ބަންދުގައި ހުރި ބިދޭސީއަކަށް ފުލުހުން އަނިޔާ ކުރި ކަމަށް ބުނާ މައްސަލައާ ގުޅިގެން ހިޔުމަން ރައިޓްސް ކޮމިޝަނުން ކުރާ ތަހުގީގަށް އެއްބާރުލުން ދޭނެ ކަމަށް ފުލުހުން ބުނެފި އެވެ.
ފުލުހުން އަނިޔާކުރި ކަމަށް ތުހުމަތު ކުރެވެނީ ގިނަ އަދަދެއްގެ މަސްތުވާ ތަކެއްޗާއެކު މި ދިޔަ މަހު 20 ގައި ހައްޔަރު ކުރި 36 އަހަރުގެ ހަނީފު އެވެ. އޭނާއަކީ ބަންގުލަދޭޝްއަށް ނިސްބަތްވާ މީހެކެވެ. ހަނީފް އަދި އެނާއާ އެކު އެކަމުގައި ބައިވެރިވި ކަމަށް 28 އަހަރުގެ ގއ. މާމެންދޫ ފިޔާތޮށިވިލާ އަޒްހަދު ނަސީމް ވެސް ވަނީ ހައްޔަރުކޮށްފައި އެވެ.
އަދި މަސްތުވާ ތަކެއްޗާއެކު އަތުލައިގަތުމަށް ފަހު، ބަންދާ މެދު ގޮތެއް ނިންމަން އެ ދެ މީހުން ވަނީ ކޯޓަށް ހާޒިރުކޯށްފަ އެވެ. އެގޮތުން ކޯޓޫން ވަނީ ހަނީފުގެ ބަންދަށް ފަސް ދުވަސް އަދި އަޒުހަދު ބަންދަށް 15 ދުވަހަށް ހުކުމްކޮށްފަ އެވެ.
މިކަމާއި ގޫޅޭގޮތުން ފުލުހުން ބުނެފައި ވަނީ ހަނީފުއަށް ފުލުހުން އަނިޔާކުރި ކަމަށް ބުނެ އެޗްއާރުސީއެމްއަށް މައްސަލަ ހުށަހެޅީ ބަންދުން ދޫކޮށްލި ފަހުން ކަމަށެވެ. ފުލުހުން ބުނީ ހަނީފުގެ ފަރާތުން ބަންދުގައި ހުރި ދުވަސްތަކުގައި ވެސް އެފަދަ ޝަކުވާއެއް އައިސްފައި ނުވާ ކަމަށާއި ޑޮކްޓަރުގެ ރިޕޯޓުތަކުން ވެސް އެފަދަ ނިޝާނެއް ފެންނަން ނެތް ކަމަށެވެ. އަދި ފުލުހުންގެ ފަރާތުން ބަންދުގައި ހުރި މީހަކަށް އަނިޔާކުރިކަން ފާހަނގަވާ ފަދަ އެެއްވެސް ކަމެއް ފެންނަން ނެތް ކަމަށް ފުލުހުން ބުންޏެވެ.
ނަމަވެސް އެޗްއާރުސީއެމުން ފުލުހުންގެ މައްޗަށް މިމައްސަލައާ ގުޅިގެން ކުރާ ތަހުގީގަށް، ފުރިހަމަ އެއްބާރުލުން ދޭނެ ކަމަށް ފުލުހުން ވަނީ ބުނެފައި އެވެ.
ހަނީފު އާއި އަޒްހަދު ހައްޔަރު ކުރީ މަސްތުވާތަކެތި ގެންގުޅޭ ކަމަށާއި އޭގެ ވިޔަފާރިކުރާ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން، ޑްރަގް އެންފޯސްމަންޓާއި ކައުންޓަ ނާކޮޓިކްސް އިންޓެލިޖެންސް ގުޅިގެން ހިންގި އޮޕަރޭޝަނެއްގަ އެވެ. ފުލުހުން ހިނގި އެ އޮޕަރޭޝަންގައި ދެ އުޅަނދެއް ބަލައި ފާސްކުރުމާއެކު، މަސްތުވާތަކެތި ކަމަށް ތުހުމަތު ކުރެވޭ ތިން ކިލޯ އަށް ވުރެ ގިނަ ތަކެތި ފެނުނު ކަމަށް ފުލުހުންގެ މީޑިއާއިން މައުލޫމާތު ދިނެވެ.
