވެ.
ރައީސް ޑރ. މުޢިއްޒުގެ ސަރުކާރުން މިފަދަ ނިންމުމެއް ނިންމަވާފައިވަނީ ރާއްޖޭގެ އިސްލާމީ އުސޫލުތަކަށް އިސްކަންދީ، ރަމަޟާން މަހުގެ ފަހު ދިހައެއްގެ މަތިވެރިކަން ހޯދުމަށް ރައްޔިތުންނަށް ފުރުސަތު ދިނުމަށެވެ. ވުމާއެކު، ޑިފެންސް މިނިސްޓްރީގެ ހިދުމަތްތަކަށް އެދި ހުށަހަޅާ ފަރާތްތަކުން މި ބަދަލަށް ސަމާލުވުމަށް އެ މިނިސްޓްރީން ވަނީ އެދިފައެވެ.
